ގެންގުޅޭ ރަޙްމަތްތެރިންގެ ތެރެއިން "ފޭކް" ރަޙްމަތްތެރިންނަކީ ކޮބައިކަން ހޯދަން ބޭނުންތަ؟
އާއްމު ގޮތެއްގައި ތިމާ ގެންގުޅޭ ހުރިހާ ރަޙްމަތްތެރިންނަކީ ތިމާއަށް ހެޔޮ އެދިގެން އުޅޭ މީހުން ކަމުގައި ނުވެދާނެއެވެ.
އެކި ކަންތައްތަކުގައި ތިމާއާ ވާހަކަ ދައްކާ އަދި ތިމާ ދައްކާ ވާހަކަތައް ވެސް އަޑު އަހާ މީހުން އުޅެއެވެ. ނަމަވެސް ހަގީގަތުގައި ތިމާއަށް ހެޔޮ އެދޭ މީހުން މަދެވެ.
އެއްކޮށް އުޅޭއިރު އެމީހުންނަކީ ތިމާގެ އިޙްސާސްތަށް ރަނގަޅަށް ދަނެ ތިމާއަށް ދުވަހަކު ވެސް އެއްވެސް ދެރައެއް ދޭނެ ބައެކޭ ހީނުވާނެއެވެ.
ނަމަވެސް ހަޤީޤަތަކީ އަހަރުމެން ގެންގުޅޭ ރަޙްމަތްތެރިންގެ މެދުގައި ވެސް "ފޭކް" ރައްޓެހިން އުޅޭ ކަމެވެ. ދޭތެރެ ޖައްސާ މީހުން ރަޙްމަތްތެރިންގެ ތެރޭގައި ވެސް ވަރަށް ގިނައެވެ. އެފަދަ މީހުން ތިމާއަށް ހެޔޮ އެދިގެން ތިމާއަށް ރަނގަޅަކަށް ބުނާ އެއްޗެއް ނުވަތަ ކުރާ ކަމެއް ކަމަށް ބުނެ، ކުރަނީ ތިމާއަށް ގެއްލުން ލިބޭނެ ކަންކަމެވެ.
އެފަދަ މީހުން ތިމާއަށް ދިރިއުޅުމުގައި މުޅިން ވެސް ދޭނީ ނައްސި (ނެގަޓިވް) ޚިޔާލެވެ. ތިމާއަށް އުފަލެއް ލިބުނަސް، އެމީހުން އެކަމުގައި ބައިވެރިއެއް ނުވާނެއެވެ. ނަމަވެސް ހިތާމައިގައި ވަރަށް ބައިވެރިވާ ހިތްވާނެއެވެ. އެއީ އެމީހުންނަށް ލިބޭ އުފަލަކަށް ވާތީއެވެ.
ހިތާމައަކީ އެފަދަ "ރައްޓެހިން" ގެ ފަތިފުށް އަހަރުމެންނަށް ނޭނގޭކަމެވެ. އެނގުނަސް ގިނަ ފަހަރަށް އެނގިފައި އޮންނަނީ ވަގުތު ފާއިތުވާ ފަހުންނެވެ.
ނަމަވެސް މިހާރު، އެފަދަ ރައްޓެހިން ދެނެ ގަނެވިދާނެ ބައެއް ގޮތްތައް އެބަ އޮތެވެ.
އިންޑިއާގެ ރިލޭޝަންޝިޕް އެކްސްޕާރޓެއް ކަަމަށްވާ އިންޑިއާނާ ކޭންގް ބުނެފައި ވަނީ، ތިމާއަށް ހެޔޮ ނޭދޭ ރައްޓެއްސެއްތޯ ހޯދި ދާނެ ފަސް ސުވާލެއްވާ ކަމަށެވެ. ތިމާގެ ރަޙްމަތްތެރިޔާއާ ބެހޭ ގޮތުން އެ ފަސް ސުވާލު އަމިއްލަ ނަފްސާ ކުރާށެވެ. ހުރިހާ ސުވާލަކަށް ޖަވަބު ދެވިއްޖެނަަމަ، އެރަޙްމަތްތެރިޔާއާ ވީހާވެސް ދުރުވުން ބުއްދިވެރި ކަމަށް ކޭންގް ބުންޏެވެ.
އެ ފަސް ސުވާލަކީ:
1- އެންމެ ގިނައިން ގުޅަނީ ކާކު؟
ދިމާވާން ވެގެން ނުވަތަ ހާލު ބަލާލަން ކަމުގައި ވިޔަސް، ގިނަ ފަހަރަށް ގުޅަނީ ކާކު ހެއްޔެވެ؟ އެކަކު އަނެކަކަށް ގުޅާ ހާލު ބެލުމަކީ ރަޙްމަތްތެރިކަން ވަރުގަދަވާ ކަމެކެވެ. ނަމަވެސް ގިނަ ފަހަރަށް މުޅިން ވެސް އެކަކު އިސްވެ ގުޅާނަމަ، އެއީ އަނެއް މީހާ އެވަރަށް ޝައުޤުވެރިކަން ނުހުންނަނީ ކަމަށް ކޭންގް ބުނެފައިވެއެވެ.
2- އެމީހުންނާއި އެއްކޮށް އުޅޭއިރު ކިހިނެއް އިޙްސާސް ވަނީ؟
އެމީހުންނާ އެއްކޮށް އުޅޭއިރު (އެމީހުންގެ ސަބަބުން) މީހާ ރުޅިއައިސް، ފޫހިވެ ނުވަތަ އިތުރަށް ހިތްދަތިވާ ކަމުގެ އިޙްސާސް ކުރެވެންޏާ، އެފަދަ ރައްޓެހިންނާ ދުރަށް ދިޔުން ރަނގަޅެވެ. މިފަދަ އިޙްސާސްތަކަކީ އެމީހުންގެ ސަބަބުން ކުރެވޭ އިޙްސާސްތަކެއް ކަމަށް ދެނެ ގަނެވޭނީ، އެމީހުންނާ އެއްކޮށް ނޫޅޭ ވަގުތު، ތިމާ ހިތްހަމަޖެހި އުފާވެފައި ހުންނަ ނަމައެވެ.
3- އޭނާއާ ދިމާނުވި ނަމައޭ ހިތަށް އަރާތަ؟
ބައެއް ފަހަރު އޭނާ ބުނާ އެއްޗަކުން ނުވަތަ ކުރާ ކަމަކުން، ރުޅި އައިސް ނުވަތަ ހިތް ނުތަނަވަސްވެ އޭނާއާ ދިމާ ނުވިނަމައޭ ވެސް ހިތަށް އަރާނެއެވެ. ދެމީހުންގެ ރަޙްމަތްތެރިކަމުގައި ފަހުން އެއްވެސް ހިތްހަމަޖެހުމެއް ނުވާއިރު، އެރަޙްމަތްތެރިކަމުގެ ސަބަބުން ފޫހިވާ ނަމަވެސް ރަނގަޅު ވާނީ ކުޑަކޮށް ދުރަށް ޖެހިލުމެވެ. ނަމަވެސް ޒަމާންވީ ރަޙްމަތްތެރިކަމެއް އޮތުމުގެ ސަބަބުން އެއްކޮށް ގުޅުން ކަނޑާލުން ބައެއް މީހުންނަށް ފަސޭހަކަމަކަށް ނުވާނެއެވެ. ރައްޓެހިންނަކީ ތިމާ ހިތްދަތިވާ ވަގުތު ހެއްވާލާ މީހުން ފަދައިން ބައެއް ރައްޓެހިންނަކީ ހިތްދަތިވާ ވަގުތު ތިމާ އިތުރަށް ދެރަކޮށްލާ މީހުންނެވެ. އެފަދަ މީހުންނާ މާބޮޑަށް ގާތް ވެގެން އުޅުމުން ޑިޕްރެޝަން އަށް ވެސް ގޮސްދާނެއެވެ.
4- ދިރިއުޅުމުގައި ކުރަން ބޭނުންވާ ކަންތައްތަކުގައި ހިތްވަރުދޭތަ؟
ދިރިއުޅުމުގައި ތިމާ ކުރަން ބޭނުންވާ އެކިއެކި ކަންކަމުގައި، މިސާލަކަށް ވަކި ކެރިއަރ އެއް އިޚްތިޔާރު ކުރުން ނޫނީ ކިޔަވަން ދިޔުން ފަދަ ކަންކަމުގައި، އޭނާ އެއްވެސް ވަރަކަށް ހިތްވަރު ނުދޭނަމަ، އޭނާއަކީ ތިމާއަށް ރަނގަޅު ގޮތެއް މެދުވެރިވާން ބޭނުންވާ މީހެއް ކަމާމެދު ވަރަށް ޝައްކެވެ. އެކި މީހުންގެ ހުންނާނީ ތަފާތު ޚިޔާލު ކަމުގައިވީ ނަަމަވެސް، ކޮންމެ މީހަކަށް ވެސް ކަމުދާނެ ކޮންމެ ވެސް އެއްކަމެއް ނުވަތަ ދެ ކަމެއް އޮވެދާނެއެވެ. ނަމަވެސް ކުރަން ގަސްދުކުރާ އެއްވެސް ކަމެއް (އެހެން މީހުންނަށް ރަނގަޅު ވާއިރު) އޭނާއަށް ރަނގަޅު ނުވާނީ ކޮންމެވެސް އެހެން ސަބަބެއްވެސް އެކަމުގައި އޮންނާތީ ކަމަށް ކޭންގް ބުނެއެވެ. ތިމާއަށް ކާމިޔާބީއެއް ލިބުމުން ވެސް މިފަދަ ރައްޓެހިން މަރުހަބާ ކިޔުމުގެ ބަދަލުގައި، ހިތްހަމަ ނުޖެހި، ތިކަން ނުކޮށް އެހެން ކަމެއް ކުރިނަމަ ނޫންހޭ ވެސް ބުނެއެވެ.
5- އެމީހުންނާ ދިމާވާން އުނދަގޫތަ؟
"ފޭކް" ރައްޓެހިންނޭ މިކިޔާ މީހުން، ނުވަތަ ތިމާގެ ރައްޓެއްސެއް ކަމަށް ހެދިގެން އުޅޭ މީހުން، ވަރަށް ގިނައިން ޕްލޭންތައް ކެންސަލްކޮށް ތިމާއާ ދިމާނުވާން އުޅޭނެއެވެ. އެއީ ވަރަށް ގިނަ ދުވަސް ކުރިން ރާވާފައި އޮންނަ ޕްލޭން އެއް ނުވަތަ ބައްދަލުވުމެއް ކަމުގައިވީ ނަމަވެސް، ކޮންމެވެސް ސަބަބެއް ބުނެ އެމީހުން އެޕްލޭންތައް ކެންސަލް ކޮށްލާ ތިމާއާ ބައްދަލު ނުވާނެއެވެ. ގިނަ ފަހަރަށް އެމީހުން ޕްލޭން ކެންސަލް ކުރާނީ ވެސް އެކަމުގެ ވަގުތު ވަރަށް ގާތް ވެފައި ވަނިކޮށެވެ.
އެފަދައިން މީހަކު ކަންތައް ކޮށްފިނަމަ، އެމީހަކާ މެދު އެވަރަށް ނުވިސްނާ، ތިމާވެސް ދެން އޭނާއާ ބައްދަލުވާން އުޅުން ހުއްޓާލާށެވެ. އެކަހަލަ މީހުންނާ މެދު އެވަރަށް ވިސްނާ ފިކުރުކޮށް ވަގުތު ބޭކާރު ކޮށްލުމަށްވުރެ ތިމާއާ އެއްކޮށް އުޅޭ ހިތްވާ މީހުންނާ އެކު އުޅުން ވަރަށް ވެސް ބުއްދިވެރިއެވެ.
