ވިސާ ނެތި ލަންކާގައި ދިރިއުޅެމުން ދިޔަ 4 ދިވެހީން ހައްޔަރު ކޮށްފި
ވިސާ ނެތި ލަންކާގައި ދިރިއުޅެމުން ދިޔަ 4 ދިވެހީން ހައްޔަރު ކޮށްފިއެވެ.
ލަންކާގެ ކޮލޮމްބޯގައި އެޤައުމުގެ ފުލުހުން ހިންގި ޚާއްސަ އޮޕަރޭޝަނެއްގައި، ހަތަރު ދިވެހީން ހައްޔަރު ކޮށްފައިވަނީ، ވިސާ ނެތި އެޤައުމުގައި އިތުރު ދުވަހަށް މަޑުކޮށްފައިވާ މައްސަލައިގައެވެ.
ލަންކާ ގެ ނޫހެއް ކަމަށްވާ "ދަ މޯނިންގ.އެލްކޭ" އިން ބުނެފައިވަނީ، ވިސާ ނެތި އިތުރު ދުވަހަށް އެޤައުމުގައި މަޑުކޮށްގެން އުޅޭ މީހުން ހޯދުމަށް ފުލުހުން އިއްޔެ ހިންގި ޚާއްސަ އޮޕަރޭޝަނެއްގައި ކޮލޮމްބޯއިން ހައްޔަރު ކޮށްފައި ވަނީ ހަތަރު ދިވެހީންނާއި އިންޑިއާގެ ދެ މީހަކާއި ނައިޖީރިއާ އަށް ނިސްބަތްވާ ތިން މީހެއް ކަމަށެވެ.
ލަންކާ ފުލުހުންގެ ތަރުޖަމާނު ޑީއައިޖީ އަޖިތު ރޮހާނާ ވިދާޅުވެފައި ވަނީ އެ 9 މީހުން ހައްޔަރު ކުރީ މައުންޓް ލެވީނިއާ، ދެހިވަލަ ސަރަޙައްދުން ކަމަށެވެ.
މީގެއިތުރުން ޑީއައިޖީ ވިދާޅުވީ، އާންމުގޮތެއްގައި މިފަދައިން އުޅޭ ނައިޖީރިއާ ރައްޔިތުންނަކީ އިންޓަނެޓް މެދުވެރިކޮށް އެކި ކުށްތައް ހިންގާ ބައެއް ކަމުގައެވެ.
ހައްޔަރު ކުރި މީހުންގެ ޤައުމުތަކުގެ އިމިގްރޭޝަނާ ގުޅައިގެން މި މައްސަލަ އިތުރަށް ބަލަމުން ދާނެ ކަމަށާއި، ވިސާއާ ނުލާ ލަންކާ ގައި އިތުރު މީހުން އުޅޭތޯ ބެލުމަށް ކުރިއަށް އޮތް ތަނުގައި ވެސް އޮޕަރޭޝަންތައް ހިންގާނެ ކަމަށް ޑީއައިޖީ ބުނެފައި ވެއެވެ.
މިމައްސަލައާ ގުޅޭގޮތުން ރާއްޖޭގެ އިމިގްރޭޝަންގެ ބަހެއް އަދި ލިބިފައެއް ނުވެއެވެ.
