ޒިންމާދާރުވެރިޔާގެ "ޒިންމާދާރުކަން" ފެނުނީ ހުސްކުރި ރެޑްބުލް ދަޅު ބެހެއްޓި ތަނުގެ ސަބަބުން!
މީގެ ކުޑަ ދުވަސް ކޮޅެއް ކުރީން ، ރަހުމަތްތެރިއަކާ ވާހަކަ ދައްކާލަން ގޭގެ ދޮރު ކައިރީގައި މަޑު ކޮށްލައިގެން ހުރީމެވެ. ހެނދުނުގެ ވަގުތު ކަމަށް ވެފައި ސަރުކާރާއި އަމިއްލަ އޮފީސްތައް ހުޅުވާ ގަޑިތައް ތަފާތު ކަމަށްވުމާއެކު އޮފީސް ހެދުމުގައި ކޮޅުކޮޅަށް ދާ މީހުން ފެނެއެވެ. އަޅުގަނޑުގެ ލޮލުގައި އަޅައިގަތީ އަޅުގަނޑުމެން ގޭގެ ކުރިމަތީގައި ހުރި ފިހާރަ ކައިރީގައި ދަޅެއް ބޯލަން މަޑު ކޮށްލައިގެން ތިބި ހަރު އުމުރުގެ ދެމީހެކެވެ. ދެމީހުން ތިބީ އަޅުގަނޑާ މާދުރު ނޫން ހިސާބެއްގައި ކަމަށްވުމާއެކު އެމީހުން ދައްކާ ވާހަކަ މާބޮޑަށް ސާފު ނުވި ނަމަވެސް ކުޑަކޮށް ފަހުމް ވާވަރު ވެއެވެ.
ދައްކާ ވާހަކައިން އެނގޭ ގޮތުގައި އެތަނުން އެކަކީ ވިޔަފާރި ވެރިއެކެވެ. އަދި އޭނާގެ ގާތުގައި ހުރީ އެ ކުންފުނީގައި މަސައްކަތް ކުރާ މުވައްޒަފެއް ހެން ހީވެއެވެ. ނުވަތަ ދެމީހުންނަކީ ވެސް ވިޔަފާރިއެއްގެ ހިއްސާދާރުންނެވެ. ދެމީހުން ވެސް ދައްކަމުން ދިޔައީ ކުރިއަށް ލިބެން އޮތް ޕްރޮޖެކްޓެއްގެ ވާހަކައެވެ. އެކަކު އަތުގައި ރެޑްބުލް ދަޅެއް އޮތްއިރު އަނެއް މީހާގެ އަތުގައި އޮތީ ކޮފީ ދަޅެކެވެ. ދެމީހުން އޮލަ ވާހަކައިގައި ތިބިއިރު، އަޅުގަނޑު އެމީހުންނަށް މާ ބޮޑު ސަމާލު ކަމެއް ނުދެމެވެ. ނަމަވެސް ދެވަނަ ސިކުންތުގައި އަޅުގަނޑަށް އެ ދިމާއަށް ބަލައިލަން މަޖުބޫރުވީ އެއްލި ކަޅިއަކުން އެ ދެމީހުން ކުރި ކަންތައް ފެނުމުންނެވެ.އެ ދެމީހުން ވެސް ސައިކަލަށް އަރައި ނައްޓާލައިގެން ދިޔައީ ބޮއެ ހުސްކޮށްލި ދަޅު އެތަނުގައި ހުރި ކަރަންޓު ބޯޑުގެ މަތީގައި ބަހައްޓާފައެވެ.
ހިތަށް އެރިއެވެ. ޒިންމާދާރު ކަމަކީ ރަސްމީ ހެދުމަކުން ވަޒަން ކުރެވޭނެ ކަމެއް ނޫނެވެ. އަތްދިގު ގަމީސް ލައި ޓައި އަޅައިގެން ބެގީ ކޮށްފައި ހުރި ނަމަވެސް އެމީހެއްގެ ގައިގައި އަދަބެއް އަޚްލާގެއް ނެތިއްޖެ ނަމަ އެމީހަކީ ޒިންމާދާރު މީހެކޭ ނުބުނެވޭނެއެވެ. ދައްކާ ވާހަކަތަކުގެ ބޮޑު ކަމުންނާއި ޒިންމާދާރު ކަމުން އެމީހަކީ އަދި ޒިންމާދާރު މީހެކޭ ބުނެވޭކަށް ނެތެވެ. ބަހާ އަމަލާ ދިމާ ނުވާ ކަމުގައި ވަނީ ނަމަ އެވަނީ ކޯޗަކަށް ތޯއެވެ. އެހެންކަމުން އަޅުގަނޑުގެ ކުރިމަތީގައި ހުރި ޒިންމާދާރުވެރިޔާގެ "ޒިންމާދާރުކަން" އަޅުގަނޑަށް ފެނުނީ އޭނާ ހުސްކުރި ރެޑްބުލް ދަޅު ބަހައްޓައިފައި ދިޔަ ތަނުންނެވެ.
މިއީ މިއަދު އަޅުގަނޑުމެން ވިސްނާ ފިކުރުކުރަން ޖެހޭ "ޤައުމީ މައްސަލަ" އެއް ކަން ޔަގީނެވެ. މިއަދު އެފަދަ "ޒިންމާދާރު" މީހަކު އެފަދަ ދަށު ފެންވަރުގެ އަމަލެއް ކުރާ މަންޒަރު އަޅުގަނޑުމެންގެ މި ޖީލުގެ ކުޑަކުދިންނަށް ފެނުމުން އެކުދިންނަށް ދަސްވާނީ ކޯޗެއް ހެއްޔެވެ. އެ ކުދިންނަށް ހީވާނީ ޓައީ އަޅާ ބެގީ ކޮށްފައި ތިބޭ "ޒިންމާދާރު" ބޭބެ މެން ކުރަނީ ހުސް ރަނގަޅު ކަންތަކޭ ނޫން ހެއްޔެވެ؟ އެހެންކަމުން މިއީ ކުޑަ ކަމެކޭ ބުނެ މިކަމުގެ ވާހަކަ ނުދައްކާ ތިބެވޭކަށް ނެތްތާއެވެ.
މިއަދު މާލޭގެ މަގުތަކުގައި ހުންނަ ކަރަންޓު ބޯޑުތައް ވެފައި ވަނީ ޑަސްބިން ތަކަށެވެ. އަދި އިޝްތިހާރު ބޯޑު ތަކަކަށެވެ. އެއީ މަގުމަތީގައި ތިބޭ މީހުން ފުޅި އާއި ދަޅު ފަދަ ތަކެތި ބޮއިފައި ބަހައްޓަން ހަދާފައިވާ އެއްޗަކަށް ވަނީ ވެފައެވެ. އަދި އެތަނުގައި އެތަކެތި ނުބަހައްޓާ ގެންގޮސް ޑަސްބިނަކަށް ލައިފިނަމަ އެމީހެއްގެ ގައިން ބައެއް އުނިވަނީ ތޯ ވެސް ހިތުގައި ސުވާލު އުފެދެއެވެ. ސަބަބެއް ނެތިއެއް ވެސް ނޫނެވެ. އެކަން އާންމު ވެފައިވާ މިންވަރުންނެވެ.
އަޅުގަނޑުމެންނަށް މި ރީތި ގައުމު ސާފުތާހިރުކަން މަތީ ބޭއްވޭނީ އަޅުގަނޑުމެން ކޮންމެ މީހަކު ވެސް ފަރުދީ ޒިންމާ އަދާ ކޮށްގެންނެވެ. ދަޅާއި ފުޅި އަދި ޖޫގޯ ތަށި ފަދަ ތަކެތި ކަރަންޓު ބޯޑު މަތީގައި ބަހައްޓާ އޭގެ ސަބަބުން އެއަށް ފެން އެޅި މަދިރި އުފެދުން ފަދަ އިތުރަށް އުފެދޭ އެތައް މައްސަލަތަކަކަށް ފުރުސަތު ނުދީ ކޮންމެ މީހަކު ވެސް އަމިއްލަ ޒިންމާއެއްގެ ގޮތުގައި ދެކި އެކަންކަން ހުއްޓާލުމުންނެވެ. އޭރުން އަޅުގަނޑުމެންގެ މުޖުތަމައުއަށް "ބަދަލެއް" ގެނެވޭނެ ކަން ޔަގީނެވެ.
ދެން ކީއްތަވާނީ ކައި ގޮސް އޭތި ނަގާފަ ޑަސްބިނަށްލިއްޔާ..