ރޯދަ މަހު ވެކްސިން ޖަހާނީ ރޭގަނޑު

ކޮވިޑް-19 އިން ދިފާޢުވުމަށް ޖަހާ ވެކްސިން ޖެހުން ރޯދަ މަހު ކުރިއަށް ގެންދާނީ ރޭގަނޑު ކަމަށް ހެލްތު އެމަޖަންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފި އެވެ.

Ads by Sosun Fihaara

މިރޭ ކުރިޔަށް ދިޔަ ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާން ޑރ. ފާތިމަތު ނަޒްލާ ރަފީޤް ވިދާޅުވީ، ރޯދަ މަހު  ވެސް ވެކްސިން ޕްރޮގާމް ކުރިޔަށްދާނެ ކަމަށާއި މިހާރު ރާވާފައިވާ ގޮތުން ވެކްސިން ޖެހުން ކުރިޔަށްދާނީ ރޭގަނޑުގެ ވަގުތުތަކުގައި ކަމަށެވެ. އަދި ވެކްސިން ދޭ ގަޑިތަކާއި ވެކްސިން ޖަހާ ސެންޓަރުތަކުގެ މަޢުލޫމާތު ހިއްސާ ކުރައްވާނެ ކަމަށްވެސް ނަޒްލާ ވިދާޅުވިއެވެ.

މާލެ ސަރަޙައްދުގައި ވެކްސިން ދިނުމަށް ގާއިމް ކޮށްފައިވާ 6 ސެންޓަރުން މިހާތަނަށް ޖުމްލަ 95،362 މީހުންނަށް ވެކްސިން ދީފައިވާއިރު އަތޮޅުތެރޭގެ ދެ ސެންޓަރުން މިހާތަނަށް ޖުމްލަ 70،313 މީހަކަށް ވެކްސިން ދީފައި ވެއެވެ.