އެމްޑީޕީއެއް ކަމަކު ފަހަތު ފަޔަށް ބުރަ ނުވެ ގަވާއިދާ ހިލާފުވި ބަޔަކަށް ފިޔަވަޅު އެޅުމަށް ގޮވާލަން : ޒައިދު
ހެލްތް ޕްރޮޓެކްޝަން އެޖެންސީ(އެޗްޕީއޭ) ގެ ގަވާއިދާ ހިލާފުވާ ބަޔަކަށް ފިޔަވަޅު އެޅުމަށް ދީނީ ޢިލްމުވެރިޔާ ޢަލީ ޒައިދު ގޮވާލައިފިއެވެ.
ޒައިދު މިހެން ވިދާޅުވީ މިއަދު ކުރެއްވި ޓްވީޓެއްގައެވެ. ކުރިއަށް އޮތް ލޯކަލް ކައުންސިލް އިންތިހާބުގައި އެމްޑީޕީގެ ޓިކެޓްގައި ހުޅުމާލެ ދާއިރާއަށް ކުރިމަތިލާ ކެންޑިޑޭޓްގެ ކެންޕެއިން ޖަގަހަ ހުޅުވުމުގެ ޖަލްސާ މިއަދު ހުޅުމާލެގައި ބޭއްވުމާ ގުޅިގެން ޒައިދު ކުރި ޓްވީޓްގައި ވިދާޅުވީ ގަވާއިދާ ހިލާފުވި ބަޔަކަށް ފިޔަވަޅު އެޅުމަށް ގޮވާލާ ކަމަށެވެ.
“މޮޅު މީހާއަށް މޮޅު ގޮތް، ދެރަ މީހާއަށް ދެރަ ގޮތް ތޯ؟ އެމްޑީޕީއެއް ކަމަކު ފަހަތު ފަޔަށް ބުރަ ނުވެ ގަވާއިދާ ހިލާފުވި ބަޔަކަށް ފިޔަވަޅު އެޅުމަށް ގޮވާލަން. އަދި ވަކި ބޭފުޅެއް ދެކެ ބިރުން ނޫޅުމަށް ވެސް ގޮވާލަން” ޒައިދު ވިދާޅުވިއެވެ.
އެމްޑީޕީގެ ރައީސް، މަޖިލީހުގެ ރައީސް މުޙައްމަދު ނަޝީދު ވެސް ބައިވެރިވެ ވަޑައިގެންނެވި ޖަލްސާ ކުރިޔަށް ގެންގޮސްފައި ވަނީ އެޗްޕީއޭގެ ގައިޑްލައިންތަކާ ޚިލާފަށް ކަމަށް މީސްމީޑިއާގައި ގިނަ ބަޔަކު ދިޔައީ ބުނަމުންނެވެ. އެހެން ނަމަވެސް މި ޖަލްސާ ބާއްވާފައި ވަނީ އެޗްޕީއޭގެ ގައިޑްލައިންތަކާއެކު ކަމަށް ވިދާޅުވެ ހުޅުމާލެ ދާއިރާގެ އެމްޑީޕީގެ މެންބަރު އަލީ ނިޔާޒު ވަނީ ޓްވީޓުކޮށްފައެވެ.
Ads by STO
