ދެތިން މަސް ތެރޭގައި އައްޑޫގައި ބޮޑެތި މަޝްރޫޢުތައް ފެށޭނެ: ރައީސް
އައްޑޫގައި މި ސަރުކާރުން ހިންގަން ނިންމާފައިވާ ބޮޑެތި ހުރިހާ މަޝްރޫޢެއް ކުރިއަށް އޮތް ދެތިން މަސް ތެރޭގައި ފެށޭނެ ކަމަށް ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރައީސް ވިދާޅުވީ ފާއިތުވި ދެ އަހަރު ތެރޭގައި އައްޑޫގެ ތަރައްޤީއަށް ދައުލަތުގެ ބަޖެޓުން ބައި ބިލިއަން ރުފިޔާ ޚަރަދު ކޮށްފައިވާ ކަމަށާއި އައްޑުގެ ތަރައްޤީއަށްޓަކައި މި ސަރުކާރުން ވަރަށް ގިނަ މަސައްކަތް ކުރަމުން އަންނަ ކަމަށެވެ.
ރައީސް ވިދާޅުވީ ކުރިއަށް މި ސަރުކާރުން ގިނަ މަޝްރޫޢުތަކެއް އައްޑޫއަށް ޚާއްޞަ ކޮށްގެން ރާވާފައިވާ ކަމަށެވެ. ފާއިތުވި ދެ އަހަރު ސަރުކާރުން އައްޑޫގެ ތަރައްޤީއަށް 535.6 މިލިއަން ރުފިޔާގެ މަޝްރޫޢު އައްޑޫގައި ހިންގިފައިވާ ކަމަށް ރައީސް ފާހަގަ ކުރެއްވިއެވެ.
އައްޑޫގެ ގިނަ މަޝްރޫއުތައް މިހާރު ކުރިޔަށްދާއިރު، މަގުތައް ހެދުމުގެ މަޝްރޫޢުގެ ދަށުން އައްޑޫގައި ހުރި ބޮޑެތި ހުރިހާ މަގުތަކެއް ހިމެނޭހެން 40 ކިލޯމީޓަރުގެ މަގުތައް ޒަމާނީ ފެންވަރަށް ތަރައްޤީ ކުރުމަށް ވަނީ ނިންމާފައެވެ. އަދި އެސިޓީގެ ބްރިޖް ހެދުމުގެ ޢަމަލީ މަސައްކަތް މިމަހު ފެށުމަށް ހަމަޖެހިފައިވާ ކަމަށް އައްޑޫ ސިޓީގެ މޭޔަރ ޢަބްދުﷲ ޞާދިޤް މީގެ ކުރިން ވަނީ ވިދާޅުވެފައެވެ.
