ރާއީ ހެއްދެވީ އިތުރުފުޅެއް، ހާލު ބައްލަވަން ރާއީ ނުގުޅުއްވާ: ޝިޔާމް

ނައިފަރު ދާއިރާގެ މެންބަރު އަހުމަދު ޝިޔާމްގެ ހާލު ބައްލަވަން، ގުޅުއްވި ކަމަށް ބުނެ، މަކުނުދޫ ދާއިރާގެ މެމްބަރު މުހައްމަދު ރާއީ މިއަދު މަޖިލީހުގައި އިތުރުފުޅު ހައްދަވައިފިއެވެ.

Ads by Sosun Fihaara

ރާއީ މިއަދު މަޖިލީހުގައި ވިދާޅުވީ ޝިޔާމް ކޮވިޑް-19 އަށް ފައްސިވުމާ ގުޅިގެން ގުޅާ، ހާލު ބެއްލެވި ކަމަށާއި ޝިޔާމް އުޅުއްވަނީ ވަރަށް ހާލުގައި ކަމަށް ރާއީ ވިދާޅުވިއެވެ.

ރާއީގެ ވާހަކަތަކަށް ދޮގު ކުރައްވައި، ޝިޔާމް ކުރެއްވި ޓްވީޓެއްގައި ޝިޔާމް ވިދާޅުވީ އެމްޑީޕީގެ ވަރަށް ގިނަ މެންބަރުން ގުޅާ، ހާލު އަހުވާލު ބައްލަވާފައިވާ ކަމަށާއި ނަމަވެސް އޭނާއަށް ރާއީ ނުގުޅުއްވާ ކަމަށެވެ.

"މަކުނުދޫ ދާއިރާގެ މެމްބަރު އަޚު މުހައްމަދު ރާއީ ދާދި ދެންމެއަކު މަޖިލިސް ތަޅުމުގައި ހެއްދެވީ ވަރަށް ބޮޑު އިތުރުފުޅެއް. ރާއީ އުޅުއްވަނީ އަދި އަޅުގަނޑަށް ނުގުޅުއްވިގެން. އެހެން ނަމަވެސް ވަރަށް ގިނަ އެމްޑީޕީ މަޖިލިސް މެމްބަރުން ގުޅުއްވާ ހާލު ބެއްލެވި. އަޅުގަނޑުގެ ހާލު ވަރަށް ރަނގަޅު ކަމަށް ދެންނެވިން." ޝިޔާމް ވިދާޅުވިއެވެ.

އިދިކޮޅު ޕީޕީއެމްގެ ނައިބު ރައީސްކަން ވެސް ކުރައްވާ ޝިޔާމް ކޮވިޑަށް ފައްސި ވެފައިވާކަން ހާމަ ކޮށްފައި ވަނީ އިއްޔެއެވެ. ފައްސިވުމާއެކު ގިނަ ބަޔަކު ވަނީ އަވަސް ޝިފާއަކަށް އެދި ހެޔޮ ދުޢާ ކޮށްފައެވެ.

ޝިޔާމް އިއްޔެ ކުރެއްވި ޓްވީޓެއްގައި ވިދާޅުވީ ދަތުރު ކުރުމަށް މިމަހުގެ 17 ވަނަ ދުވަހު ޕީސީއާރް ޓެސްޓެއް ހެދުމުން، ކޮވިޑަށް ފައްސިކަން އެނގިފައިވާ ކަމަށެވެ. އަދި އެއްވެސް ކަހަލަ އުނދަގުލެއް އަދި ބަލީގެ އަލާމާތެއް ނެތް ކަމަށާއި ހާލު ރަނގަޅު ކަމަށްވެސް ޝިޔާމް ވިދާޅުވިއެވެ.