ބަހެއް ބުނުމުގެ ކުރިން އެބަހަކާ ދޭތެރޭ ވިސްނާލާށެވެ. އެއީ ތޫނު ހަންޖަރަކަށް ވުރެ ޒަޚަމު ބޮޑު އެއްޗެކެވެ.
ދެމީހެއްގެ ދެމެދުގައި ޖެހޭ އެކިއެކި މައްސަލަ ތަކުގައި ބަހުގެ އެކި ހަމަލާތައް ދެމީހުންގެ ދެމެދުގައި ވެސް ބަދަލު ކުރެވެއެވެ. އެކަކު ބަހެއް ބުނެފި ނަމަ އެއާ ވިއްދާ އެއަށް ވުރެ ބޮޑު ބަހެއް ބުނެވޭތޯ އަބަދުވެސް މަސައްކަތް ކުރެއެވެ. އެއީ އަނެކާއަށް ވުރެ ގަދަ ވުމަށް ކޮށް އުޅޭ ކަމެކެވެ. އެހެންނަމަވެސް ދަންނަންވީ އެގޮތަށް ބުނާ ބަހެއްގެ ސަބަބުން އަނެކާގެ ހިތުގައި އުފެދިފައިވާ ޒަޚަމުތަކުގެ ފާރުތައް ފަސޭހަނުވެ އެތައް ޒަމާނެއް ވަންދެން ހުންނާނެ ކަމެވެ.
ހަނދާނުން ފޮހެލަން ކިތަންމެ ބޭނުން ވިޔަސް ހަނދާނުން ފޮހެލަން ދަތިވާނެއެވެ. ބަހެއް ބުނާ ވަގުތު ހިތަށް އެ ކުރާ އަސަރު ތަކަކީ ލިޔުމުން ބަޔާން ކުރެވޭ ވަރަށް ވުރެ މާ ފުން އަސަރުތަކެކެވެ. އަޅުގަނޑުމެންގެ މާތް ވެގެންވާ އިސްލާމްދީނުގައި ވެސް ދޫ ރައްކާތެރިކުރުމަށް އަންގަވައިފައި ވަނީ ހަމަ މި ސަބަބަށް ޓަކައެވެ.
އެހެންނަމަވެސް އަނެކާގެ ހިތަށް އަރާނެ އެއްޗަކާއި އޭނާއަށް އޭގެ ސަބަބުން ކުރާނެ ނޭދެވޭ އަސަރުތަކަށް އެއްވެސް ފިކުރުކުރުމެއް އަދި ވިސްނާލުމެއް ނެތި ބަސް ބުނާ މީހުން މިއަދު އަޅުގަނޑުމެންގެ މުޖުތަމައުގައި ވަރަށް ގިނަ ވެއްޖެއެވެ. ބަހެއް ބުނުމަށް ފަހު އަނެކާ އެކަމާ އަޅާނުލާ ހުރުމުން އެއީ މާބޮޑު ކަމެއް ކަމަށް ހީ ނުކުރާށެވެ. އެމީހާގެ ބޭރުފުށުން އެއްވެސް ކަމެއް ނުފެނުނަސް ނަފްސާނީ ގޮތުންނާއި އެހެނިހެން ގޮތްގޮތުން އަނެކާ ވަރަށް ބޮޑަށް ޒަޚަމު ވާނެއެވެ.
ބަސް ބުނުމުގައި ސަމާލު ވާށެވެ. އެކަމަކީ ކިހާ ވަރެއްގެ ކަމެއް ކަން ދަނެގެން ޚާއްސަ ސަމާލުކަމެއް ދީގެން ބަސް ބުނާށެވެ. ދުވަހަކުވެސް އަނެކާ ހިތުގައި ޖެހޭ ފަދަ ބަހެއް ނުބުނެވޭތޯ މަސައްކަތް ކުރާށެވެ. އެހެނީ އެއީ ނުބައި ވެއްޖެނަމަ ވަރަށް ނުބައި އެއްޗެކެވެ.
