11ގެ ފަހުން އަދިވެސް ބޭރުގައި އުޅެވޭނީ ހުއްދަ އޮތް ފަރާތްތަކަށް: ފުލުހުން

ރޭގަނޑު 11 ފަހުން އަދިވެސް ބޭރުގައި އުޅެވޭނީ ހުއްދަ އޮތް ފަރާތްތަކަށް ކަމަށް ފުލުހުން ވިދާޅުވެއްޖެއެވެ.

Ads by STELCO

ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއި ކުރައްވާ މިއަދު ނެރުނު އިއުލާނެއްގައި ވަނީ، ކޮވިޑް-19 ގެ ހާލަތާއި ގުޅިގެން ހަވީރު 6:00އިން އަނެއް ދުވަހުގެ ހެނދުނު 6:00އަށް މާލެ ސަރަޙައްދުގައި އެއްގަމު އުޅަނދުފަހަރު ދުއްވުން މަނާކަމަށް ބުނެ އެންގި އެންގުން ބާތިލު ކޮށްފައެވެ.

އެ އިއުލާނާއެކު މިރޭ ފުލުހުން ކުރެއްވި ޓްވީޓެއްގައި ވިދާޅުވެފައި ވަނީ މާލެ ސަރަޙައްދުގައި 6 އިން 6އަށް އެއްގަމު އުޅަނދު ފަހަރު ދުއްވުން މަނާ ކުރުމުގެ ފިޔަވަޅު މިއަދު އުވާލާފައިވާތީ، އެއްގަމު އުޅަނދުފަހަރެއް ދުއްވަން ޚާއްސަ ހުއްދައެއް ދެން ނަގަން ނުޖެހޭނެ ކަމަށެވެ.

އެހެން ނަމަވެސް، ރޭގަނޑު 11:00 އިން ފަތިހު 4:30 އޮންނަ ކާފިއު ގަޑި އަދިވެސް އޮތުމާއެކު އެވަގުތު ބޭރުގައި އުޅޭ ފަރާތްތަކުން ޚާއްސަ ހުއްދައެއް ނަގަން ޖެހޭނެ ކަމަށެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު ވަނީ ކޮވިޑްގެ ހާލަތާ ގުޅިގެން ޕާކުތަކާއި މައިޒާންތައް ބަންދު ކުރުމަށް އެންގި އެންގުން ވެސް ބާތިލު ކޮށްފައެވެ. ނަމަވެސް މިސްކިތްތަކުގައި ޖަމާޢަތުގައި ނަމާދު ކުރާއިރު، ގައިދުރު ކޮށްގެން ނަމާދުކުރަން އެންގި އެންގުން އަދިވެސް ބާތިލެއް ނުކުރެއެވެ.