ވެންޓިލޭޓަރު މައްސަލައިގެ ފައިސާ ޖަމާވި ތަނެއް އެނގިއްޖެނަމަ އަދިވެސް ދައުވާ ކުރާނަން: ޝަމީމް
ވެންޓިލޭޓަރު ކޮރަޕްޝަން މައްސަލައިގެ ފައިސާ ޖަމާވި ތަނެއް އެނގިއްޖެނަމަ އަދިވެސް ދައުވާ ކުރައްވާނެ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ރާއްޖެ ޓީވީގެ ފަށާއިރު ޕޮރްގުރާމުގައި ވާހަކަ ދައްކަވަމުން، ޝަމީމް ވިދާޅުވީ، އޭސީސީއާއި ފުލުހުން ގުޅިގެން ހިންގި ތަހުގީގުގައި، މިހާތަނަށް، އެ ފައިސާ ޖަމާވެފައި ވަނީ ކޮންކޮން އެކައުންޓްތަކަކަށް ކަމެއް، ނުވަތަ އެފައިސާ ލިބިފައި ވަނީ ކާކަށް ކަމެއް އެނގިފައި ނުވާ ކަމަށެވެ.
ކޮވިޑް-19 ޖެހިފައިވާ ފަރާތްތަކަށް ފަރުވާ ދިނުމަށް ބޭނުންވާ ވެންޓިލޭޓަރު ގެނައުމުގައި ކޮރަޕްޝަންގެ ޢަމަލުތައް ހިންގި މައްސަލައިގައި ދަޢުވާ ނުކުރަން ނިންމީ ކުރިން ހޯދާފައިވާ ހެކި ޤަރީނާގެ މައްޗަށް ބަލައި ޖިނާޢީ ކުށެއްގެ ގޮތުގައި ސާބިތު ކޮށްދެވިދާނެ ކަމަށް ނުފެންނާތީ ކަމަށް ޕީޖީ އޮފީހުން ވަނީ ބުނެފައެވެ.
ޝަމީމް އިތުރަށް ވިދާޅުވީ، ދައުވާ ކުރުމަށް އެކަށީގެންވާ މިންވަރަށް ހެކި ހުރުމާއި، ސާބިތުކުރެވޭ މިންވަރަށް ހެކި ހުރުމަކީ ތަފާތު ދެކަމެއް ކަމަށެވެ.
އޭނާގެ އިތުބާރު ނެތް ކަމުގެ ވޯޓެއް ނަގަން ރައީސް ނަޝީދު ގޮވައިލެއްވުމާ ގުޅިގެން ޝަމީމް ވިދާޅުވީ އޭނާ އިސްތިއުފާ ދިނުމުގެ ޕްރޮސެސްއެއް އޮންނަ ކަމަށާއި، އަދި އެ ޕްރޮސެސްގެ ތެރެއިން އަމަލު ކުރަންޖެހޭ ގޮތަށް ކަންކަން ކުރައްވާނެ ކަމަށެވެ.
“ރައީސް ނަޝީދަށް ފެންނަ އެއްޗެއް ޤަބޫލުކުރެވޭ ވާހަކައެއް ވަރަށް ސާދާކޮށް ސާފުކޮށް އެ ވިދާޅުވީ. ދެން އެކަމަކާ އަޅުގަނޑުގެ ކޮމެންޓެއް ނެތް އަސްލު. އަޅުގަނޑު ވަރަށް ރެސްޕެކްޓްކުރާ ބޭފުޅެއް. އަޅުގަނޑުގެ މަންމަ އަޅުގަނޑު ކައިރީގައި އެއްޗެކޭ ބުނުން ފަދަ ކަމެއް އެއީ" ޝަމީމް ވިދާޅުވިއެވެ.
Ads by STO
