އާލިއާ ބަޓް ވެސް ކޮވިޑް-19އަށް ފައްސި ވެއްޖެ
އިންޑިއާގެ ފިލްމުތަކުގައި މިހާރު ރަނިކަން ކުރަމުން އަންނަ މަޝްހޫރު ފިލްމީ ތަރި އާލިއާ ބަޓް ކޮވިޑް-19އަށް ފައްސި ވެއްޖެއެވެ.
ކޮވިޑަށް ފައްސި ވެފައިވާކަން އާންމުކޮށް އިއުލާނު ކުރަމުން އިންސްޓަގްރާމްގައި ކޮށްފައިވާ ޕޯސްޓެއްގައި އާލިއާ ބުނެފައި ވަނީ އޭނާ ފައްސި ވެފައިވާ ކަމަށާއި އެހެންކަމުން މި ވަގުތު ހުރީ ހޯމް ކަރަންޓީނު ވެގެން ކަމަށެވެ.
ކަރަންޓީނުގައި ހުރި އިރު ވެސް ޑޮކްޓަރުންނާއި ސިއްޙީ މާހިރުން ދެއްވާފައިވާ އިރުޝާދުތަކަށް ބޯލަނބަލުން ގެންދާ ކަމަށް ވެސް އާލިއާ ބުނެފައި ވެއެވެ.
އާލިއާގެ ކުރީން ، އޭނާގެ ލޯބިވެރިޔާ އަދި ބޮލީވުޑްގެ އެކްޓަރ ރަންބީރް ކަޕޫރް ވެސް މި ބައްޔަށް ފައްސިވެ، ބަލިން ފަސޭހަ ވެފައި ވެއެވެ.
އާލިއާ ދެން އެންމެ އަވަހަށް ފެންނާނެ ކަމަށް ބެލެވޭ ބޮލީވުޑްގެ ފިލްމުތަކަކީ ސަންޖޭލީލާ ބަންސާލީގެ "ގަންގޫބައީ ކަތިއާވަޅީ" އާއި އާޔަން މުކަރްޖީގެ "ބްރަހްމާސްތުރަ" ގެ އިތުރުން އެސްއެސް ރާޖަމޯލީގެ "އާރްއާރްއާރް" އެވެ.
ދުނިޔޭގެ އެކި ކަންކޮޅުތަކުގައި އާލިއާ ބަޓްގެ ފޭނުން ހިމެނޭއިރު، އޭނާ އަށް އަވަސް ޝިފާއެއް ލިބުމަށް އެދި ދުއާ ކޮށްދިނުމަށް އާލިއާ އެދިފައިވެއެވެ.
އާލިއާ އާއި ރަންބީރް އިތުރުން ބޮލީވުޑްގެ އެހެން ތަރިންތަކެއް ވެސް ވަނީ މީގެ ކުރިން ކޮވިޑަށް ފައްސި ވެފައެވެ. އޭގެ ތެރޭގައި އާމިރް ޚާން، ޕަރޭޝް ރަވާލް، ކާރްތިކް އާރްޔަން، ތާރާ ސުތާރިއާ، ކްރިތީ ސަނޯން، އަމީތާބް ބަޗަން، އަބީޝޭކް ބަޗަން، އައިޝްވާރްޔާ ރާއީ ބަޗަން އަދި މަލައިކާ އަރޯރާ ހިމެނެއެވެ.
Ads by STO
