ހިންޏާއި ކަނޑާފަދަ ސޫފި ވެސް ކައިބޮއެ އުޅެނީ ހާދަ ބުރަ މަސައްކަތުންނެވެ.

ދުވަހުގެ ބުރަ މަސައްކަތަށް ފަހު، އަދި އިތުރަށް ކުރަން ހުރި މަސައްކަތްތައް ބޮލު ތެރޭގައި ޖަމާކޮށް، މާދަމާގެ އެޖެންޑާ ރާވައިލަން އަހަރެން ކާމޭޒު ކައިރީ އިނީ ހޫނު ކޮފީ ތައްޓަކަށް އިންސާފު ކޮށްލަމުންނެވެ.

Ads by Hajj Corporation

މޭޒު މަތީގައި އަހަރެންގެ ކޮފީ ތަށީގެ އިތުރުން ބަހައްޓާފައި ހުރީ، މި ގޭގައި އުޅޭ ކުޑަ މަންޖެއަށް ކާންދީފައި ބާކީ ބަހައްޓައިފައިހުރި ބިސްކޯދު ތައްޓެކެވެ. ބިސްކޯދުގެ ކުނޑިވެސް ކޮންމެ ވެސް ވަރަކަށް މޭޒު މައްޗަށް އެޅިފައި ހުއްޓެވެ.

އެ ތަށި ނަގައިފައި، މޭޒުމަތި ވެސް ސާފު ކުރަންވީޔޭ ހިތަށް އަރައި، މޭޒަށް އިތުރަށް ނަޒަރު ހިންގައިލުމުން ފެނުނީ، ކަޅު ކުލައިގެ ކަނޑައެއް، އޭގެން ބިސްކޯދު ކުނޑި ކޮޅެއް ނަގައިގެން އެތަނުން ދިޔުމަށް ބުރަ މަސައްކަތްތަކެއް ކުރާ މަންޒަރެވެ. އެއް ފަހަރު އޭގެ ފޫކޮޅު ހިއްލާލައެވެ. އަނެއްފަހަރު އެ ހިފައިގެން ދާން ދުއްވައިގަނެ، ދެވެނީ ނުބައި މަންޒިލަކަށްކަން އެނގުމުން އަނެއްކާ ވެސް މިސްރާބު ބަދަލު ކޮށްލައެވެ.

އޭތި އުޅޭ ގޮތް ބަލަން އިރުކޮޅަކު އިނދެފައި، އޭތި ވެސް އެ މަސައްކަތް ކުރަނީ އޭގެ ބަނޑުފުރާނަ މުއްތި ކުރެވޭތޯ ކަމަށް ޤަބޫލު ކުރެވުނެވެ.

ކަންކަމާމެދު މާ ބޮޑަށް ވިސްނުމަކީ އަހަރެންގެ ޠަބީޢީ ކަމަކަށް ވުމުން، އެކަމާ މެދު ވެސް ވިސްނައިލީމެވެ. ހިތަށް އެރީ، އަހަރުމެން އިންސާނުން ވެސް ކައިގެން ބޮއެގެން އުޅުމަށް ނުހަނު ބުރަ މަސައްކަތްތަކެއް ކުރާ ކަމެވެ.

އެ ގޮތުން ކައިގެން ބޮއެގެން އުޅުމަށާއި އެހެން ވެސް ޒަރޫރީ ބޭނުންތައް ފުއްދުމަށް އަހަރެމެން ވަޒީފާ އަދާ ކުރަން ފަށަމެވެ. އެއީ ދިރިއުޅުމަށް ބޭނުންވާ ތަކެތި ގަތުމަށް، އާމްދަނީއެއް ހޯދުމަށްޓަކައެވެ. އަހަރެމެން ވެސް ނުހަނު ބުރަކޮށް މަސައްކަތްކޮށް، ބައެއް ފަހަރު ހަމަ އެ ކަނޑާ ފަދައިން ދާންވީ ރަނގަޅު މިސްރާބު ހޯދުމަށް ވެސް އެހާ ބުރަ މަސައްކަތްތަކެއް ކުރަން ޖެހެއެވެ.

ނަމަވެސް މިއީ އަހަރެމެންގެ ތެރެއިން އެންމެން އުޅޭ ގޮތެއް ނޫނެވެ. އަހަރެމެންގެ ތެރެއިން ބައެއް މީހުންނަކީ އަތް ފައި ސަލާމަތުން ހުރެ ވެސް، އެހެން މީހުން ދިނީމައި ކައިގެން ބޮއެގެން އުޅޭ މީހުންނެވެ. އަނެއް ބަޔަކީ، ވަޒީފާއެއްގައި އުޅުނު ނަމަވެސް، ނުހަނު ކަންނެތްކަމާއެކީ މަސައްކަތް ކޮށްގެން، ލިބޭ އުޖޫރަ ، ބޭނުން ނެތް ކަންކަމުގައި ހޭދަކޮށްލާ މީހުންނެވެ. ދިރިއުޅުމުގެ ހަގީގީ މާނަ އެފަދަ މީހުންނަށް އެނގޭ ކަމަކަށް ޤަބޫލެއް ނުކުރެވެއެވެ.

މިފަދަ ޚިޔާލުތަކެއްގައި އިންދާ ފެނުނީ އެއްކަލަ ކަނޑާ މޭޒުމަތިން ވެއްޓުނު ތަނެވެ. ތަޅުންގަނޑުގައި އޭތި ދެކޮޅަށް ދެކޮޅަށް ދުވަމުން ދިޔައެވެ. އެއްޗެއް ހޯދާ ފަދައިންނެވެ. އާންމުގޮތެއްގައި ހިންޏެއް، ކަނޑައެއް ފެނުމުން އެ އެއްޗެއް ފޮޅާލި ކަމުގައި ވިޔަސް، މިފަހަރު އެހެން ހަދާ ހިތެއް ނުވިއެވެ. ކާ އެއްޗެއް ހޯދުމަށް އޭތި ކުރަމުންދިޔަ ބުރަ މަސައްކަތް ފެނުމުން ކަމަށް ވެދާނެއެވެ.

އެހެންކަމުން މޭޒުމަތިން ބިސްކޯދު ކުނޑިކޮޅެއް ނަގައިފައި، އެ ކަނޑާ ހިނގަމުން ދިޔަ މަގު ކައިރީގައި ބޭއްވީމެވެ. ކަނޑަޔަށް އެ ބިސްކޯދުކޮޅުގައި ޖެހެވުމާއެކު އޭތީގެ ދަތުންނާއި ފައިން ކުނޑިކޮޅުގައި ހިފައިގެން ބެލްކަނީ ދޮރުން ބޭރަށް ދިޔައެވެ. އާއިލާއަށް ކޮއްތު ފޯރުކޮށްދޭށެވެ.