އަތޮޅު ތެރެއަށް ކޮވިޑް-19 ފެތުރީ އިންޑިއާ މީހުން: އިދިކޮޅު
އެހެން ޤައުމުތަކަށް ވަޒީފާއަށް ދިޔުމަށް އިންޑިއާ މީހުން ރާއްޖެ ކަރަންޓީނު މަރުކަޒެއްގެ ގޮތުގައި ބޭނުން ކުރަމުން ދާކަމަށް އިދިކޮޅު ކޯލިޝަނުން ވިދާޅުވެއްޖެއެވެ.
އިންޑިއާގައި ކޮވިޑް-19ގެ ހާލަތު މިވަގުތު ވަރަށް ގޯސްވެފައިވުމުން، އެ ޤައުމުގެ މީހުންނަށް، ސައުދީ އަރަބިއްޔާ އާއި ގަތަރާއި ޔޫއޭއީ ފަދަ ގައުމުތަކަށް ސީދާ ދިއުމުގެ ހުއްދައެއް ނޯވެއެވެ. އެ މީހުން އެ ގައުމުތަކަށް ދާން ޖެހެނީ 14 ދުވަހުގެ ކަރަންޓީނެއްގައި ތިބުމަށް ފަހު ކަމަށް ވާތީ އިންޑިއާގެ ގިނަ ބަޔަކު 14 ދުވަހުގެ ކަރަންޓީނުގެ މުއްދަތު ހަމަކުރަން ރާއްޖެ އާދެއެވެ.
އެކަމުގެ ކަންބޮޑުވުން ފާޅުކުރައްވަމުން އިދިކޮޅު ޕްރޮގްރެސިވް ކޯލިޝަނުން މިއަދު މެންދުރު ބޭއްވި ނޫސްވެރިންގެ ބައްދަލުވުމެއްގައި ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވީ އިންޑިއާ މީހުންގެ ކަރަންޓީނު "މަރުކަޒު" އަކަށް ރާއްޖެ ހެދުމަކީ ވަރަށް ކަންބޮޑުވާ ކަމެއް ކަމަށެވެ.
"ރާއްޖޭގެ ރައްޔިތުން ބޮޑު ބިރުވެރިކަމެއްގެ ތެރެއަށް ވައްޓާލަނީ އެހެން ބައެއްގެ ފައިދާއަށް ޓަކައި. އެހެންވީމަ މިކަމުގެ ކަންބޮޑުވުން އިންތިހާއަށް އެބަ އޮތް. އަދި މީގެ ނުރައްކާތެރިކަން ދިވެހި ރައްޔިތުންނަށް އެކި ގޮތްގޮތުން، އެކި ސިފަ ސިފައިގައި ފޯރަމުން އެބަދޭ" އަދުރޭ ވިދާޅުވިއެވެ.
އަދުރޭ ވިދާޅުވީ އިންޑިއާގައި ކޮވިޑްގެ އާ ވެރިއެންޓެއް ފެތުރެމުންދާ ދަނޑިވަޅެއްގައި އެ ގައުމުގެ ރައްޔިތުން ދުނިޔޭގެ އެހެން ގައުމުތަކަށް ވަޒީފާ އަދާކުރަން ދިއުމަށް، ކަރަންޓީނުގެ މަރުކަޒެއްގެ ގޮތުގައި ރާއްޖެ ބޭނުން ކުރުމުން ރަށްރަށުގައި ކޮވިޑް ފެތުރެން ފަށާފައިވާ ކަމަށެވެ.
Ads by STO
