ކޮވިޑް-19: މިއަދު ފައްސިވީ މީހުންގެ އަދަދު 250 އަށްވުރެ މަތި
ރާއްޖޭގައި ކޮވިޑް-19 އަށް ފައްސިވީ އަދަދުތައް މިއަދު 250އަށް ވުރެ މައްޗަށް އަރައިފިއެވެ.
އެޗްޕީއޭއިން ބުނެފައިވާ ގޮތުގައި މިއަދު ރާއްޖެއިން 253 މީހުން މި ބައްޔަށް ފައްސިވެފައި ވެއެވެ. އަދި 75 މީހުން މިއަދު ބަލިން ފަސޭހަ ވެފައިވާ ކަމަށް ވެސް އެޗްޕީއޭއިން ވަނީ ބުނެފައެވެ.
މިއަދު ރާއްޖެއިން ކޮވިޑަށް ފައްސި ވެފައި ވަނީ މާލެއިން 147 މީހުންނާއި، އަތޮޅުތަކުން 35 މީހުންނާއި، ހިންގަމުން އަންނަ ރިސޯޓުތަކުން 31 މީހުންނާއި އަދި އިންޑްސްޓްރިއަލް އައިލެންޑުން 40 މީހުންނެވެ.
މިހާރު ރާއްޖެއިން މި ބައްޔަށް ޖުމްލަ 27،874 މީހުން ފައްސި ވެފައިވެއެވެ.
ރާއްޖެއިން މިހާރު ކޮވިޑް ބަލިން ފަސޭހަ ވެފައި ވަނީ ޖުމްލަ 24،309 މީހުންނެވެ. އަދި މިހާތަނަށް މިބަލީގައި ރާއްޖެއިން 71 މީހުން ނިޔާވެފައި ވެއެވެ.
ކޮވިޑް-19 ފެތުރުން ކޮންޓްރޯލު ކުރުމަށް އެޗްޕީއޭއިން އަޅާފައިވާ ބައެއް ފިޔަވަޅުތައް މިހާރު ވަނީ އުވާލައިފައެވެ. އެގޮތުން އިރުއޮއްސި 6:00 އިން ފެށިގެން އަނެއް ދުވަހުގެ ހެނދުނު 6:00 އަށް މާލެ ސަރަޙައްދުގައި އެއްގަމު އުޅަނދު ދުއްވުން މަނާ ކުރި އެންގުން މިހާރު ވަނީ ބާތިލުކޮށްފައެވެ. އަދި ޕާކު ތަކާއި މައިޒާންތައް ވެސް ވަނީ އަލުން ހުޅުވައިފައެވެ. މީގެ އިތުރުން ރޭގަނޑު 11:00 އިން ފަތިހު 4:30 އަށް މާލެ ސަރަޙައްދުގައި ބޭރުގައި އުޅުން މަނާކުރި ކާފިއު ވެސް އެޗްޕީއޭއިން މިހާރު ވަނީ އުވައިލައިފައެވެ.
Ads by STO
