ރައީސް ޔާމީން ގޭ ބަންދަށް ބަދަލު ކުރަން ނިންމައިފި

ޖަލު ހުކުމެއް ފުރުއްވަމުން ގެންދަވާ ކުރީގެ ރައީސް، އަބްދުﷲ ޔާމީން އަބްދުލް ޤައްޔޫމް ގޭ ބަންދަށް ބަދަލު ކުރަން ނިންމައިފިއެވެ.

Ads by Hajj Corporation

މަޢުލޫމާތު ލިބިފައިވާ ގޮތުގައި ރައީސް ޔާމީން ގެއަށް ބަދަލު ކުރަން މިހާރު ވަނީ ނިންމާފައެވެ. ނަމަވެސް ގެއަށް ބަދަލު ކުރާނެ ވަގުތެއް އަދި އެނގިފައެއް ނުވެއެވެ. މައުލޫމާތު ލިބިފައިވާ ގޮތުގައި ރައީސް ޔާމީން ގެއަށް ބަދަލު ކުރަނީ 4 ހަފްތާގެ މުއްދަތަކަށެވެ.

ރައީސް ޔާމީން ގޭ ބަންދަށް ބަދަލު ކުރަން ނިންމާފައި ވަނީ އާއިލާއިން ހުށަހެޅި ކަންކަމަށް ރިއާޔަތް ކުރުމަށްފަހުގައި ކަމަށް މަޢުލޫމާތު ލިބެއެވެ. އާއިލާއިން އެ ހުށަހެޅުން ހުށަހަޅާފައި ވަނީ ރަމަޟާން މަހުގެ ކުރިންނެވެ.

މިކަމާ ގުޅޭ ގޮތުން ކަރެކްޝަންސް އިން މިހާތަނަށް ވަކި އެއްޗެއް ހާމަކޮށްފައެއް ނުވެއެވެ.

ރައީސް ޔާމީން ގޭ ބަންދަށް ބަދަލު ކުރަން ނިންމާފައި މިވަނީ، އިދިކޮޅު ފަރާތްތަކަށް ސަރުކާރަށް ޕްރެޝަރު ކުރަމުންދާ ދަނޑިވަޅެއްގައެވެ. ސަރުކާރަށް ލޯކަލް ކައުންސިލް އިންތިޚާބު ކާމިޔާބު ނުވުމާއެކު، އިދިކޮޅު ފަރާތްތަކުން ރައީސް ޔާމީން ދޫކޮށްލަން ކުރަމުންދާ ޕްރެޝަރުތައް ވަނީ އިތުރުކޮށްފައެވެ.

މަނީ ލޯންޑަރިންގގެ ކުށް ސާބިތުވާ ކަމަށް ކަނޑައަޅުއްވައި ޖަލު ހުކުމެއް ފުރުއްވަމުން ގެންދަވާ، ރައީސް ޔާމީން ގެޔަށް ބަދަލު ކުރަން ނިންމާފައިވާއިރު، އެމަނިކުފާނު ވަނީ ޖަލުގައި 508 ދުވަސް ހޭދަ ކުރައްވާފައެވެ. ރައީސް ޔާމީންގެ ޝަރީއަތް ހިނގައިދިޔަ ގޮތުން އެ މަނިކުފާނުގެ ވަކީލުންނާއި އިދިކޮޅުން ވަނީ ގިނަ ކަންބޮޑުވުންތަކެއް ފާޅު ކޮށްފައެވެ.