ރައީސް ޔާމީން މާލެ ގެނެސްފި
މަނީ ލޯންޑަރިންގެ ކުށުގައި ޖަލު ހުކުމެއް ތަންފީޒް ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަބްދުއްޤައްޔޫމް ގޭ ބަންދަށް ބަދަލު ކުރަން މިރޭ މާލެ ގެންނަ ކަމަށް މަޢުލޫމާތު ލިބިއްޖެއެވެ.
މައުލޫމާތު ލިބިފައިވާ ގޮތުގައި ރައީސް ޔާމީން ގެޔަށް ބަދަލު ކުރުމަށް ނިންމާފައިވަނީ 1 މަސް ދުވަހުގެ މުއްދަތަށެވެ.
ރައީސް ޔާމީން ގެޔަށް ބަދަލު ކުރަން ސަރުކާރުން ނިންމާފައި މިވަނީ، އެމަނިކުފާނު ގެޔަށް ބަދަލު ކުރުމަށް ގޮވާލާ އިދިކޮޅު ފަރާތްތަކުން މާލޭގައި ސިލްސިލާކޮށް މުޒާހަރާ ކުރަމުންދާ ދަނޑިވަޅެއްގައެވެ.
ރައީސް ޔާމީން ގޭ ބަންދަށް ބަދަލު ކުރަން ނިންމާފައި ވަނީ އާއިލާއިން ހުށަހެޅި ކަންކަމަށް ރިއާޔަތް ކުރުމަށްފަހުގައި ކަމަށް މަޢުލޫމާތު ލިބެއެވެ. އާއިލާއިން އެ ހުށަހެޅުން ހުށަހަޅާފައި ވަނީ ރަމަޟާން މަހުގެ ކުރިންނެވެ.
މަނީ ލޯންޑަރިންގގެ ކުށް ސާބިތުވާ ކަމަށް ކަނޑައަޅުއްވައި ޖަލު ހުކުމެއް ފުރުއްވަމުން ގެންދަވާ، ރައީސް ޔާމީން ގެޔަށް ބަދަލު ކުރަން ނިންމާފައިވާއިރު، އެމަނިކުފާނު ވަނީ ޖަލުގައި 508 ދުވަސް ހޭދަ ކުރައްވާފައެވެ. ރައީސް ޔާމީންގެ ޝަރީއަތް ހިނގައިދިޔަ ގޮތުން އެ މަނިކުފާނުގެ ވަކީލުންނާއި އިދިކޮޅުން ވަނީ ގިނަ ކަންބޮޑުވުންތަކެއް ފާޅު ކޮށްފައެވެ.
