ޒަކަރިއްޔާގެ ސުވާލު ރައްޔިތުންނަށް: ބޮން ހަދައި ގޮއްވައިލިއިރު ރައްޔިތުންނަށް ހަމަ ހިލަމެއް ވެސް ނުވޭތޯ؟

ހުކުރު ވިލޭރޭ ރައީސް ނަޝީދަށް ދިން ހަމަލާއާ ގުޅިގެން އެކަމާ ގުޅޭ ގޮތުން ރައްޔިތުންނަށް ތެރެއިން ބަޔަކަށް ހިލަމެއް ނުވޭތޯ ވިދާޅުވެ ނޭޝަނަލް ކައުންޓަރ ޓެރަރިޒަމް ސެންޓަރުގެ ޑައިރެކްޓަރ ޖެނެރަލް ބްރިގޭޑިއަރ ޖެނެރަލް ޒަކަރިއްޔާ މަންސޫރު ސުވާލު އުފައްދަވައިފިއެވެ.

Ads by STELCO

ރޭ މޯލްޑިވްސް ނޭޝަނަލް ޑިފެންސްފޯސްއިން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން މަންސޫރު ވިދާޅުވީ، ހަމަލާއާ ގުޅިގެން އެކަކު އަނެކަކަށް ބްލޭމް ކުރުމުގެ ފައިދާއެއް ނެތް ކަމަށެވެ. އަދި އައިއީޑީ ޑިވައިސެއް ހަދައި އެ ޑިވައިސް ތަނެއްގައި ބައިންދާ މިހުރިހާ ކަމެއް ކުރިއިރު ރައްޔިތުންނަށް ހިލަމެއް ނުވޭތޯ ޒަކަރިއްޔާ މަންސޫރު ސުވާލު އުފެއްދެވިއެވެ.

"އަޅުގަނޑު ހިތަށް އަރާ މިފަދަ ޑިވައިސެއް ހަދާ، އައިއީޑީއެއް ހަދާ، ތަނެއްގައި ބައިންދާ މިހުރިހާ ކަމެއް ކުރިއިރު ހަމަ އެއްވެސް އާއްމު ރައްޔިތަކަށް ނުވަތަ ބޭފުޅަކަށް ހިލަމެއް ނުވަތަ ހުވަމެއް ވެސް ނުވޭބާއޭ" ޒަކައްރިޔާ މަންސޫރު ވިދާޅުވިއެވެ.

މިމައްސަލައިގެ ތަޙްޤީޤް މިހާރު ކުރިޔަށްދާކަމަށް އިޝާރާތް ކުރައްވަމުން މަންސޫރު ވިދާޅުވީ، ކިރިޔާވެސް ޝައްކެތް ވެސް ވާ ގޮތަށް މީހެއްގެ ހަރަކާތެއް ހުއްޓަސް، ފުލުހުންނަށް ނުވަތަ ކައުންޓަރ ޓެރެރިޒަމްގެ ހޮޓްލައިންނަށް ގުޅުއްވަން ރައްޔިތުންގެ ކިބައިން އެދޭ ކަމަށެވެ. އަދި ހަމަލާދިން ފަރާތްތައް ހިފާ ހައްޔަރު ކުރާނެ ކަމުގެ އިންޒާރު ވެސް ވަނީ ދެއްވައިފައެވެ.

"ނުފެނި ފިލައިގެން މާގިނަ ދުވަަހަކު ނުތިބެވޭނެ ކަންނޭނގޭ އެއްވެސް ބަޔަކަށް" ޒަކަރިއްޔާ މަންސޫރު ވިދާޅުވިއެވެ.

މިކަމުގެ އިންޓެލިޖެންސް މަޢުލޫމާތު އެމްއެންޑީއެފަށް ލިބިފައިވޭތޯ ނޫސްވެރިޔަކު ކުރި ސުވާލަކަށް ޖަވާބު ދެއްވަމުން މަންސޫރު ވިދާޅުވީ އެފަދަ މަޢުލޫމާތެއް ލިބިފައިނުވާ ކަމަށާއި ލިބުނު ނަމަ އެ ނުރައްކާތެރިކަމަށް އެއްވެސް ބަޔަކު ހުށަނާޅާނެ ކަމަށެވެ.

ރައީސް ނަޝީދަށް އަމާޒުކޮށް ދިން މިހަމަލާގެ އިންޓެލިޖެންސް މަޢުލޫމާތު ފުލުހުން އަދި އެމްއެންޑީއެފަށް ނުލިބުމާ ގުޅިގެން ގިނަ ބަޔެއްގެ ފާޑު ކިޔުން އެ މުއައްސަތާތަކަށް އަމާޒުވެފައިވާކަން ފާހަގަކޮށްލެވެއެވެ.