އާ ވޭރިއަންޓެއް އުޅޭ ކަމަށް ބެލެވޭ، ކޮން ކަހަލަ ވޭރިއަންޓެއްކަމެއް އަދި ނޭނގޭ: ޑރ. ޝަހީދު

ރާއްޖޭގައި ކޮވިޑް-19 ގެ އާ ވޭރިއަންޓެއް އުޅޭ ކަމަށް ބެލެވޭ ކަމަށާއި ނަމަވެސް އެއީ ކޮން ވޭރިއަންޓެއްކަން އަދި އެނގިފައި ނުވާ ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)ގެ ޓެގް ޓީމުގައި ހިމެނި ވަޑައިގަންނަވާ އައިޖީއެމްއެޗްގެ ޑޮކްޓަރ، ޑރ. އަހުމަދު ޝަހީދު ވިދާޅުވެއްޖެއެވެ.

Ads by STELCO

މިރޭ ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ސުވާލު ކޮށްފައި ވަނީ، ރާއްޖޭގައި ކޮވިޑްގެ އާ ވޭރިއަންޓެއް އުޅޭ ކަމަށް ރޭގައި ޑރ. މުޙައްމަދު ޢަލީ ވެސް ވިދާޅުވެފައިވާ ކަމަށާއި އެފަދަ އާ ވެރިއަންޓެއް އުޅޭތޯއެވެ.

އެ ސުވާލަށް ޖަވާބު ދެއްވަމުން ޑރ. ޝަހީދު ވިދާޅުވީ، ތަފްސީލުތަކަށް ބަލާއިރު ބޮޑަށް ބެލެވެނީ ރާއްޖޭގައި ވެސް މިހާރު ކޮވިޑް-19 ގެ އާ ވޭރިއަންޓެއް އުޅޭ ކަމަށެވެ. ނަމަވެސް އެއީ ކޮން ހިސާބަކުން އައިސްފައިވާ ކޮން ކަހަލަ ވޭރިއަންޓެއްކަން އަދި އެނގިފައި ނުވާ ކަމަށް ވެސް ޑރ. ޝަހީދު ވިދާލުވިއެވެ.

"އެ ކަންކަން ބަލާ ޔަގީންކަން ދޭނީ ދުނިޔޭގެ ސިއްޙަތު ޖަމިއްޔާއާ ގުޅިގެން. އަޅުގަނޑުމެންނަކަށް އަދި ނޭނގެ ބުނާކަށް މިއީ އިންޑިއާ ވޭރިއަންޓް ކަމެއް ނުވަނަ އިނގިރޭސިވިލާތު ވޭރިއަންޓުކަމެއް. ނަމަވެސް އެކަން ހޯދުމުގެ މަސައްކަތްތައް މިހާރު ކުރެވެމުން ދަނީ" ޑރ. ޝަހީދު ވިދާޅުވިއެވެ.

ރާއްޖޭގައި އަނެއްކާ ވެސް އައިސް ކޮވިޑް-19 އަށް ފައްސިވާ މީހުންގެ އަދަދުތައް އަންނަނީ އިތުރުވަމުންނެވެ. އެގޮތުން މިއަދު ވެސް 590 މީހުން ފައްސިވެފައި ވެއެވެ.