ކޮވިޑް-19: ސާމްޕަލްގެ ނަތީޖާ އެސްއެމްއެސް މެދުވެރިކޮށް ބެލޭނެ ގޮތް ހަދައިފި

ކޮވިޑް-19 އަށް ޓެސްޓު ކުރުމަށް ނަގާ ސާމްޕަލްގެ ނަތީޖާ، އެސްއެމްއެސް މެދުވެރިކޮށް ބެލޭނެ ގޮތް ހަދައިފިއެވެ.

Ads by Hajj Corporation

ސާމްޕަލްތަކުގެ ނަތީޖާ އެސްއެމްއެސް މެދުވެރިކޮށް ލިބޭގޮތް ހަދައިފައި މި ވަނީ، ސާމްޕަލްތަކުގެ ނަތީޖާ ލިބުން ލަސްވުމާ މެދު ކަންބޮޑުވުންތަކެއް އާންމުން ފާޅުކުރަމުންދާ ދަނޑިވަޅެއްގައެވެ.

ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން މިރޭ ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މަބްރޫކް ޢަބްދުލްޢަޒީޒް ވިދާޅުވީ ނެގޭ ސާމްޕަލްތައް އަވަހަށް ޕްރޮސެސްކޮށް ނަތީޖާ ފޯރުކޮށް ދިނުމަށް ގިނަ މަސައްކަތްތަކެއް ކުރަމުންދާ ކަމަށެވެ.އެގޮތުން ސާމްޕަލްތަކުގެ ނަތީޖާ އެސްއެމްއެސް މެދުވެރިކޮށް ބެލޭނެ އިންތިޒާމު މިހާރު ހަމަޖައްސާފައިވާ ކަމަށާއި އެކަމުގެ ސަބަބުން ނަތީޖާ ލިބުން އަވަސްވުމަށް ވަރަށް ބޮޑު ފަސޭހައަކަށް ވާނެ ކަމަށް ވެސް މަބްރޫކް ވިދާޅުވިއެވެ.

މިރޭގެ ބައްދަލުވުމުގައި މަބްރޫކް އިތުރަށް ވިދާޅުވީ އެސްއެމްއެސް މެދުވެރިކޮށް ލިންކު ލިބުމުން ސާމްޕަލް ނެގި ތާރީހާއި އައިޑީކާޑު ނަންބަރު ޖެހުމުން ލިންކު މެދުވެރިކޮށް ސާމްޕަލް ފައްސި ވިޔަސް އަދި ނައްސި ވިޔަސް އެކަން އެނގޭނެ ކަމަށާއި އެޗްޕީއޭއިން ފޮނުވާ މެސެޖްގައި ސާމްޕަލް ނެގި ތާރީހު ވެސް ލިޔެފައިވާނެ ކަމަށެވެ.

ކޮވިޑް-19 ގެ އަލާމާތްތައް ހުރެ، ސާމްޕަލް ނެގުމަށް ފަހު ވެސް ނަތީޖާ ނުލިބި ލަސްވާކަމީ ގިނަ ބަޔަކު ނުރުހުން ފާޅު ކުރަމުން އަންނަ ކަމެކެވެ.