ކޮންޓެކްޓް ޓްރޭސިންގެ އުސޫލު ބަދަލުކޮށްފި، މިހާރު ބަލަނީ ހައިރިސްކު މީހުން އެކަނި
ކޮވިޑް-19އަށް ފައްސި ވާ މީހުންގެ އަދަދުތައް އިތުރުވެ، ކޮންޓެކްޓް ވަމުންދާ މީހުން ވެސް އިތުރު ވަމުންދާތީ ހަމައެކަނި ހައި ރިސްކް މީހުންގެ ކޮންޓެކްޓް ޓްރޭސިން ހަދާގޮތަށް ނިންމައިފިއެވެ.
ހެލްތު ޕްރޮޓެކްޝަން އޭޖެންސީ (އެޗްއީއޯސީ) އިން މިރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ކޮންޓެކްޓް ޓްރޭސިން ޓީމުގެ ފަރާތުން ބައިވެރިވެވަޑައިގެންނެވި އާމިނަތު އަރޫޝާ ވިދާޅުވީ އުސޫލަށް ބަދަލު ގެނައީ ހައި ރިސްކް މީހުން އަވަހަށް ދެނެގަނެ، އެމީހުންނަށް ބޭނުންވާ ހިދުމަތްތައް އަވަހަށް ފޯރުކޮށްދިނުމަށް ކަމަށެވެ.
އެގޮތުން ހުރިހާ ކޮންޓެކްޓުން ދެނެގަތުމަށް ގިނަ ވަގުތު ނަގާތީއާއި، ހައި ރިސްކް މީހުން ދެނެގަނެ އެމީހުންނަށް ހިދުމަތްތައް ފޯރުކޮށްދޭން ލަސްވާ ކަމަށް ވެސް އަރޫޝާ ވިދާޅުވިއެވެ. އަދި މި ގޮތަށް އަމަލު ކުރަމުން ދާނީ ހަމަ އެކަނި މާލޭގައި ކަމަށް ވެސް އަރޫޝާ ވިދާޅުވި އެވެ.
މީގެ ކުރީން ކޮންޓްރެކްޓް ޓްރޭސިން ހަދަމުން އަދި ފައްސިވީ މީހަކާ އެއްތާވި އެންމެން ހިމެނޭ ގޮތަށެވެ. ނަމަވެސް ފައްސި އަދަަދުތައް އިތުރުވަމުންދާތީ އެގޮތަށް އެކަން ކުރުން ވަނީ ވަރަށް ބޮޑު ގޮން ޖެހުމަކަށް ވެފައެވެ.
ރާއްޖޭގައި ކޮވިޑް-19 އަށް ފައްސިވީ މީހުންގެ ޖުމްލަ އަދަދު މިހާރު ވަނީ 50،802 އަށް އަރާފައެވެ. އަދި މިހާތަނަށް މި ބަލިން 30،403 މީހުން ފަސޭހަ ވެފައިވާ ކަމަށާއި 115 މީހުން ނިޔާވެފައިވާ ކަމަށް އެޗްޕީއޭގެ ތަފާސް ހިސާބުތަކުން ދައްކައެވެ.
މާލޭގަ އާއި އެހެން ރަށްތަކުގައި ޖަމާއަތުގައި ނަމާދު ކުރުން ހުއްޓާލި ފަހުން ކޮވިޑް ޖެހޭ މީހުންނާއި މަރުވާ މީހުން މާގިނަ، ޖަމާއަތުގައި ނަމާދު ކުރި ދުވަސްތަކުގައި ކޮވިޑް ޖެހި މަރުވި މީހުނަށްވުރެން !