މިޝްކާގެ މަރު: އެތައް ގަޑިއިރެއް ވީ އިރު ވެސް ރެސްޕޯންސް ޓީމުން އަޅައިނުލި!

ކޮވިޑް-19ގައި ނިޔާވި އުމުރުން 10 އަހަރުގެ ފާތިމަތު މިޝްކާ މުހައްމަދުގެ ހާލު ދެރަވާން ފެށުމުން ފަރުވާއަށް އެދި 31 މެއިގެ މެންދުރުގެ ވަގުތުގައި ވެސް ހެލްތު ޕްރޮޓެކްޝަން އޭޖެންސީ (އެޗްޕީއޭ)އަށް އަންގައިފައިވާ ކަން "ދެން"އަށް ކަށަވަރު ވެއްޖެއެވެ.

Ads by STELCO

އިމަޖެންސީ މެޑިކަލް ސަރވިސް (އީއެމްއެސް)ގެ މުވައްޒަފަކު "ދެން"އަށް ކަށަވަރު ކޮށްދީފައިވާ ގޮތުގައި އެ ދުވަހުގެ މެންދުރު 14:24ގައި އެޗްޕީއޭއަށް މިޝްކާގެ އާއިލާއިން ގުޅާފައިވަނީ އޭނާގެ ހުންގަދަވެ، ކާއެއްޗެއް ނުކެވި ވަރުބަލިކަން އިހުސާސް ކުރެވޭތީއެވެ. އަދި އެވަގުތު ގުޅައިފައި މިޝްކާ ކެއްސާ ވާހަކަވެސް ބުނިކަން ވަނީ ކަށަވަރު ވެފައެވެ.

މެންދުރު އަޅައެއް ނުލާ، ރޭގަނޑު ވެސް ގުޅި

މިޝްކާގެ ހާލަތު ގޯސްވެގެން މެންދުރު އެޗްޕީއޭއަށް މައުލޫމާތު ހިއްސާ ކޮށްފައިވީ ނަމަވެސް އެޗްޕީއޭއިން އެކަމަށް އެއްވެސް ގޮތަކަށް "ރެސްޕޯންސް" ކޮށްފައެއް ނުވެއެވެ. އަދި އެ މައުލޫމާތު އެމްބިއުލޭންސްއަށް ވެސް ހިއްސާ ނުކުރާކަމަށް ނަން ނުޖެހުމަށް ޝަރުތުކޮށް އެތަނުގައި މަސައްކަތް ކުރާ މުވައްޒަަފަކު "ދެން"އަށް ކިޔައިދިނެވެ.

މިޝްކާގެ ހާލަތު މާބޮޑަށް ގޯސްވެ ނޭފަތުން ލޭއައުމުން އެރޭ ވެސް ވަރަށް ގިނައިން އެޗްޕީއޭއަށް ވަނީ ގުޅައިފައެވެ. އެގޮތުން އެޗްޕީއޭގެ ކޯލް ލޮގުތަކުން ދައްކާ ގޮތުގައި އެންމެ ފުރަތަމަ މިޝްކާގެ އާއިލާއިން އެޗްޕީއޭއަށް ގުޅައިފައި ވަނީ އެރޭގެ 09:10ގައެވެ. އަދި އޭގެ ފަހުން 10:06ގައި ގުޅާފައިވާއިރު 10:26 އަދި 11:18ގައި ވެސް މިޝްކާގެ އާއިލާއިން ވަނީ އެޗްޕީއޭއަށް ގުޅައިފައެވެ. އަދި އެންމެ ފަހުން މިޝްކާގެ އާއިލާއިން އެޗްޕީއޭއަށް ގުޅައިފައި ވަނީ 11:26ގައެވެ.

"ފަސްވަނަ ފަހަރު ގުޅީމަ އެމްއެމްއާރުޓީ ޓީމުން އެޓެންޑުވެފަ އިނީ" "ދެން"އާ ވާހަކަ ދައްކަމުން އޭނާ ކިޔައިދިނެވެ.

އީއެމްއެސްއަށް ޚަބަރު ލިބުނީ 11:32ގައި

އެޗްއޯއީސީގެ އިމަރޖެންސީ މެޑިކަލް ސަރވިސް ޓީމަށް މިޝްކާގެ ކޭސްގެ މައުލޫމާތު ލިބުނީ އެރޭގެ 11:32 އެހާއިރުއެވެ. އަދި އެވަގުތުން ފަށައިގެން އެ ޓީމުން ވަނީ އެމްބިއުލާންސް ފޮނުވުމުގެ މަސައްކަތް ފަށައިފައެވެ.

"މައްސަލައަކީ އެޗްޕީއޭއިން ވެސް އެމްބިއުލޭންސްއޭ ކިޔާފަ ބޮލުން ކަޓުވާލުން، އެމްއެމްއާރުޓީން އީއެމްއެސްއަށް އިންފޯމް ކުރި އިރު ވެސް ނުބުނޭ (މިޝްކާގެ) މޫވްމެންޓެއް ނެތް ވާހަކައެއް، ބުނީ ނޭވާލާން އުނދަގޫ ވާ ވާހަކަ" ކަން ހިނގައިދިޔަ ގޮތް އޭނާ "ދެން"އާ ހިއްސާ ކުރިއެވެ.

އެމްބިއުލޭންސް އެޓެންޑު ކުރީ 11:41ގައި، އޭރު މިޝްކާގެ އެއްވެސް މޫވްމެންޓެއް ނެތް!

މިޝްކާ ދިރިއުޅޭ ގެ މ.ނެއްލައިދޫގެއަށް އެމްބިއުލޭންސް ޓީމުން ދިޔައީ އެ ރޭ 11:41ގައެވެ. އެމީހުންނަށް މައުލޫމާތު ދިންތާ 9 މިނެޓް ތެރޭގައެވެ. އޭރު މިޝްކާގެ އާއިލާ މީހުން އޭނާ އަތްދަނޑިމައްޗަށް ލައިގެން ނުކުމެ ތިބިކަމަށް އެމްބިއުލޭންސްގައި އުޅުނު މުވައްޒަފުންނާ ހަވާލާދީ އޭނާ ކިޔައިދިނެވެ.

މިޝްކާ އެވަގުތު ގެންދިޔައީ އައޖީއެމްއެޗް އިމަރޖެންސީ ރެސްޕޮންސް (އީއާރު)އަށެވެ. އަދި އެ ވަގުތު އެތަނުގައި މިޝްކާއަށް ސީޕީއާރު ދެވުނެވެ. ނަމަވެސް މިޝްކާގެ ހާލަތު ރަނގަޅު ނުވުމުން އޭނާ ވެންޓިލޭޓަރަށް ލެވުނެވެ.

މައުލޫމާތު ލިބޭ ގޮތުގައި މިޝްކާގެ ހަރަކާތް ހުއްޓުނީ އޭނާއަށް ހާރޓްއެޓޭކެއް ޖެހިގެންނެވެ. އަދި ސީޕީއާރު ދީގެން ވެސް މިޝްކާ ރަނގަޅު ވާ ގޮތް ނުވުމުން މިޝްކާ ވެންޓިލޭޓަރަށް ބަދަލު ކުރެވުނެވެ. އަދި އޭނާގެ ސިކުނޑި މަރުވީ ވެންޓިލޭޓަރުގައި އޮއްވާއެވެ.

ކޮވިޑް-19ގައި ރާއްޖޭގެ އެންމެ ހަގު މަރު، މުޅި ގައުމު ރޮއްވައިފި

ވެންޓިލޭޓަރުގައި ފަރުވާދެނިކޮށް މިޝްކާ ނިޔާވީ ރޭ މެންދަމު 12:10 ހާއިރުއެވެ. އޭނާގެ މަރާއެކު ދިވެހި ރައްޔިތުންނަށް ލިބުނީ ކުއްލި ސިހުމެކެވެ. އޭނާއަކީ ކޮވިޑް-19ގައި ރާއްޖެއިން މި ދުނިޔެ ދޫކުރި އެންމެ ހަގު ކުއްޖާއެވެ. އަށާރަ އަހަރުން ދަށުގެ އެންމެ ފުރަތަމަ ފުރާނައެވެ.

މިޝްކާގެ މަރުގައި، ފަރުދާގެ ފުރަގަހުގައި ފޮރުވިފައި އެތައް ވާހަކަތަކެއް އެބަހުއްޓެވެ. އެތަކެއް އިހުމާލުތަކެއް އެބަހުއްޓެވެ. އޮތީ އެންމެ ސުވާލެކެވެ. ތުއްތު، މައުސޫމު މިޝްކާގެ މަރުގެ ޒިންމާ ނަގާނީ ކާކު ހެއްޔެވެ؟އިންސާފު ލިބޭނެ ހެއްޔެވެ؟