ދައުރުވަމުން ދަނީ ސައްހަ ފޮޓޯތަކެއް ނޫން، ޖަލުގައި ޓޭޒަރު ބޭނުމެއް ނުކުރަން: ކަރެކްޝަންސް
މާފުށީ ޖަލުގައި ސަލާމަތީ ބާރުތަކުން ހިންގަމުންދާ ޚާއްސަ އޮޕަރޭޝަނާ ގުޅިގެން މީސް މީޑިއާގައި ދައުރު ވަމުން ދަނީ ސައްޙަ ފޮޓޯތަކެއް ނޫން ކަމަށާއި އެ އޮޕަރޭޝަންގައި ޓޭޒަރު ބޭނުން ނުކުރާ ކަމަށް މޯލްޑިވްސް ކަރެކްޝަނަލް ސާވިސަސްއިން ވިދާޅުވެއްޖެއެވެ.
ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް މުޙައްމަދު ނަޝީދުއަށް ދިން ނިރުބަވެރި ހަމަލާއާއި ހަރުކަށި ފިކުރާއި ދެކޮޅަށް ފުލުހުންނާއި ސިފައިން އަދި ކަރެކްޝަންސްއިން މިއަދު ފަތިހު 5:30 އިން ފެށިގެން ދަނީ މާލެ ޖަލާއި މާފުށީ ޖަލުގައި ޚާއްސަ އޮޕަރޭޝަނެއް ހިންގަމުންނެވެ.
"ދެން" އަށް މައުލޫމާތު ދެއްވަމުން ކަރެކްޝަންސްގެ މީޑިއާ އޮފިޝަލު ޔުސްރީން އަހުމަދު ވިދާޅުވީ ޖަލުތަކުގައި ހިންގަމުން އަންނަ އޮޕަރޭޝަނާ ގުޅިގެން ދައުރުވަމުން އަންނަ ފޮޓޯތަކަކީ ސައްޙަ ފޮޓޯތަކެއް ނޫން ކަމަށެވެ.
"ސައްޙަ ފޮޓޯތަކެއް ނޫން ދައުރުވަމުން އަންނަނީ. މި އޮޕަރޭޝަންގައި ޓޭޒަރު ބޭނުމެއް ނުކުރާނެ" ޔުސްރީން ވިދާޅުވިއެވެ.
ތިން މުއައްސަސާ ގުޅިގެން ހިންގާ މި އޮޕަރޭޝަންގައި، މާފުށީ ޖަލުގައި ހަމަނުޖެހުން ހިންގާ، ފަސް މީހެއްގެ ބޯ ފަޅައިގެން ގޮސްފައިވާ ކަމަށާއި މި އޮޕަރޭޝަންގައި ޓޭޒަރު ބޭނުން ކުރި ކަމަށް ވެސް ބުނެ މީސްމީޑިއާގައި ވަނީ ފޮޓޯތަކަކާއި ވީޑިއޯއެއް ވެސް އާންމު ވެފައެވެ.
ޓޭޒަރު ބޭނުން ކުރާ ކަމަށް ދެކެވޭ ވާހަކަތަށް ދޮގު ކުރި ނަމަވެސް، މިއީ އަދިވެސް ކުރިއަށްދާ އޮޕަރޭޝަނެއްކަމަށް ވާތީ ކަރެކްޝަންސް އިން އިތުރު މައުލޫމާތެއް ނުދެއްވައެވެ.
Ads by STO
