އަލަތު ދަރިފުޅު ލިބުނުތާ ދެ ހަފްތާ ފަހުން ކޮވިޑް-19 ޖެހިގެން މަންމަ ނިޔާވީ އުމުރުން 25 އަހަރުގައި

އަލަތު ދަރިފުޅު ލިބުނުތާ އެންމެ ދެ ހަފްތާ ފަހުން އުމުރުން އެންމެ 25 އަހަރުގެ ޒުވާން މަންމައަކު ނިޔާވެއްޖެއެވެ.

Ads by STELCO

"ދެން" އަށް އެނގިފައިވާ ގޮތުގައި ނިޔާވެފައި ވަނީ ފ. ނިލަންދުއަށް އުފަން ސަމީއާ އަހުމަދުއެވެ. އޭނާ ކޮވިޑަށް ފައްސިވީ ރަށުގައި ހުއްޓައި ކަމަށް ވެސް އެނގިފައިވެއެވެ. ރަށުގައި ހުއްޓާ ހާލު ސީރިއަސް ވެގެން މާލެ ގެނައީ މިދިޔަ މަހުގެ 27 ވަނަ ދުވަހުގައެވެ.

ސަމީއާ ކޮވިޑް-19އަށް ފައްސިވުމުން އެންމެ ފުރަތަމަ ފަރުވާ ދިނީ ފަރުކޮޅުފުށި ފެސިލިޓީގައި ކަމަށް ވެސް "ދެން" އަށް މައުލޫމާތު ލިބިފައިވެއެވެ. އެއަށް ފަހު އިތުރު ފަރުވާއަށް ދަރުމަވަންތައަށް ގެންދިޔަ ކަމަށާއި ބަނޑަށް އަށް މަހުގައި ސިޒޭރިއަން ހަދައިގެން ދަރިފުޅު ނަގަން ޖެހުނީ ކަމަށް އެ ރަށު މީހަކު "ދެން" އަށް މައުލޫމާތު ދެމުން ބުންޏެވެ.

"27 މެއި ގައި މާލެ ގެނައީ، އެއިރު ވެސް ހާލު ސީރިއަސް. 28 ވަނަ ދުވަހު ސިޒޭރިއަން ހަދައިގެން ދަރިފުޅު ނެގީ. ފިރިހެން ކުއްޖެއް ލިބުނީ. ދަރިފުޅު ކޮވިޑަށް ނައްސި" މައުލޫމާތު ދިން މީހާ ބުންޏެވެ.

ކޮވިޑް-19 އަށް ފައްސި ވުމުގެ ކުރިން، ސަމީއާއަކީ ސިއްޙަތު ރަނގަޅު މީހެއް ކަމަށާއި ސިއްޙީ ގޮތުން މައްސަލަތަކެއް ކުރިމަތިވިކަން އެނގިފައި ނުވާ ކަމަށް ވެސް އޭނާ ބުންޏެވެ.

މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވަވައި ފާފަ ފުއްސަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މިހިތްދަތި ވަގުތުގައިގައި ޢާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِ رَاجِعُون