"ސީތާގެ ރޯލު ކަރީނާއަށް ހުށައެޅުުމާއެކު، ޓްވިޓާގައި ކަރީނާ "ނޮޅައި ކުދި ކުރަނީ
ހިންދޫންގެ ކަލާނގެ ރަަމަޔާންގެ އަނބިމީހާކަމަށް އެމީހުން ގަބޫލު ކުރާ "ސީތާ"ގެ ރޯލު ކަރީނާ ކަޕޫރު ޚާނަަށް ދިނުމާއެކު ޓްވިޓާގައި އެކަމާ ދެކޮޅަށް ބޮޑު ކެމްޕޭނެއް ފަށައި ކަރީނާ ބޮއިކޮޓް ކުރަން ގޮވަންފަށައިފިއެވެ.
ރިޕޯޓްތައް ބުނާގޮތުގައި ރަމަޔާންގެ ހަޔާތަށް ބިނާކޮށް ހަދަން ނިންމައިފައިވާ ފިލްމުގައި "ސީތާ" ގެ ރޯލު ކުޅެންދޭން ކަރީނާ އެއްބަސްވެފައި ވަނީ 12 ކުރޯޑް ރުޕީސްއަށެވެ. އެހެން ނަމަވެސް އެކަމާ ދެކޮޅަށް ގިނަ ބަޔަކު ދަނީ ސޯޝަލް މީޑިޔާގައި، ހާއްސަކޮށް ޓްވިޓާގައި އަޑު އުފުލަމުންނެވެ. ގިނަބަޔަކު ބުނާ ގޮތުގައި މުސްލިމަކާ ކައިވެނިކޮށްގެން ހުރެ، "ސީތާ"ގެ ރޯލު ކަރީނާއަށް އަދާ ކުރެވޭނެ ގޮތެއް ނޯންނާނެއެވެ. އަދި ތައިމޫރުގެ މަންމައަށްވެ ހުރެ ކަރީނާ އެރޯލު އަދާ ކުރުމަކީ ހިނދޫންގެ ކަލާނގެއަށް ކުރާ ފުރައްސާރައެއް ކަމަށްވެސް ގިނަ ބަޔަކު ދަނީ ބުނަމުންނެވެ. މީގެ އިތުރުން އެ ރޯލު ކުޅެން ކަރީނާ އެހާ ބޮޑު އަގެއް ކިޔުމަކީ ވެސް ގިނަބައެއް ފާޑު ކިޔުން އަމާޒުވެފައިވާކަމެކެވެ.
ފާޑުކިޔާ މީހުން ބުނަމުންދަނީ “ސީތާ”ގެ ރޯލަށް ކަރީނާއަށްވުރެ ކަންގަނާ ވެސް ރަނގަޅުވާނެކަމަށެވެ. އަދި ޔަމީ ގޯތަމްއަށް އެ ރޯލު ހުށައެޅި ނަމަވެސް މާ ރަނގަޅުވީސް ކަމަށް ވެސް އެއްބަޔަކު ދަނީ ބުނަމުންނެވެ. އެހެން ނަމަވެސް މިހާތަނަށް ފިލްމްގެ ޓީމުން ފިލްމްގެ ކާސްޓަށް ބަދަލެއް ގެންނަން އުޅޭކަމުގެ އިޝާރާތެއްވެސް ދީފަައެއް ނުވެއެވެ.
ހިންދޫންގެ ކަލާނގެތަކަށާއި އެމީހުންގެ އިހްތިރާމް ލިބިފައިވާ ޝަހްސިއްޔަތުތަކަށް ފިލްމް ހެދުމަކީ ސޯޝަލް މީޑިޔާގައި ގިނަ ފާޑުކިޔުންތަކެއް އަމާޒުވެ ތަރިންނަށް ފުރައްސާރައާއި އިންޒާރުތައް ލިބެމުންދާ ކަމެއް ނަމަވެސް އެފަދަ ފިލްމްތަައް ހެދުމަކީ ބޮލީވުޑްގައި އާއްމުކަމެކެވެ. މިގޮތުން ދިޕިކާގެ “ޕަދުމަވަތީ”އަކީ ވެސް ފާހަގަކޮށްލެވުނު ފިލްމެކެވެ. އެ ފަހަރު ފިލްމްގެ ޑައިރެކްޓަރ ސަންޖޭ ލީލާ ބާންސާލީއާއި ދީޕިކާގެ ބޯ ކަނޑާލައިގެން ގެންދިޔަ މީހަކަށް ބޮޑެތި ފައިސާގެ އިނާމު ވެސް ހުށައަޅައިފައި ވެއެވެ.
