ޗައިނާގައި ދުވާލެއްގެ މައްޗަށް 17.3 މިލިޔަން މީހުންނަށް ވެކްސިން ޖަހައި

ޗައިނާގައި ކޮވިޑް-19 ވެކްސިން ދެމުން އަންނަ ރޭޓް މަތިކޮށް، ދުވާލެއްގެ މައްޗަށް 17.3 މިލިޔަން މީހުންނަށް ވެކްސިން ދޭން ފަށައިފިއެވެ.

Ads by Sosun Fihaara

1.39 ބިލިޔަން މީހުންގެ އާބާދީއެއް އޮންނަ ޗައިނާގެ އާބާދީގެ 44 އިންސައްތައަށް މިހާރު ވެކްސިންގެ ފުރަތަމަ ޑޯޒް ޖަހާފައިވީ ނަމަވެސް ޗައިނާގެ ބޯޑަރު ހުޅުވާލުމާ އެ ޤައުމުގެ ސިއްހީ މާހިރުން ދެކޮޅެވެ.

ޗައިނާއިން މިހާރު 7 ބްރޭންޑެއްގެ ވެކްސިން ދަނީ ޖަހަމުންނެވެ. އެހެންނަ މަވެސް ބައެއް ސިޓީ ތަކުގައި އަނެއްބައި ސިޓީތަކަށް ވުރެ އަވަހަށް ވެކްސިން ޑޯޒްތައް ފުރިހަމަ ކުރަމުންދެއެވެ. މި ގޮތުން ބެއިޖިންގެ އާބާދީގެ 70 އިންސައްތަ މީހުންނަށް ވެކްސިންގެ ދެ ޑޯޒް ޖަހާފައިވާއިރު، ޝަންހާއީގައި 50 އިންސައްތަ  މީހުންނަށް ވެކްސިން ވަނީ ދީފައެވެ. އެހެން ނަމަވެސް ބާކީ ހުރި ބައެއް ސިޓީތަކުގައި އާބާދީގެ 20 އިންސައްތަ މީހުންނަށް ވެސް ވެކްސިން ޖަހައިފައެއް ނުވެއެވެ.

ޗައިނާގެ ބޯޑަރު ހުޅުވާލަން އެ ޤައުމުން ލަސް ކުރަމުންދަނީ ވެކްސިން ނުޖަހާ ތިބި ހިސާބުތަކުގައި ވައިރަސް ހަލުވި ކަމާއެކު ފެތުރިދާނެ ކަމުގެ ބިރަށެވެ. ޗައިނާއަކީ ކޮވިޑް-19 ފުރަތަމަ ފެނުނު ޤައުމެވެ. އެހެން ނަމަވެސް ޗައިނާއިން އެޅި ހަރުދަނާ ފިޔަވަޅުތަކުގެ ސަބަބުން އެގައުމުގައި ވައިރަސް ފެތުރޭ މިންވަރު ވަރަށް ބޮޑުތަން ވަނީ ކޮންޓްރޯލްކޮށްފައެވެ.

ޗައިނާގައި މިހާތަނަށް 900 މިލިޔަންއާ ގާތް ކުރާ އަދަދަކަށް ވެކްސިން ޑޯޒް ޖަހައިފައިވެއެވެ.

ޖުމްލަ 91,492 މީހުނަށް އެޤައުމުން ބަލި ވަނީ ޖެހިފައެވެ. އަދި މިބަލީގައި 4,636 މީހުން އެގައުމުން މަރުވިއެވެ. ޗައިނާގައި މިވަގުތު ބައްޔަށް ފަރުވާ ކުރަމުންދަނީ 487 މީހެކެވެ.