ސިޔާސީ ހަޔާތް ސަލާމަތް ކޮށްދިނުމުންވެސް ޖޭޕީ ބޭނުންކުރީ އަމިއްލަބޭނުން ފުއްދުމަށް: ސައުދު
ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު ކާނަލް ރިޓަޔާރޑް މުހައްމަދު ނާޒިމާއި ތިމަރަފުށީ ދާއިރާގެ މެމްބަރު އަބްދުﷲ ރިޔާޒްގެ ސިޔާސީ ހަޔާތް ނިމުނު ހިސާބުން ޖުމްހޫރީ ޕާޓީން ދިން ފުރުސަތަކުން ސިޔާސީ ޕްލެޓްފޯމަށް ނުކުތުމުގެ މަގު ފަހިވުމުން ވެސް އެބޭފުޅުން ޖުމްހޫރީ ޕާޓީ ބޭނުން ކުރީ އަމިއްލަ ބޭނުން ފުއްދުމަކަށް ކަމަށް ޖުމްހޫރީ ޕާޓީގެ ނައިބު ރައީސް އަހުމަދު ސައުދު ވިދާޅުވެއްޖެއެވެ.
ސަންގު ޓީވީގެ ހަބަރަށް ފަހު ޕްރޮގްރާމްގައި މިރޭ ވާހަކަދައްކަވަމުން ސައުދު ވިދާޅުވީ މިފަދަ ކަންކަން ޖުމްހޫރީ ޕާޓީގެ ތެރޭގައި މި ދިމާވީ އަލަކަށް ނޫން ކަމަށާއި އެހެން ނަމަވެސް ޕާޓީގެ މަސައްކަތް އެއް ރޫޙެއްގައި ކުރިއަށްދާ ކަމަށެވެ. އަދި ބައެއް ބޭފުޅުން ޕާޓީއާ ގުޅިވަޑައިގެން އެބޭފުޅުންގެ އަމިއްލަ ބޭނުން ފުއްދުމަށް ވެސް ޕާޓީގެ ބޭނުން ކުރައްވާ ކަމަށް ސައުދު ވިދާޅުވިއެވެ.
"ބައެއް ބޭފުޅުން ޕާޓީއަށް އައިސް އެބޭފުޅުންގެ އަމިއްލަ ބޭނުން ފުއްދުމަށް ޓަކައި ވެސް އަންނަ މީހުން އެބަތިބި. އޭގެ ތެރެއިން އަޅުގަނޑަށް ވެސް ތި ދެންނެވި ބޭފުޅުން ފާހަގަ ކުރެވުނީ މިއަދު ތިގޮތަށް. އެއީ އެބޭފުޅުންގެ ޕްރޮފެޝަނަލް ލައިފްގެ ޕްރޮފެޝަނަލް ކެރިއަރ ގާތްގަނޑަކަށް ބުނާ ނަމަ ނިމުނު ހިސާބުން އޮނަރަބަލް ގާސިމް އިބްރާހީމްގެ ފުރުސަތުން ސިޔާސީ ޕްލެޓްފޯމަށް ނުކުތުމުގެ މަގު ފަހިވެގެން ދިޔައީ. އޭގެ ތެރެއިން އަބްދުﷲ ރިޔާޒް ވެސް އަދި ކާނަލް ނާޒިމް ވެސް ހިމެނިވަޑައިގަންނަވާ" ސައުދު ވިދާޅުވިއެވެ
އޭނާ ވިދާޅުވީ ކާނަލް ނާޒިމްއަކީ ޖޭޕީގެ ލީޑަރ ގާސިމް ވަރަށް އިތުބާރު ކުރައްވާ ބޭފުޅެއްކަމަށާއި އެކަމުގެ ހެއްކަކަށް ގާސިމަށް ޔަގީނުން ވެސް ކާމިޔާބުވާނެކަމުގެ ގެރެންޓީ އޮތް ދާއިރާއެއް ނާޒިމަށް ދެއްވުން ފުދޭ ކަމަށެވެ. އަދި މީގެ އިތުރުން ޖޭޕީއާއި ގާސިމް ވެސް ކޮންމެ މީހަކަށް ވެސް އެންމެ ފަހުވަގުތާ ހަމައަށް އިތުބާރު ކުރައްވާނެ ކަމަށް ސައުދު ވިދާޅުވިއެވެ.
ހަމައެހެންމެ ނާޒިމާއި ރިޔާޒަށް ޖޭޕީގެ ލީޑަރޝިޕުން ފުރުސަތު ދެއްވިކަމަށާއި ކުރިން ވެސް މި ފަދަ އަޑުތަކެއް އިވުނު ނަމަވެސް އެ ފުރުސަތު ދެއްވާ އިތުބާރު ކުރެއްވިކަމަށާއި އެހެން ނަމަވެސް އެބޭފުޅުންގެ އަމިއްލަ އެދުމެއް ފޮރުވިފައި އޮތްކަން މިއަދު އެނގިގެން ގޮސްފިކަމަށް ވެސް ސައުދު ވިދާޅުވިއެވެ.
"ދެން އެކަމަކު މިއަދު އެބަ އެނގިގެންދޭ ހިޑަން އެޖެންޑާއެއް އެބައޮތްކަން. ފުރުސަތެއް ހޯދުމަށް ޓަކައި އަޅުގަނޑުމެންގެ ތެރެއަށް އައިސް ކާމިޔާބު ކޮށްގެން މަސައްކަތްތަކެއް ކުރިތަން ފެނިގެން ގޮސްފައި މި އޮތީ. އަޅުގަނޑުމެންނަށް ތި އަޑު މިއަދަކު ނޫން އިވުނީ.. ޕާޓީއަށް ތި އަޑު މާކުރިން ވެސް އިވިގެން ދިޔަ. އެކަމަކު ވެސް އަޅުގަނޑުމެން އެ ބޭފުޅުންނަށް އިތުބާރުކުރިން." ސައުދު ވިދާޅުވިއެވެ.
ސައުދު ވިދާޅުވީ ކާނަލް ނާޒިމާއި ރިޔާޒަށް ވެސް ޕާޓީ ހެދުމުގެ ފުރުސަތު އެބަ އޮތްކަމަށާއި އެހެން ނަމަވެސް އެ ބޭފުޅުން ކަންތައް ކުރެއްވި ގޮތް ކަމު ނުދާކަމަށެވެ. މިގޮތުން ރީތި ގޮތަކީ ކުރިން ޕާޓީން ވަކިވެވަޑައިގެން އެމަސައްކަތް ކުރެއްވުން ކަމަށާއި އެކަމަކު އެބޭފުޅުން ޖޭޕީން ވަކިވި ކަމުގެ ސިޓީ ވެސް ޕާޓީއަށް ލިބުނީ މިއަދު ކަމަށެވެ. ހަމައެހެންމެ ކަންކަން ސިއްރިއްޔާތުގައި ނިންމެވުމަކީ ރަނގަޅު ގޮތެއް ނޫން ކަމަށާއި އަމިއްލަ ބޭނުމަކަށް ޓަކައި ޕާޓީއަށް ގެއްލުން ދިނުމަކީ ޕްރޮފެޝަނަލް ކަމެއް ނޫން ކަމަށް ވެސް ސައުދު ވިދާޅުވިއެވެ.
