މަޙްލޫފްގެ މައްސަލައިގައި އަޅުގަނޑަށް އެއްވެސް ނުފޫޒެެއް ނެތް: ޕީޖީ ޝަމީމް

މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހްމަދު މަޙްލޫފްގެ މައްޗަށް ދައުވާކުރަން ފޮނުވައިފައިވާ މައްސަލައިގައި ވެސް އަދި އެހެން މައްސަލައެއްގައި ވެސް ސިޔާސީ ނުފޫޒެއް ނެތް ކަމަށް ޕްރޮސެކިއުޓަރ ޖެނެރަލް (ޕީޖީ) ހުސެއިން ޝަމީމް މިއަދު ވިދާޅުވެއްޖެއެވެ.

Ads by Hajj Corporation

މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް (އެމްއެމްޕީއާރްސީ)ގެ ފައިސާ އެސްއޯއެފުން މަހުލޫފުގެ އެކައުންޓަށް ޖަމާކުރި މައްސަލައިގައި އޭނާގެ މައްޗަށް ދައުވާކުރަން ޕީޖީ އޮފީހަށް ފޮނުވިތާ ދެ މަހަށް ވުރެ ގިނަ ދުވަސް ވެއްޖެއެވެ.

މި މައްސަލައާ ގުޅިގެން އޭނާ ހުރީ ޔޫތު މިނިސްޓަރު ކަމުގެ މަގާމުން ސަސްޕެންޑު ވެސް ކޮށްފައެވެ.

މަޙްލޫފްގެ މައްސަލައާ ގުޅިގެން އޭނާ ވަނީ ޕީޖީ އޮފީހަށް ސިޔާސީ ބަޔަކު ނުފޫޒު ފޯރުވާފައިވާ ކަމުގެ ތުހުމަތު ކުރައްވައިފައެވެ.

ޕީޖީ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި، ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޕީޖީ ޝަމީމް ވިދާޅުވީ މަޙްލޫފްގެ މައްސަލައާ ގުޅިގެން ވެސް އަދި އެހެން އެއްވެސް މައްސަލައަކާ ގުޅިގެން ވެސް ސިޔާސީ ފަރާތެއްގެ ނުފޫޒެއް އޭނާއަށް ނެތް ކަމަށެވެ. އަދި ހުރިހާ މައްސަލަތަކުގައި ވެސް ނިންމާނީ އެންމެ އިންސާފުވެރިކޮށް ކަމަށް ގަބޫލު ކުރެއްވޭ ގޮތަށް ކަމަށް ވެސް ޕީޖީ ވިދާޅުވިއެވެ.

"އަޅުގަނޑު 100 ޕަސެންޓު ޔަގީން އަޅުގަނޑަކަށް ސިޔާސީ ނުފޫޒެއް އެއްވެސް ފަރާތަކުންނެއް މި މައްސަލައަކާ ގުޅޭ ގޮތުން ވެސް އެހެން މައްސަލައަކާ ގުޅޭ ގޮތުން ވެސް ނެތް، އެއީ ސަރުކާރުން ކަމަށް ވިޔަސް މަޖިލީހުން ކަމަށް ވިޔަސް، އޭސީސީއިން ކަމަށް ވިޔަސް އެއްވެސް ފަރާތަކުން އެއްވެސް ނުފޫޒެއް ނެތް." ޕީޖީ ޝަމީމް ވިދާޅުވިއެވެ.

ޕީޖީ ޝަމީމް އިތުރަށް ވިދާޅުވީ ނުފޫޒެއްގައި ޖެހިގެން ވަކި ބަޔަކު ބުނާ ގޮތަށް ކަންތައްތައް ކޮށްދީގެން އުޅޭހާ އޭނާއަށް މަގާމު މުހިންމު ނޫން ކަމަށެވެ. އަބަދު މަގާމުގައި ވެސް ނުހުންނަވާނެ ކަމާއި، މަގާމުން ވަކިވުމަށް ފަހު ވެސް ދާނީ ވަކީލު ކަމުގެ ޕްރައިވެޓް ޕްރެކްޓިސް ކުރައްވަންކަން ޕީޖީ ފާހަގަ ކުރެއްވިއެވެ.