އުފަން ދުވަހުގެ ހަނދާނަކަށް، ރިޝީ ކަޕޫރު ކުޅުނު އެންމެ ފަހު ފިލްމުގެ ޕޯސްޓަރު ނެރެފި
މިއަދަކީ ބޮލީވުޑްގެ ލެޖެންޑަރީ އެކްޓަރ ރިޝީ ކަޕޫރުގެ 69 ވަނަ އުފަން ދުވަހެވެ.
ހާޓް އެޓޭކެއް ޖެހިގެން ކުއްލި ގޮތަކަށް މިދިޔަ އަހަރު މަރުވި ރިޝީގެ ހަނދާނުގައި ބޮލީވުޑްގެ އެތައް އެކްޓަރުންނާއި މަޝްހޫރު މީހުން ވަނީ މީސް މީޑިއާގައި އޭނާގެ އެކި ފޮޓޯތައް ވެސް ހިއްސާ ކޮށްފައެވެ.
ނަމަވެސް އޭގެ ތެރެއިން އެންމެ ފާހަގަ ކޮށްލެވޭ ޕޯސްޓެއް ކޮށްފައި ވަނީ ރިޝީ ކަޕޫރް އެންމެ ފަހުން ކުޅުނު ފިލްމުގެ ޕްރޮޑިއުސަރުންނެވެ.
އެގޮތުން ރިޝީ އެންމެ ފަހުން ކުޅުނު ފިލްމު "ޝަރްމާޖީ ނަމްކީން" ގެ ޕޯސްޓަރެއް މިއަދު އަަންމުކޮށްފައިވާއިރު، އޭގެން ފެންނަނީ ރިޝީ ކަޕޫރް ވަރަށް ހިނިތުން ވެލައިގެން ހުންނަ މަންޒަރެވެ.
އެ ޕޯސްޓަރު އާންމު ކުރުމުން ވަރަށް ގިނަ ބަޔަކު ވަނީ އެ ފޮޓޯ ޝެއާކޮށް ރިޝީގެ ހަނދާނުގައި އެކި ޝުއޫރުގެ މެސެޖުތައް ލިޔެފައެވެ.
"ޝަރްމާޖީ ނަމްކީން" ގެ ޕޯސްޓަރު މިއަދު އާންމު ކުރީ ރިޝީ ކަޕޫރަށާއި އާއިލާއަށް ހަދިޔާއަކާއި ހަނދާނެއްގެ ގޮތުގައި ކަމުގައި ވެސް އެ ފިލްމުގެ ޕްރޮޑަކްޝަން ޓީމުން ބުނެފައިވެއެވެ.
މިއީ ރިޝީ ކަޕޫރްގެ އެންމެ ފަހު ފިލްމު ކަމުގައި ވިޔަސް، އޭނާ މަރުވީ ފިލްމުގެ މަސައްކަތް އެއްކޮށް ނުނިމެނީސް ކަމަށްވާތީ ފިލްމުގައި ރިޝީގެ ބައި އިތުރަށް ކުޅެދީ ނިންމައިދީފައި ވަނީ ކުޅަދާނަ އެކްޓަރު ޕަރޭޝް ރަވާލްކަމަށް ވެސް ޓީމުން ބުނެފައިވެއެވެ.
