ސުޝްމީތާގެ "ފަސްޓް ލަވް"އަށް 22 އަހަރު!
ބޮލީވުޑްގެ ކާމިޔާބު ބަތަލާ ސުޝްމީތާ ސެންގެ "ފަސްޓް ލަވް" ކަމުގައިވާ އޭނާގެ ދޮށީ ދަރިފުޅަށް 22 އަހަރުވެއްޖެއެވެ.
ދޮށީ ދަރިފުޅު ރިނީ ސެންއަށް އުފަންދުވަހުގެ ތަހުނިޔާ ކިޔަމުން އިންސްޓަގްރާމްގައި ކުރި ޕޯސްޓެއްގައި ބުނެފައި ވަނީ "ފަސްޓް ލަވް"ގެ މަންމަ އަކަށްވުމަކީ ރަހްމަތެއްކަމަށެވެ.
ރިނީ ސެންއަކީ ސުޝްމީތާ އެޑޮޕްޓްކޮށްފައިވާ ކުއްޖެއެވެ. ރިނީ ސެން އެޑޮޕްޓްކޮށް ސުޝްމީތާ މަންމައަކަށް ވެފައިވަނީ އުމުރުން އެންމެ 24 އަހަރުގައެވެ. ސުޝްމީތާގެ ދެވަނަ ދަރިފުޅު އަލީޝާއަކީ ވެސް އެޑޮޕްޓް ކޮށްފައިވާ ކުއްޖެކެވެ.
ރިނީއަށް މިހާރު 22 އަހަރެވެ. އޭނާ ވަނީ ކުރު ފިލްމް ސުއްޓާބާޒީއިން ފެނިގެންގޮސްފައެވެ.
މީގެ ކުރިން މީޑިޔާއަކަށް ސުޝްމީތާ ދިން އިންޓަވިއު އެއްގައި ބުނެފަައި ވަނީ ރިނީއަށް 16 އަހަރު ވުމުން އޭނާއަށް އޭނާގެ އަސްލު މަންމަ ހޯދުމަށް ފުރުސަތު ދިން ކަމަށެވެ.
"އަހަރެން ބުނިން ރިނީ ގާތު ކޯޓުގައި ނަން އޮންނާނެކަމެއް ނޭނގެއޭ. އެކަމަކު އަސްލު މަންމައާ ބެހޭ މައުލޫމާތު އޮތް ސިޓީއެއްވާނޭ. ރިނީއަށް 18 އަހަރުވީމަ އެސިޓީގެ ހައްގުވެރިއަކަށް ވާނޭ. އަހަރެން ބޭނުމެއް ނޫން ފަހުން ހަގީގަތް އެނގިގެން އޭނަގެ ހިތް ހަލާކުވާކަށް. އެހެންވެ އަހަރެން ބުނިން ތައްޔާރު ވީމަ ބުނާށޭ އަހަރެން ރިނީ ގެންދާނަމޭ އެތަނަށް" ސުޝްމީތާ ބުންޏެވެ.
ސުޝްމީތާގެ ދެކުދިންގެ ކަންކަން އޭނާ ބަލަހައްޓަނީ އެކަންޏެވެ. އޭނާއަކީ މިހާރު ވެސް ދަރިންދެކެ ލޯބިވާ "ސިންގަލް މަންމަ"އެކެވެ.
Ads by STO
