ކުރީގެ ފަނޑިޔާރުންގެ ވާހަކަތަކަކީ ޝަރުޢީދާއިރާ ހަރުދަނާ ކުރުމަށް ހުރަސްއެޅިދާނެ ވާހަކަތަކެއް: ޖޭޕީ
ކުރީގެ ފަނޑިޔާރުންތަކެއް މިދިޔަ ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ދެއްކެވި ވާހަކަތަކަކީ ޝަރުއީ ދާއިރާ ހަރުދަނާ ކުރުމަށް ކުރެވޭ މަސައްކަތަށް ހުރަސް އެޅިދާނެ ފަދަ ވާހަކަތަކެއް ކަމަށާއި އެބޭފުޅުންނާ މެދު ފިޔަވަޅު އެޅުމަށް ޖުމްހޫރީ ޕާޓީން ގޮވައިލައްވައިފިއެވެ.
ޖުމްހޫރީ ޕާޓީން ނެރުނު ބަޔާނެއްގައި ބުނީ ޖުމްހޫރީ ޕާޓީގެ މަައިގަނޑު މަގްސަދަކީ ޢަދުލު އިންސާފު ގާއިމުކުރުމާއި، ގާނޫނީ ހަމަތަކުން ހިންގާ ޑިމޮކްރެޓިކް ވެއްޓެއް ގާއިމުކުރުންކަމުގައި ވާއިރު ކުރީގެ ފަނޑިޔާރުންނާއި ބައެއް ވަކީލުން ބޭއްވި ނޫސްވެރިންގެ ބައްދަލުވުމުގައި ދެއްކެވި ވާހަކަތަކުގެ ސަބަބުން ރައްޔިތުންގެ މެދުގައި ޝަރުޢީ ދާއިރާއަށް އޮންނަ އިތުބާރު ގެއްލޭނެކަމަށާއި ޢަދުލު އިންޞާފު ޤާއިމުކުރުމަށް ކުރެވޭ މަސައްކަތާ މެދު ޝައްކު އުފެދޭނެކަމަށާއި އިންޞާފުވެރިކޮށް ބޭއްވޭ ޝަރީޢަތްތަކަށް ހުރަސްއެޅޭނެކަމަށެވެ. މީގެ އިތުރުން އެޕާޓީގެ ބަޔާނުގައި އިތުރަށް ބުނީ އެފަދަ ކަންކަމަކީ ފަނޑިޔާރުންނަށާއި، ފަނޑިޔާރުގެއަށް ނުފޫޒު ފޯރުވުމަށް ކުރެވޭ ސިޔާސީ މަސައްކަތެއް ކަމަށެވެ.
ޝަރީޢަތާށާއި ފަނޑިޔާރުންނަށް ނުފޫޒު ފޯރުވުމުގެ އަމަލުތައް ހުއްޓުވޭނީ، އެފަދަ އަމަލުތައް ހިންގާ ފަރާތްތަކާ މެދު ގާނޫނާއި އެއްގޮތްވާ ގޮތުގެމަތީން ޖިނާއީ ތަހްގީގެއް ހިންގައި، އެފަރާތަކަށް ޙައްގު އަދަބު ދެވިގެން ކަމަށް ޖޭޕީން ވަނީ ބުނެފައެވެ.
އަދި ހަމައެހެންމެ ފަނޑިޔާރުންނާއި ވަކީލުންނަކީ އިސްލާމް ދީނާއި ރާއްޖޭގެ ގާނޫނުތަކަށް ފުރިހަމައަށް އިހުތިރާމުކުރާ ސިޔާސީ ނުފޫޒުން އެއްކިބާވެ ތިބެ ހައްގުބަސް ބުނަންޖެހޭ ބަޔެއް ކަމުން އެފަދަ ބޭފުޅުން ވަކި މައްސަލައެއް ހިނގާދިޔަ ގޮތާ މެދު ޝަރުއީ ނިޒާމުގެ އަގުވެއްޓޭ ފަދަ ވާހަކަ ދެއްކުމަކީ ޖުމްހޫރީ ޕާޓީން ކުށްވެރި ކުރާ ކަމެއް ކަމަށް ވެސް އެޕާޓީގެ ބަޔާނުގައި ވަނީ ބުނެފައެވެ.
