ކަޕޫރް އާއިލާއަކީ ހަގީގަތުގައި "ފޮނި" ބައެއް ނޫން، "ފޭކް" ބައެއް: ނީތޫ ކަޕޫރް
ބޮލީވުޑްގެ ނަން މަޝްހޫރު "ކަޕޫރް އާއިލާ"އަކީ ހަގީގަތުގައި "ފޮނި ބައެއް" ނޫން ކަމަށާއި އެހެން ނަމަވެސް އެއީ "ފޭކު ބައެއް"ކަމުގައި އެ އާއިލާ މައި އެއް ތަނބު އަދި ރިޝީ ކަޕޫރްގެ އަނބިމީހާ ނީތޫ ކަޕޫރު ބުނެފިއެވެ.
ނީތޫ މިކަން ހާމަ ކޮށްފައި ވަނީ އިންޑިއާގެ ގިނަ ބަޔަކު ބަލަމުންދާ ޓޯކް ޝޯއެއް ކަމުގައިވާ "ދަ ކަޕިލް ޝަރްމާ ޝޯ"ގައި ވާހަކަ ދައްކަމުންނެވެ.
އެ ޝޯގެ ހޯސްޓު އަދި މަޝްހޫރު ކޮމީޑިއަން ކަޕިލް ޝަރްމާއާ އެކު ކަޕޫރް އާއިލާއާ ބެހޭ ގޮތުން ވާހަަކަ ދައްކަމުން ނީތޫ ބުނެފައި ވަނީ އެ އާއިލާއަކީ ފޮނި ބޮޑު އާއިލާއެއް ކަމަށް ގިނަ ބަޔަކު ބުނި ނަމަވެސް ހަގީގަތު ކަޕޫރް އާއިލާއަކީ ފޮނި ބައެއް ނޫން ކަމަށެވެ.
އެހެން ނަމަވެސް ކަޕޫރު އާއިލާއަކީ ފޮނި ކަމަށް ހެދިގެން އުޅޭ، އެކަން އެގޮތަށް ފޭކް ބައެއް ކަމަށާއި ހަގީގަތުގައި ކަޕޫރު އާއިލާއަކީ މޮޔަ ކަންކަން ވެސް ކުރާ އާއިލާއެއް ކަމުގައި ވެސް ނީތޫ ބުނެފައިވެއެވެ.
ނީތޫގެ އެ ވާހަކަތަކުން އޭނާއާ އެކު އެ ޝޯއަށް އޭނާގެ އަންހެން ދަރިފުޅު ރިދިމާ ކަޕޫރަށް ވަރަށް ބޮޑު ހައިރާން ކަމެއް ލިބުނެވެ. ނަމަވެސް ޝޯ ގެ ހޯސްޓް ކަޕިލްއާއި ޖަޖް އަރްޗަނާ ޕޫރަން ސިންގ އެ ވާހަކަތައް ނެގީ ސަމާސާއެއް ގޮތަށެވެ.
ކަޕިލް ވަނީ ރިޝީ ދުނިޔޭގައި ހުރި އިރު ހިނގި ތަފާތު ހާދިސާއެއް ވެސް ބެލުންތެރިންނާ ހިއްސާ ކޮށްފައެވެ.
އެގޮތުން ކަޕިލް ބުނީ، އެ ޝޯއަށް ދައުވަތު ދިނުމަށް އެއް ދުވަހު ރިޝީއަށް ގުޅައިފައި ނީތޫ ވެސް ގެނައުމަށް އެދުމުން، ނީތޫއަށް ދައުވަތު ދޭން އޭނާގެ ފޯނަށް ގުޅުމަށް ބުނެ ފޯނު ކަނޑައިލި ކަމަށެވެ. ކަޕިލްގެ އެ ވާހަކަތައް ޝޯ ގެ މެހެމާނުންނާއި އާންމުން ވެސް ނެގީ ސަމާސާއެއް ގޮތަށެވެ.
