މޮހްސިންއާއި ޝިވާންގީ ޔޭ ރިޝްތާ ކިޔާ ކެހެލާތާ ހޭ ދޫކޮށްލަނީތަ؟
ސްޓާ ޕްލަސްއިން ގެނެސްދޭ އެންމެ ގިނަ ދުވަސްވީ ޑްރާމާ ކަމުގައިވާ "ޔޭ ރިޝްތާ ކިޔާ ކެހެލާތާހޭ"ގެ ލީޑް އެކްޓަރުން ކަމުގައިވާ މޮހްސިން ހާން (ކާރތިކް ގޮނޭކާ) ޝިވާންގީ ޖޯޝީ (ނައިރާ ސިންގާނިޔާ) އެ ޝޯ ދޫކޮށްލަން އުޅޭ ކަމަށް އިންޑިޔާގެ މީޑިޔާއިން ބުނެފިއެވެ.
2009ވަނަ އަހަރު ދައްކަން ފެށި ޑްރާމް ޔޭ ރިޝްތާ ކިޔާ ކެހެލާތާހޭއަށް އަނެއްކާ ވެސް ޖެނެރޭޝަން ލީޕެއް އައިސް މޮހްސިން ހާން ޝޯ ދޫކޮށްލާނެކަމަށް ބުނެފައިވާއިރު އެ ރޯލު އޭނާ ދޫކޮށްލަނީ އުމުރުން ދުވަސް ވީ މީހެއްގެ ރޯލު ކުޅެން އޭނާ ބޭނުން ނުވާތީކަމަށް ވެސް ރިޕޯޓްތައް ބުނެއެވެ. އެހެން ނަމަވެސް މިކަމާ ބެހޭ އެއްވެސް އޮފިޝަލް ސްޓޭޓްމެންޓެއް މިހާތަނަށް ނެރެފައި ނުވާއިރު މީޑިޔާ ތަކުން މޮހްސިންއާ އެ ސުވާލު ކުރުމުން އޭނާ ބުނީ އޭނާއަށް އެސުވާލަށް ސީދާ ޖަވާބު ނުދެވޭނެކަމަށާއި ހުއްޓައި ނުލައި ޝޯ ބެލުމަށް އެދޭ ކަމަށެވެ.
ޚަބަރުތައް ބުނެފައިވާ ގޮތުގައި އޮކްޓޯބަރު މަހުގެ ފުރަތަމަ ހަފްތާގައި މޮހްސިންއާއި ޝިވާންގީ ވެސް އެ ޝޯއިން ވަކިވާނެއެވެ. އަދި އެއަށް ފަހު ދެން ޝޯއިން ފެނިގެން ދާނީ މުޅިން އާ މޫނުތަކެއްކަމަށް ވެސް ޚަބަރުތައް ބުނެއެވެ.
މޮހްސިންއާއި ޝިވާންގީ އެކުގައި ޔޭ ރިޝްތާ ކިޔާ ކެހެލާތާހޭއިން ފެނިގެން ގޮސްފައި ވަނީ 2016ވަނަ އަހަރުއެވެ.
