ބަރުލަމާނީ ގެންނަން ކުރާ މަސައްކަތް ކާމިޔާބުވާނެ ކަމުގެ ޔަޤީންކަން އެބައޮތް: ނިޝާން
ރާއްޖޭގައި އޮތް ވެރިކަމުގެ ނިޒާމު ބަދަލުކުރުމަށް ކުރާ މަސައްކަތް ކާމިޔާބުވާނެކަމުގެ ޔަގީންކަން އެބައޮތް ކަމަށް އެކަމުގައި އިސްކޮށް ހަރަކާތެރިވާ ޤާނޫނީ ވަކީލު އަލްއުސްތާޛު މުޙައްމަދު ނިޝާން އިބްރާހިމް ވިދާޅުވެއްޖެއެވެ.
ރާއްޖޭގެ ވެރިކަމުގެ ނިޒާމް، ރިޔާސީ ނިޒާމުން ބަރުލަމާނީ ނިޒާމަށް ބަދަލުކުރުމަށް ގޮވައިލައި، ރައީސް އިބްރާހީމް މުޙައްމަދު ޞާލިޙަށް ހުށަހަޅާ ޕެޓިޝަންގެ އެންމެ ފަހުގެ މަޢުލޫމާތު "ދެން"އާ ހިއްސާ ކުރައްވަމުން ނިޝާން ވިދާޅުވީ ހީކުރި ވަރަށް ވުރެ ބޮޑަށް ތާޢީދު ލިބެމުންދާ ކަމަށެވެ.
ނިޝާން ވިދާޅުވީ މިހައިތަނަށް ބަރުލަމާނީ ޕެޓިޝަންގައި ސޮއިކުރި މީހުންގެ އަދަދު ބުނަން ނޭނގުނު ނަމަވެސް ހީކުރި ވަރަށް ވުރެ ގިޔަ ބަޔަކު އެ ޕެޓިޝަނަށް ތާއީދު ކުރަމުންދާ ކަމަށެވެ. އަދި އަތޮޅު ތެރެއިން ވެސް ޕެޓިޝަންގައި ސޮއި ކުރުމަށް ވަރަށް ގިނަ ބަޔަކު އެދެމުންދާ ކަމަށް ވެސް ނިޝާން ވިދާޅުވިއެވެ.
"ސީދާ އަދަދު މިހާރު ދަންނަވަން ދަތި. ހަމަ ގައިމުވެސް ލައްކައަކާ ކައިރިކުރާނެ މިހާރު. އަތޮޅުތެރެއިން ވެސް މި ކަމަށް ވަރަށް ބޮޑަށް ތަރުހީބު ލިބެމުންދަނިީ. އަދަދު ހަމަ ވިޔަސް އަދި ހުއްޓައިލުމުގެ ވިސްނުމެއް ނެތް. ޕެޓިޝަން ހުށަޅާނީ ވީހާވެސް ގިނަ ބައެއްގެ ސޮޔާ އެކު" ނިޝާން ވިދާޅުވިއެވެ.
އޮގަސްޓު 21 ވަނަ ދުވަހު ފެށި އެ ޕެޓިޝަނަކީ އެމްޑީޕީގައި ރައީސް އަދި މަޖިލިސް ރައީސް މުހައްމަދު ނަޝީދަށް ތާއީދު ކުރާ ފެކްޝަނުން ފެށި ޕެޓިޝަނެކެވެ.
އެ ޕެޓިޝަނުގައި ވީހާވެސް ގިނަ ބަޔަކު ސޮއި ކުރުމަށް ރައީސް ނަޝީދު ވަނީ އެދިވަޑައިގެންފައެވެ.
ރައީސް ނަޝީދު ފެކްޝަނުން މިފަދަ ޕެޓިޝަނެއް ތައްޔާރުކުރަން ފަށައިފައި ވަނީ ވެރިކަމުގެ ނިޒާމު ބަދަލު ކުރެވޭނީ ރައްޔިތުން އެގޮތަށް ނިންމުމުން ކަމަށް ރައީސް އިބްރާހިމް މުހައްމަދު ޞާލިޙު ވިދާޅުވެފައިވަނިކޮށެވެ.
ބަރުލަމާނީ ނިޒާމު އޮންނަ ޤައުމުތަކުން ފެންނަ ޙަޤީީޤަތަކީ މަޖިލީހުގެ ގޮނޑިތަކަށް ކޮންމެގޮތަކަށް ހޮވުނުކަމުގައިވިޔަސް، ހޮވޭ މެންބަރުންގެތެރެއިން ސަރުކާރެއް އެކުލަވާލެވޭ ވަރުގެ އަޣުލަބިއްޔަތު ލިބޭ ޕާޓީއިން މަޖިލީހަށް ހޮވޭ މެންބަރުންގެތެރެއިން ވަޒީރުން ޢައްޔަން ކުރެވެނީ، ޢިލްމެއް ޙިލްމެއްނެތަސް ޕާޓީވީމަ މަޤާމު ލިބޭ، ޢިލްމީ ޤާބިލުމީހުންނަކަށް ފުރުޞަތެއް ނޯވޭ، ވަޒީރުކަމާއި މެންބަރުކަމުގެ ދެމުސާރަ އެކަކަށްލިބޭ، ބާރުވެރިކަން ނާޤާބިލު މީހުންގެ އަތްމައްޗަށްދޭ. މިވަރުގެ އެއްޗެއް އޮފުއަރުވާ ރައްޔިތުންގެ ބޯކާލަން ނިޝާންފަދަ ބޭފުޅަކު އުޅުއްވުމަކީ ޤަދަރުކުޑަވެގެންދާނޭ ކަމެއް.
ރައްޔިތުންގެ ވޯޓަކުން އަވަސް މުސްތަގުބަލެއްގަ ތިކަމެއް ނުވާނެ. ދުނިޔޭގަ ހުރިއްޔާ ތިޔަކަން ނުވާނެއެކޭ ނުބުނެވޭނެ.