ކަރީނާއަށް އެންމެ ފުރަތަމަ ކީ އެހެން ނަމެއް!
ކަރީނާ ކަޕޫރު ހާންއަކީ ކާކުކަން ނޭނގޭ މީހެއް ނުހުންނާނެއެވެ. ފިލްމީ އާއިލާއަކަށް އުފަންވެ ފިލްމީ އާއިލާއެއްގެ މެމްބަރަކާ ކައިވެނީގެ ގޮތުން ގުޅި މަޝްހޫރުކަމާއި ރީތިކަމުގެ ލާމަސީލު މިސާލެއްކަމުގައިވާ ކަރީނާއަށް އެންމެ ފުރަތަމަ ކީ ނަމަކީ ކަރީނާ ކަޕޫރު ނޫންކަން އެނގެނީ ކިތައް މީހުންނަށް ހެއްޔެވެ؟
ކަރީނާ ކަޕޫރުގެ ކާފަ ކަމުގައިވާ ވެޓަރަން އެކްޓަރ ރާޖް ކަޕޫރު، ކަރީނާއަށް ދިން ނަމަކީ ސިދިމާއެވެ. އެހެން ނަމަވެސް ސިދިމާގެ ނަން ކަރީނާއަށް ބަދަލުކޮށްފައިވަނީ އޭނާގެ މަންމަ ބަބީތާއެވެ.
ކަރީނާގެ މަންމަ ބަބީތާ ބުނެފައިވާ ގޮތުގައި ކަރީނާގެ ނަމަކީ ލިއޯ ޓޮލްސްޓޯއިސްގެ އަނާ ކަރެނިނާ ފޮތުން "އިންސްޕަޔަރ" ވެގެން ކިޔުނު ނަމެކެވެ.
ރަޝިއަން ލިޔުންތެރިއެއްކަމުގައިވާ ލިއޯ ޓޮލްސްޓޯއީގެ އަނާ ކަރެނިނާ ފޮތަކީ އޭނާގެ އެންމެ ކާމިޔާބު އެއްފޮތެވެ.
އިއްޔެ 41ވަނަ އުފަންދުވަސް ފާހަގަކުރި ކަރީނާއަށް އެންމެ ފުރަތަމަ ކިޔުނު ނަމަކީ ކަރީނާ ނޫންކަން އެނގުމުން އޭނާގެ ފޭނުންނަށް ލިބުނީ ހައިރާންކަމެކެވެ.
ކާމިޔާބު އެކްޓަރ ސައިފް އަލީ ހާންއާ ކައިވެނިކޮށް ދެދަރިން ވެސް ލިބިފައިވާ ކަރީނާ އަދިވެސް ފެންނަނީ ކާމިޔާބުކަމާއެކު ބޮލީވުޑުގެ އެންމެ އުހުގައި ފިޔަޖަހަމުން އަންނަ ތަނެވެ. ކަރީނާއަކީ ބެލުންތެރިންނަށް ކަމުދިޔަ އެތައް ބައިވަރު ފިލްމްތަކެއް ބެލުންތެރިންނާ ހަމައަށް ގެނެސްދިން ފަންނާނެކެވެ. މީގެ ތެރޭގައި "ޖަބް ވީ މެޓް"، "މުޖްސޭ ދޯސްތީ ކަރޯގީ" "ފިދާ" އަދިވެސް ގިނަ ފިލްމްތައް ހިމެނެއެވެ.
