73.9 މިލިއަން ރުފިޔާ އިތުރުކޮށް 37 ބިލިއަންގެ ބަޖެޓެއް ކޮމިޓީން ފާސްކޮށްފި
73.9 މިލިއަން ރުފިޔާ އިތުރުކޮށް 37 ބިލިއަންގެ ބަޖެޓެއް ކޮމިޓީން ފާސްކޮށްފިއެވެ.
މިއަންނަ އަހަރަށް ލަފާކޮށް ދައުލަތުން ހުށަހަޅައިފައި ވަނީ 36.9 ބިލިއަން ރުފިޔާގެ ބަޖެޓެކެވެ. ބަޖެޓް ކޮމިޓީގައި މެންބަރުން މިރޭ މަޝްވަރާކުރުމަށް ފަހު 8 ދާއިރާއަކުން ހަރަދު އިތުރުކުރަން ވަނީ ފާސްކޮށްފައެވެ.
އެ ދާއިރާތަކަކީ 82 ރަށެއްގެ އުމްރާނީ ތަރައްގީގެ މަޝްރޫއުތަކަށް 57.42 މިލިއަން ރުފިޔާ، އައު ސިޔާސަތުތައް ތަންފީޒުކުރަން ރައްޔިތުން މަޖިލީހުގެ އިދާރާގެ ބަޖެޓަށް 7 މިލިއަން ރުފިޔާ، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން(ޑީޖޭއޭ)ގެ ޑިޖިޓަލައިޒޭޝަން ޕްރޮޖެކްޓަށް 500،000 ރުފިޔާ، ސިވިލް ސާވިސް ކޮމިޝަނަށް 1.69 މިލިއަން ރުފިޔާ، ފެމިލީ ޕްރޮޓެކްޝަން އޮތޯރިޓީއަށް 867،000 ރުފިޔާ، އިންތިގާލީ އިންސާފުގެ އޮފީހަށް 2.2 މިލިއަން ރުފިޔާ، އެމްއެމްޕީއާރުސީގެ މައްސަލަތައް އަވަސްކުރަން އޭސީސީއަށް 3.9 މިލިއަން ރުފިޔާ އަދި އިންފޮމޭޝަން ކޮމިޝަނަށް ގާނޫނީ އެހީ ހޯދުމަށް 204،000 ރުފިޔާއެވެ.
މި ހަރަދުތަކާ އެކު ކޮމިޓީން މިރޭ ފާސްކުރީ 36.99 ބިލިއަން ރުފިޔާގެ ބަޖެޓެކެވެ. މިއީ މިހައިތަނަށް ރާއްޖޭގެ ތާރީހުގައި ހުށަހެޅޭ އެންމެ ބޮޑު ބަޖެޓެވެ.
Ads by STO
