ކޮވިޑް-19 ޖެހޭ މީހުންގެ އަދަދު އިނގިރޭސިވިލާތުގައި ކަންބޮޑުވާ މިންވަރަކަށް އިތުރުވަނީ
އިނގިރޭސިވިލާތުގައި ފާއިތުވި 24 ގަޑިއިރުގެ ތެރޭގައި 46،000އަށް ވުރެ ގިނަ މީހުން ކޮވިޑް-19އަށް ފައްސިވެއްޖެއެވެ. މިއީ ފާއިތުވި މަހެއްހާ ދުވަހުގެ ތެރޭގައި އެންމެ ގިނަ އަދަދަކަށް މީހުން ކޮވިޑަށް ފައްސިވި ދުވަހެވެ.
22 އޮކްޓޯބަރުގައި އެ ޤައުމުން 49،298 މީހަކު ބައްޔަށް ވަނީ ފައްސިވެފައެވެ. މިއީ އޭގެ ފަހުން އެންމެ ގިނަ މީހުންނަށް ބަލި ޖެހުނު ފަހަރުކަން ފާހަގަކޮށްލެވެއެވެ.
ފާއިތުވި ހަތް ދުވަހުގެ ތެރޭގައި 277،261 މީހުންނަށް ކޮވިޑް ޖެހިގެން ރިޕޯޓްކޮށްފައިވާއިރު، އިއްޔެ އެކަނި ވެސް ބަލި ޖެހިގެން 199 މީހުން ވަނީ މަރުވެފައެވެ. އިނގިރޭސިވިލާތުގައި ކޮވިޑް-19 މަރެއްގެ ގޮތުގައި ބަލަނީ ކޮވިޑް-19 ޖެހިގެން 28 ދުވަހުގެ ތެރޭގައި މަރުވާ މީހުންނެވެ.
ފާއިތުވެދިޔަ ހަތް ދުވަހުގެ ތެރޭގައި 1026 މީހުން މަރުވެފައިވާއިރު، މިއީ އޭގެ ކުރީ ހަފްތާއަށް ވުރެ 112 މީހުން މަދު އަދަދެކެވެ. އަދި ބަލި ޖެހިގެން ނިޔާވި މީހުންގެ އަދަދުން 9.8 އިންސައްތައިގެ ދަށްވުމެއް ވަނީ އައިސްފައެވެ.
ބަލި ޖެހޭ މީހުންގެ އަދަދު އިނގިރޭސިވިލާތުގައި އިތުރުވެފައިވާއިރު، ކޮވިޑް-19 ވެކްސިން ޖެހި މީހުންގެ އަދަދުވެސް ދުވަހެއް ދުވަހަކަށް އަންނަނީ އިތުރުވަމުންނެވެ. މިގޮތުން، އިނގިރޭސިވިލާތުގެ އާބާދީގެ 88.1އިންސައްތަ މީހުން ވެކްސިންގެ އެއް ޑޯޒް ފުރިހަމަކޮށްފައިވާއިރު، އާބާދީގެ 80 އިންސައްތަ މީހުން ވަނީ ވެކްސިންގެ ދެ ޑޯޒް ފުރިހަމަކޮށްފައެވެ. އެއީ 46 މިލިޔަން މީހުންނެވެ.
