ރާއްޖެ މިއޮތީ އަނެއްކާ ވެސް އީޕީއެސްއަކަށް ބޭނުންވެފައި: ރައީސް
ރާއްޖެ މިއޮތީ ކުރިޔެކޭ އެއްގޮތަށް އަނެއްކާ ވެސް އީޕީއެސްއަކަށް ބޭނުންވެފައި ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ އީ.ޕީ.އެސް. ފައުންޑޭޝަނުން އިންތިޒާމުކޮށްގެން ރޭ ބޭއްވި "ޚިދުމަތުގެ ހަވީރު 2021" ޙަފްލާ ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
މި ޙަފްލާގައި ވާހަކަފުޅު ދައްކަވަމުން ރައީސް ވަނީ އީ.ޕީ.އެސް ސްކޫލް ފެށިގެން އައި ގޮތާއި އެ ސްކޫލުގައި ތަޢުލީމު ދިނުމުގެ ކަންކަން ކުރިޔަށްދިޔަ ގޮތާއި އަދި އެ ސްކޫލުގައި އެމަނިކުފާނު ކިޔަވާ ވިދާޅުވާން އުޅުއްވި ދުވަސްވަރުގެ ހަނދާން އައު ކުރައްވައި އެ ކަންކަމުގެ މައްޗަށް ވެސް އަލިއަޅުއްވައިލައްވައި ވާހަކަފުޅު ދައްކަވައިފައެވެ.
މީގެ އިތުރުން 1960ގެ އަހަރުތަކުގެ ތެރޭގައި ރާއްޖޭގައި ތަޢުލީމު ފެތުރިގެން ދިޔަގޮތުގެ މައްޗަށް އަލިއަޅުއްވައިލައްވައި ވާހަކަފުޅު ދައްކަވަމުން އެދުވަސްވަރު ރާއްޖެގައި ތިބެ އިނގިރޭސި މީޑިއަމްއަށް ކިޔެވުމުގެ ފުރުޞަތު ފަހިވެގެންދިއުން އެއީ އޭގެ ފައިދާ އެތައް ރައްޔިތުންނަށް ލިބިގެން ދިޔަ ރަނގަޅު ބަދަލެއް ކަމުގައި ވިދާޅުވިއެވެ. ހަމަ އެހެންމެ އީ.ޕީ.އެސް ސްކޫލް ހުޅުވިގެން ދިއުމަކީ އެ ދުވަސްވަރު ތަޢުލީމު ޙާޞިލުކުރުމަށް ޚާއްޞަކޮށް ރަށްރަށުން އައި ދަރިވަރުންނަށް ފަހިވި ވަރަށް ރަނގަޅު ފުރުޞަތެއްކަން އެ މަނިކުފާނު ފާހަގަކުރެއްވިއެވެ.
މި ޙަފްލާގައި ރައީސުލްޖުމްހޫރިއްޔާގެ ނައިބު ފައިޞަލް ނަސީމު ވެސް ބައިވެރިވެވަޑައިގެންނެވިއެވެ.
މި ޙަފްލާގައި ރައީސް ވަނީ އީ.ޕީ.އެސްއަށް ޚިދުމަތްކުރެއްވި ބޭފުޅުންގެ ޚިދުމަތުގެ އަގު ވަޒަންކުރުމުގެ ގޮތުން ދެއްވާ ހަނދާނީ ފިލާ އެފަރާތްތަކާ ހަވާލުކޮށްދެއްވައިފައެވެ.
މި ޙަފްލާގައި އީ.ޕީ.އެސްގެ 50 އަހަރުގެ ރަން ތާރީޚުގެ ދިރާސާ ލޯންޗުކޮށްދެއްވީ ރައީސުލްޖުމްހޫރިއްޔާގެ ނައިބެވެ.
އީ.ޕީ.އެސް ސްކޫލް އުފެދުމަށްފަހު ފާއިތުވި 50 އަހަރަށް ވުރެ ދިގު މާޒީގައި އެ ސްކޫލުން ހަތާވީސް ހާހެއްހައި ދަރިވަރުން ތަޢުލީމު ހާޞިލުކޮށްފައިވެއެވެ.
އީ.ޕީ.އެސް އަކަށް ބޭނުން ވެފަޔޭ ނުބުނެ އެހެން ތަޢުލީމީ ވަޒީރަކޭ ބޭނުންވަނީ، އެހެން ތަޢުލީމީ ސިޔާސަތެކޭ ބޭނުންވަނީ. ތަޢުލީމު ކިޔަންއެނގޭ ސަރުކާރެކޭ ބޭނުންވަނީ ބުނެބަލަ. ދުވަހަކު ތަޢުލީމު ނުވެއްޓޭހާ ދަށުދަރަޖަޔަށް ވެއްޓިފަ މި އޮތީ. ސާބަސް