"ގަންގޫބައި ކަތިއާވަޅީ" ރިލީޒްކުރުމުގެ ކުރިން އާއިލާއަށް ދައްކަން އާލިއާ ބޭނުންވި!
އާލިއާ ބަޓްއަކީ މިހާރު ބޮލީވުޑްގައި އެންމެ ކުރިއަރަމުން އަންނަ އެއް އެކްޓްރެސްއެވެ. އޭނާ ކުޅެފައިވާ ގިނަ ފިލްމުތައް ބޮކްސް އޮފީހުގައި ކާމިޔާބު ވެފައިވާ އިރު، އެ ފިލްމުތަކުން އޭނާ ވަނީ އެވޯޑު ވެސް ހޯދައިފައެވެ.
ތަފާތު އެކި ރޯލުތައް ކުޅެފައިވާ އާލިއާ މި އަހަރު ކުޅުނު އެންމެ ގިނަ ބަޔަކަށް އިންތިޒާރު ކުރެވޭ އެއް ފިލްމަކީ "ގަންގޫބައި ކަތިއާވަޅީ" އެވެ. މި ފިލްމުގައި އާލިއާ ކުޅެފައި ވަނީ ވަރަށް ޒީލަގަދަ، އަދި މީހުންނަށް ވަރަށް އިހާނެތިކޮށް ކަންތައްކުރާ ޕޮލިޓިޝަނެއްގެ ރޯލެވެ.
ސަންޖޭ ލީލާ ބަންސާލީ ޕްރޮޑިއުސްކޮށް ޑައިރެކްޓުކުރި މި ފިލްމާ ދޭތެރޭ އާލިއާ ވެސް ވަރަށް ބޮޑަށް ހިތްހަމަޖެހި، އޭނާގެ ރޯލާ މެދު ވަރަށް ފަހުރުވެރި ވެސް ވިކަމަށް ފިލްމުގެ ޕްރޮޑަކްޝަން ޓީމުން ވަނީ ހަންގާމާ ނިއުސް އަށް މައުލޫމާތު ދީފައެވެ.
"އާލިއާ ބޭނުންވީ އެ ފިލްމު ރިލީޒް ކުރުމުގެ ކުރިން އޭނަގެ އާއިލާއަށާއި ލޯބިވެރިޔާ ރަންބީރް ކަޕޫރްއަށް ދައްކަން. އެކަމަކު ސަންޖޭ އެކަމަށް އެއްބަހެއް ނުވި" ހަންގާމާ ނިއުސްއަށް މައުލޫމާތު ދިން މީހާ ބުނެފައިވެއެވެ.
ސަންޖޭ ލީލާއަކީ އަބަދުވެސް "ނޯ ޕްރީ-ސްކްރީނިންގް" ޕޮލިސީއެއް ގެންގުޅޭ މީހެއް ކަމަށާއި ރަންބީރްގެ ފުރަތަމަ ފިލްމު "ސާވަރިޔާ" ޕްރޮޑިއުސް ކުރި އިރު ވެސް އޭނާ އެ އުސޫލު ގެންގުޅުން ކަމަށް ވެސް ޓީމުން ބުނެފައިވެއެވެ.
"ގަންގޫބައި ކަތިއާވަޅީ" ރިލީޒް ކުރުމަށް ހަމަޖެހިފައިވަނީ އަންނަ އަހަރުގެ ފެބްރުއަރީ މަހުގައެވެ.
