ފެންނަމުންދާ މަންޒަރުތަކަށް ބަލާއިރު، އިންތިހާބު އިންސާފުވެރި ވާނެކަމަށް ގަބޫލެއް ނުކުރެވޭ: އަދުރޭ

މިހާރު ފެންނަމުންދާ މަންޒަރުތަކަށް ބަލާއިރު، ށ.ކޮމަންޑޫ ދާއިރާގެ ބައި-އިލެކްޝަން އިންސާފުވެރި ވެދާނެ ކަމަށް ގަބޫލު ނުކުރައްވާ ކަމަށް ޕީޕަލްސް ނެޝަނަލް ކޮންގްރެސް (ޕީއެންސީ)ގެ ރައީސް ޢަބްދުއްރަޙީމް ވިދާޅުވެއްޖެއެވެ.

Ads by STELCO

ކޮމަންޑޫ ދާއިރާގެ ބައި-އިލެކްޝަނަށް ސަރުކާރުން ނުފޫޒު ފޯރުވާކަމަށް އިދިކޮޅުން ތުހުމަތު ކުރެއެވެ. އެގޮތުން ނުފޫޒު ފޯރުވަމުންދާ ކަމަށް އިދިކޮޅުން ގަބޫލު ކުރާ ކަންތައްތަކެއް ވެސް ވަނީ ފެންމަތިވެފައެވެ.

ވޯޓުލާ މަރުކަޒު، އިސްކަންދަރު ސްކޫލް ކައިރީގައި އެމްޑީޕީން ރިޝްވަތު ބަހާކަމުގެ ތުހުމަތާއި، ކެމްޕެއިން ކުރަން ދިން ވަގުތު ހަމަވިފަހުން ވެސް، އެމްޑީޕީން ކެމްޕެއިން ކުރުން ފަދަ މައްސަލަތައް އިދިކޮޅުން ވަނީ އީސީއަށް ހުށަހަޅައިފައެވެ.

ޕީއެންސީގެ ރައީސް އަބްދުއްރަހީމް ވިދާޅުވީ، އެދެނީ އިންތިހާބު ވީހާވެސް އިންސާފުވެރިވުން ކަމަށެވެ. އެހެން ނަމަވެސް އެމްޑީޕީގެ އަމަލުތައް ހުންނަ ގޮތުން، އިންތިހާބު އިންސާފުވެރި ވެދާނެ ކަމަށް ގަބޫލު ނުކުރެއްވޭ ކަމަށް ވިދާޅުވިއެވެ.

"އަޅުގަނޑުމެން މަސައްކަތް ކުރަމުން މިދަނީ އެހެން ނުވެވޭތޯ. އިންތިހާބަކީ އިންސާފުވެރި އިންތިހާބަކަށް ހެދޭތޯ." އޭނާ ވިދާޅުވިއެވެ.

ކޮމަންޑޫ ދާއިރާގެ ގޮނޑީގެ ވާދަވެރިކަން ބޮޑުވެފައިވާ މިއަދު ކުރިޔަށް ދާ ބައިއިލެކްޝަންގައި 7 ވޯޓް ފޮއްޓެއް އިލެކްޝަންސް ކޮމިޝަނުން ވަނީ ބަހައްޓައިފައެވެ.

ވޯޓު ފޮށި ބަހައްޓާފައި ވަނީ ށ. ފޯކައިދޫ ސްކޫލް - 2 ފޮށި، ށ. މަރޮށި އިޖުތިމާއީ މަރުކަޒު - 1 ފޮށި، ށ. އަތޮޅު ތައުލީމީ މަރުކަޒު (ކޮމަންޑޫ) - 1 ފޮށި، ށ. ކޮމަންޑޫ ޕްރީސްކޫލް - 1 ފޮށި އަދި އިސްކަންދަރު ސްކޫލް - 2 ފޮށްޓެވެ.

ކޮމަންޑުއާއި ފޯކައިދޫ އަދި މަރޮށި ހިމެނޭ މި ދާއިރާގައި 3،309 މީހުންނަށް ވޯޓުލުމުގެ ހައްޤު ލިބިގެންވެއެވެ. އެއީ ކޮމަންޑޫގެ 1،405 މީހުންނާއި، ފޯކައިދޫގެ 1،201 މީހުންނާއި، މަރޮށީގެން 703 މީހުންނެވެ.