ރައީސް ޔާމީންގެ ޝަރީއަތް ކުރިން ލައިވް ކުރީ ރައްޔިތުންނަށް ވަކި މަންޒަރެއް ދެއްކުމަށް: އާދަމް ޝަރީފް
އިދިކޮޅު ލީޑަރު ރައީސް ޔާމީންގެ ޝަރީއަތް ކުރިން ލައިވްކުރީ ރައްޔިތުންނަށް ވަކި މަންޒަރެއް ދެއްކުމަށް ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، ޖުޑީޝަލް ސަރވިސް ކޮމިޝަން(ޖޭއެސްސީ) އިސްލާހު ކުރުމުގެ ބިލަށް ބަހުސް ކުރައްވަމުން އާދަމް ޝަރީފު ވިދާޅުވީ، ރައީސް ޔާމީންގެ ޝަރީއަތް ކުރިން ލައިވް ކުރީ ރައްޔިތުންނަށް ވަކި މަންޒަރެއް ދެއްކުމަށް ކަމަށެވެ.
އެހެން ނަމަވެސް ސުޕްރީމް ކޯޓުން، އެ މަނިކުފާނުގެ މައުސޫމްކަން ސާބިތުވުމުން، މިހާރު ޝަރީއަތްތައް ލައިވް ކުރާނެ ވަސީލަތްތަކެއް ނެތް ކަމަށް ވެސް އޭނާ ވިދާޅުވިއެވެ.
"ވަސީލަތްް ނެތްކަމަށް ބުނާ ކަމަށް ވަންޏާ، އަޅުގަނޑު ދަންނަވާނީ ކޯޓުތަކަށް ޝަރުއީ ނިޒާމުގެ ތެރެއިން މި މަޖިލީހުން އިސްނަގައިގެން ވެސް، މުޅި ދައުލަތުން އެކަމާ އުޅެގެން ވެސް އެބަޖެހޭ ވަސީލަތްތައް ހަމަކޮށްދީގެން، ރައްޔިތުންނަށް މީހެއްގެ ހުރި މައުސޫމްކަމާއި، ކުށެއް ކޮށްފައިވާ ނަމަ، އެ ކުށެއް ކުރިކަން ސާބިތުވާ ވަރަަށް ދެ ފުށް ފެންނަ ގޮތަށް މިކަން ކުރެވޭނެ ނިޒާމެއް ގާއިމުކުރަން." އާދަމް ޝަރީފް ވިދާޅުވިއެވެ.
އޭނާ އިތުރަށް ވިދާޅުވީ ޖޭއެސްސީ އިސްލާހު ކުރަން ޖެހޭ ކަމަށާއި، އެ އިސްލާހުގެ ތެރެއިން ޝަރުއީ ނިޒާމަށް ރައްޔިތުންގެ އިތުބާރު އަލުން ހޯދަން ވެސް ޖެހޭ ކަަމަށެވެ.
ވ. އާރަށް ކުއްޔަށް ދިނުމުގެ މުއާމަލާތާ ގުޅިގެން ކުރީގެ ރައީސް ޔާމީންގެ މައްޗަށް ކުރާ ދައުވާތަކަށް އެ މަނިކުފާނު އިންކާރު ކުރެއްވިއިރު، ޝަރީއަތް ލައިވް ކުރުމަށް ތަކުރާރުކޮށް އެދިވަޑައިގެންނެވިއެވެ.
ރައީސް ޔާމީން ވިދާޅުވީ އެ މަނިކުފާނުގެ މައްސަލައިގައި ގުޅުވައިގެން އެކި ގޮތްގޮތަށް އިންޒާރުތައް ދެމުންދާތީ ސަލާމަތްކަން ލިބޭނީ ޝަރީއަތް ލައިވް ކުރުމުން ކަމަށެވެ.
އެމަނިކުފާނުގެ ވަކީލުންގެ ޓީމުގައި އިސްކޮށް ހަރަކާތްތެރިވާ ކުރީގެ ނައިބު ރައީސް މުހައްމަދު ޖަމީލް އަހުމަދު ވެސް ވިދާޅުވި ގޮތުގައި، ރައީސް ޔާމީން ކުރިން ޖަލަށްލި މައްސަލައިގެ ޝަރީއަތް ލައިވް ކުރިއިރު އަދި ސުޕްރީމް ކޯޓުގެ ހުރިހާ ޝަރީއަތްތަކެއް ލައިވް ކުރަމުން ދާއިރު، މިހާރުގެ ޝަރީއަތް ލައިވް ކުރުން މުހިންމެވެ.
