ޕާކިން ސްލޮޓަށް ހުށަހަޅަން ހުޅުވައިލި ޕޯޓަލް ވަގުތީ ގޮތުން ބަންދުކޮށްފި
މާލޭގައި 211 ޕާކިންގ ސްލޮޓަށް އޮންލައިންކޮށް ހުށަހެޅޭގޮތަށް ހުޅުވައިލި ޕޯޓަލްއަށް މައްސަލަތަކެއް ދިމާވުމުން، އެ ޕޯތަލް ވަގުތީ ގޮތުން ބަންދު ކޮށްފިއެވެ.
މިކަމާ ގުޅިގެން މާލެސިޓީ ކައުންސިލުން ބުނީ ޓެކްނިކަލް މައްސަލައެއް ދިމާވުމުގެ ސަބަބުން، ޕާކިން ސްލޮޓްތަކަށް ކުރިމަތިލުމަށް ހުޅުވައިލި ޕޯޓަލްއަށް ވަނުމުގައި ދަތިތަކެއް ދިމާވެފައިވާ ކަމަށާއި ރައްޔިތުންގެ ކިބައިން އެކަމަށް މައާފަށް އެދޭ ކަމަށެވެ.
މި ޕޯޓަލްއަށް މައްސަލަތަކެއް ކުރުމަތިކުރުވީ ސަރުކާރުން ކަމަށް ތުހުމަތު ކުރައްވައި މާލެ ސިޓީގެ މޭޔަރު ޑރ. މުހައްމަދު މުއިއްޒު މިއަދު ކުރެއްވި ޓްވީޓެއްގައި ވިދާޅުވީ، ޕާކިން ސްލޮޓްތަކަށް ކުރިމަތިލުމަށް ހުޅުވައިލި ޕޯޓަލް ބްލޮކް ކޮށްފައިވާ ކަމަށެވެ.
މި ޕޯޓަލް ހުޅުވައިލުމަށް ހަމަޖެހިފައި އޮތީ މިއަދު މެންދުރު 1:00ގައެވެ. އެނގިފައިވާ ގޮތުގައި ޕޯޓަލް ބްލޮކްވެފައި ވަނީ ވެސް އެވަގުތުގައެވެ.
މާލެ ސިޓީ ކައުންސިލުގެ އޮފިޝަލަކު ވިދާޅުވި ގޮތުގައި ޕާކިން ސްލޮޓްތަކަށް ކުރިމަތިލުމަށް ޕޯޓަލް ހުޅުވައިލި ވަގުތު އެ ޕޯޓަލްއަށް 84،000 މީހުން ވަގުތުން ވަދެފައިވެއެވެ.
