ސެނެހިޔާގައި މަސައްކަތް ކުރާ އިންޑިއާ ޑޮކްޓަރުން ޔުނީފޯރމާ އެކު މަގުމައްޗަށް ނިކުންނަށް ބިރުގަނޭ: އެމްއެންޑީއެފް

"އިންޑިއާ އައުޓް" ކެންޕެއިންގެ ސަބަބުން ސިފައިންނަށް ޚާއްސަ ހޮސްޕިޓަލް ސެނެހިޔާގައި، މަސައްކަތް ކުރާ އިންޑިއާ ޑޮކްޓަރުން ޔުނީފޯރމާ އެކު މަގުމައްޗަށް ނިކުންނަށް ބިރުގަންނަ ކަމަށާއި އެ ކެންޕެއިންގެ ސަބަބުން އިންޑިއާ ޑޮކްޓަރުންގެ މަސައްކަތަށް އެކަމުގެ ނޭދެވޭ އަސަރު ކުރަމުން އަންނަ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ވިދާޅުވެއްޖެއެވެ.

Ads by MWSC

"އިންޑިއާ އައުޓް"ގެ ނަމުގައި ކުރިއަށް ގެންދާ ހަރަކާތުގެ ސަބަބުން ގައުމީ ސަލާމަތަށް ނުރައްކަލެއް އޮތްތޯ ބެލުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން އަންނަނީ ދިރާސާއެއް ކުރަމުންނެވެ.

ރޭ ކުރިޔަށް ދިޔަ ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ (241) ކޮމިޓީގައި ވާހަކަދައްކަވަމުން އެމްއެންޑީއެފްގެ ސަރޖަންޓް ޖެނެރަލް ކާނަލް ޑރ. އަލީ ޝާހިދު ވިދާޅުވީ، އިންޑިއާ އައުޓް ކެންޕެއިނާއެކު ސެނެހިޔާ ކައިރިޔަށް އައިސް އެ ތަނުގައި ޚިދުމަތްދިނުމުގައި ތިބޭ އިންޑިޔާ ޑޮކްޓަރުން ނެރެން ގޮވަމުންދާކަމަށެވެ.

"މިހިނގާ ކަންކަމާ ގުޅިގެން ބައެއް މީހުން ސެނެހިޔާ ކައިރިޔަށް އައިސް ޑޮކްޓަރުން ނެރޭށޭ ކިޔައި ހަޅޭއްލަވާ އަދި ބައެއް ފަހަރު ޑޮކްޓަރުންނަށް ދައްކަން އައިސް ޑޮކްޓަރުންގެ ފޮޓޯ ނަގާ އެ ފޮޓޯ ޓްވިޓަރއަށް ލައި ފާޑުފާޑު ވާހަކަ ޖެހީމާ މީގެން ނޭދެވޭ އަސަރު ކުރޭ. އޭގެ ސަބަބުން އެމީހުން މަގުމައްޗަށް ޔުނީފޯރމާ އެކު ނިކުންނަށް ބިރުގަނޭ. އެމީހުން ސެނެހިޔާއަށް އަންނަނީ ވެސް ޔުނިފޯމް ލައިގެން މަތިން ޖެކެޓެއް ލައިގެން ފޮރުވިގެން އައިސް މަސައްކަތްކޮށްފައި ދަނީ." ޑރ. އަލީ ޝާހިދު ވިދާޅުވިއެވެ.

ޑރ. އަލީ ޝާހިދު އިތުރަށް ވިދާޅުވީ، 2013ވަނަ އަހަރުން ފެށިގެން އަސްކަރީ ޑޮކްޓަރުން ބައިތިއްބައިގެން ސެނެހިޔާގައި ޚިދުމަތް ދެމުން އަންނަ ކަމަށެވެ. މިގޮތުން، މިލިޓަރީ ޑޮކްޓަރުންނާއި މިލިޓަރީ ޕެރެމެޑިކްސް މީގެ ކުރިން ވެސް މަސައްކަތް ކުރަމުން އަންނަނީ މިލިޓަރީ ޔުނިފޯމުގައިކަން އޭނާ ފާހަގަ ކުރެއްވިއެވެ. އަދި ވިދާޅުވީ، އެކި ގައުމުތަކުގެ ސިފައިން ރާއްޖޭގައި އެމީހުންގެ ޔުނީފޯމް އަޅައިގެން މަސައްކަތްކުރާ އިރު، ރާއްޖޭގެ ސިފައިން ވެސް އެކި ގައުމުތަކުގައި ޔުނީފޯރމްގައި މަސައްކަތްކުރަމުންދާ ކަމަށެވެ.

އިންޑިޔާ އައުޓްގެ ނަމުގައި ހިންގާ ކެމްޕެއިންގެ ސަބަބުން މިގޮތަށް، އިންސާނީ އެހީތެރިކަން ފޯރުކޮށްދިނުމަށް އަސްކަރިއްޔާގައި ކުރިޔަށްދާ މަސައްކަތްތަކަށް ހުރަސް އެޅެމުންދާ ކަމަށް އޭނާ ފާހަގަ ކުރެއްވިއެވެ.