ސިވިލް ސާވިސް ކޮމިޝަނަކީ ސިޔާސީ ޖަގަހައެއް: އާދަމް ޝަރީފް
ރާއްޖޭގެ ސިވިލް ސާވިސް ކޮމިޝަން (ސީއެސްސީ)އަކީ ސިޔާސީ ޖަގަހައެއްގެ ގޮތުގައި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އަދި އިދިކޮޅު ޕީއެންސީގެ ނައިބު ރައީސް އާދަމް ޝަރީފު އުމަރު ސިފަކުރައްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ސަރުކާރުގެ ފަރާތުން، މަރަދޫ ދާއިރާގެ މެންބަރު އިބްރާހީމް ޝަރީފް ހުށަހަޅުއްވައިފައިވާ، ދިވެހި ސިވިލް ސާވިސްގެ ގާނޫނަށް އިސްލާހު ގެނައުމުގެ ބިލާ ގުޅޭ ގޮތުން ބަހުސްކުރައްވަމުން އާދަމް ޝަރީފު ވިދާޅުވީ، ގައުމު ކުރިއަށް ގެންދިއުމުގައި ސީއެސްސީގެ ހިދުމަތަކީ ބަރޯސާވާން ޖެހޭ ދާއިރާއެއް ކަމަށެވެ.
މެންބަރު އާދަމް ޝަރީފު ވިދާޅުވީ އެ ދާއިރާއަށް ގާނޫނަކުން ބަދަލު ގެނައި ކަމުގައި ވިޔަސް، ގަވައިދަކުން ބަދަލު ގެނައި ކަމުގައި ވިޔަސް ވިސްނުން ބައްޓަން ކުރަން ޖެހޭނީ ކުރެވޭ މަސައްކަތަކުން ހިދުމަތްތައް އަވަސް ކޮށްދިނުމާއި އެ މުވައްސަސާއެއް ނުވަތަ އެ ދާއިރާއެއްގެ ހިންގުން ވަރުގަދަ ކުރުމަށް ކަމަށެވެ.
"އެ ގަވައިދަށް ހުށަހަޅައިފައިވާ އިސްލާހުތަކަކީ އޭނގެ ސަބަބުން އިހްލާސްތެރިކަމާ އެކު މަސައްކަތްކޮށްފި ނަމަ އަދި އެ ދެވޭ އިމްތިޔާޒްތައް ނުވަތަ މަސްއޫލިއްޔަތުންތައް ރަނގަޅަށް އަދާކުރާ ނަމަ ފައިދާވާނެ އިސްލާހުތަކެއް ކަމަށް ޤަބޫލު ކުރެވޭ" އާދަމް ޝަރީފު ވިދާޅުވިއެވެ.
މީގެ އިތުރުން އާދަމް ޝަރީފު ވިދާޅުވީ ސީއެސްސީގެ މަސައްކަތް ހަރުދަނާ ކުރުމަށް ކުރަން ޖެހޭ އެންމެ މުހިންމު މަސައްކަތަކީ ރާއްޖޭގައި މިހާރު ތަންފީޒުކުރަމުންދާ ސިވިލް ސާވެންޓުންގެ މަސައްކަތުގެ ފެންވަރު ބަލާ ނިޒާމް، އެޕްރޭޒަލް ސިސްޓަމް، ހަރުދާ ކުރުން ކަމަށެވެ.
