އިންޑިއާ ސިފައިން ރާއްޖޭގައި އުޅެނީ ހަތިޔާރާ އެކު: ރައީސް ޔާމީން
ރާއްޖޭގައި އުޅޭ އިންޑިއާ އަސްކަރީ ސިފައިން ރާއްޖޭގައި އުޅެމުން އަންނަނީ ހަތިޔާރާ އެކު ކަމަށް ކުރީގެ ރައީސް, އިދިކޮޅު ލީޑަރު ޔާމީން އަބްދުލްގައްޔޫމް ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ، އެމަނިކުފާނު އިސްކޮށް ހުންނަވާ ރާއްޖޭގެ އެކިކަންކޮޅުތަކުގައި ކުރިޔަށްދާ "އިންޑިއާ އައުޓް" ކެންޕެއިންގެ ތެރެއިން މިއަދު އދ. މަހިބަދޫއަށް ވަޑައިގެން ދެއްކެވި ވާހަކަފުޅުގައެވެ.
ރައީސް ޔާމީންގެ ވާހަކަފުޅުގައި ވިދާޅުވީ، ޔާމީން ވިދާޅުވީ އުތުރުތިލަފަޅުގައި މަސައްކަތް ކުރާ އިންޑިއާ ސިފައިންނަށް ބޭނުން ހަތިޔާރެއް ގެނައުމުގެ ހުއްދަ ދިވެހި ސަރުކާރާ އެކު ހެދި އެއްބަސްވުވަމުން ދީފައިވާ ކަމަށާއި ބޭނުން އަދަދަކަށް ހަތިޔާރު ގެނައުމުގެ ފުރުސަތު އިންޑިއާ ސިފައިންނަށް އެބައޮތް ކަމަށެވެ.
"އުތުރު ތިލަފަޅުގައި މަސައްކަތް ކުރާ އިންޑިއާ ސިފައިންނަށް ބޭނުން ހަތިޔާރެއް ގެނައުމުގެ ހުއްދަ އެ އޮތީ އެގްރީމެންޓްގައި ދީފައި. ހަތިޔާރުގެ ނަމެއް ވެސް ނެތް. އޮންނަނީ އެންމެ އާއްމު އިބާރާތުން "އާމްސް". އޭގެ މާނައަކީ ހުރިހާ ވައްތަރެއްގެ ހަތިޔާރު، ބޭނުން އަދަދަކަށް ގެނެވިދާނެ" ރައީސް ޔާމީން ވަނީ މި ވާހަކަތައް ދޮގު ކުރުމަށް ޑިފެންސް މިނިސްޓަރު މާރިޔާ ދީދީއަށް ކެރިވަޑައިގަންނަވާނެތޯ ސުވާލު ކުރައްވައިފައެވެ.
މާރިޔާ މީތި ދޮގުކޮށްބަލަ، ޖެނެރަލް ޝަމާލު މި ވާހަކަ ދޮގުކޮށްބަލަ. ނުކުރެވޭނެ ދޮގެއް. މިއީ ދިވެހިރާއްޖޭގައި އިންޑިއާ ސިފައިން ތިބީމަ ވާ ނުރައްކާ"
ރައީސް ޔާމީންގެ ވާހަކަފުޅުގައި ވިދާޅުވީ، މިއަދު ދިވެހި ސަރުކާރަށް އިންޑިއާ ސިފައިން އަތުގައި ހަތިޔާރު ނެތް ކަމަށް ނުބުނެވޭނެ ކަމަށެވެ.
"މިހާރު އެ އުޅެނީ ހަތިޔާރާ އެކީ، މާލޭގައި ވެސް އެ އުޅެނީ ހަތިޔާރާ އެކީ. އަސްކަރިއްޔާ އެއްވެސް މީހަކަށް ކަނޑައެޅިގެން މިކަން ދޮގު ކުރާކަށް ނުކެރޭނެ. އުތުރުތިލަފަޅުގައި ހަތިޔާރާ އެކީ އުޅެވޭއިރު، ހައްދުންމަތީގައި ހަތިޔާރާ އެކީގައި އުޅެވޭ އިރު، ހަނިމާދޫގައި ހަތިޔާރާއެކީ އުޅެވޭ އިރު، މުލިޔާގޭގައި ހަތިޔާރާ އެކީ އުޅެވޭ އިރު، ރައްޔިތުން މަޖިލީހުގައި ހަތިޔާރާ އެކީ އުޅެވޭ އިރު، މާލޭގެ އެތަން މިތަނުގައި ހަތިޔާރާ އެކު ނޫޅެވެންވީ ކީއްވެ؟" ހަތިޔާރާއެކު ރާއްޖޭގައި ބޭރުގެ އަސްކަރިއްޔާ އުޅުމަކީ މަނާ ކަމެއް ކަމަށާއި އުތުރުތިލަފަޅުގެ އެއްބަސްވުން ރައްޔިތުންނާ ހަމައަށް ތިލަކުރަން މި ސަރުކާރުން ބޭނުން ނުވަނީ އެ ސަބަބާ ހުރެ ކަމަށް ވެސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ، އިންޑިއާ ސިފައިން ރާއްޖޭގައި ތިބުމަކީ ބޮޑު ނޮހޮރޮއްޕާނެއް ކަމަށާ އެއީ ގަައުމަށް މެދުވެރިވެފައި އޮތް މުސީބާތެއް ކަމަށެވެ. އަދި ރާއްޖެއަށް މިއީ ނާމާން ދުވަސްތަކެއް ކަމަށާއި މިއީ ކޮވިޑް-19އަށް ވުރެ ބޮޑަށް ނުރައްކާ ބޮޑު ކަމެއް ކަމަށް ވިދާޅުވިއެވެ.
އުތުރުތިލަފަޅާ ގުޅޭ ގޮތުން އިތުރަށް ދެއްކެވި ވާހަކަފުޅުގައި ރައީސް ޔާމީން ވިދާޅުވީ އިންޑިއާއިން އައިސް ތިބީ އެ ތަން ތަރައްޤީ ކުރަން ނޫން ކަމަށައި އެތަން މިލްކު ކުރަން ކަމަށެވެ. އަދި ރައީސް ޞާލިޙަށް އިޝާރާތް ކުރައްވައި ވިދާޅުވީ، އިންޑިއާގެ ގޮޑިކޮއްކޮ ސަރުކާރެއް އޮތްހާ ހިނދަކު އުތުރުތިލަފަޅު އޮންނާނީ އިންޑިއާގެ މިލްކުގެ ދަށުގައި ކަމަށެވެ.
އެ ތަން ތަރައްޤީ ކުރުމެއް ނޫން، އެތަން ބަލަހައްޓައިދިނުމެއް ވެސް ނޫން، އެގްރީމެންޓް އޮތްހައި ހިނދަކު އެތަނުގެ މިލްކުވެރިކަން އެ އޮތީ އިންޑިއާގައި. އުތުރުތިލަފަޅަކީ އެއްވެސް ގޮތަކަށް ދިވެހި އަސްކަރިއްޔާގެ ބާރު ހިނގާތަނެއް ނޫން. އެއީ ސަތޭކައިން ސަތޭކަ އިންޑިއާ ސިފައިންގެ ބާރުގެ ދަށުގައި އޮތް ތަނެއް"
ރައީސް ޔާމީންގެ ވާހަކަފުޅުގައި ރާއްޖެއާއި އިންޑިއާއާ ދެމެދު އޮންނަ ގުޅުމަށް ވަނީ ފާޑު ވިދާޅުވެފައެވެ. މިގޮތުން ވިދާޅުވީ، މިއަދާ ހަމައަށް ދެމިއޮތީ މާ މޮޅު ހާރިޖީ ސިޔާސަތެއް އޮވެގެން ނޫން ކަމަށެވެ. އެ މަނިކުފާނު ވިދާޅުވީ ދިވެހީން އަބަދުވެސް ތިބެން ޖެހިފައި އޮތީ އިންޑިއާއަށް ޖިޒީ ދައްކައިގެން ޒާތަަކަށް އަޅުވެތި ވެގެން ކަމަށެވެ. އަދި އެކަން މިހައިތަނަށް ވެރިކަން ކުރެއްވި އެއްވެސް ބޭފުޅަކަށް ދޮގު ނުކުރެއްވޭނެ ކަމަށް ވިދާޅުވިއެވެ.
"އަޅުގަނޑުމެންނަށް މުހިންމެއް ނޫނޭ، އިންޑިއާ ސިފައިން ގެނެސްގެން، ނޫނީ އިންޑިއާގެ އެހީގައި އެކަން ކުރާކަށް. ކިރިޔާ ވެސް ވިސްނުމެއް ހުރި ބަޔަކު ކަމަށް ވަންޏާ، ރާއްޖޭގައި މި ކަހަލަ ބޮޑެތި މަސައްކަތް ކުރާކަށް، މިކަހަލަ ނާޒުކު މަސައްކަތް ކުރާކަށް، ޤައުމުގެ ސަލާމަތާ ގުޅުން ހުރި މަސައްކަތް ކުރާކަށް އިންޑިއާއެއް ނުގެންނާނެ. އެއީ ސަބަބުތަކެއް ހުރީމަ." ރައީސް ޔާމީން ވިދާޅުވިއެވެ
އަނގަފެޅީތަ ރޮއިރޮއި ކަރުނަ