ޕީޖީގެ ސުވާލެއް: މީހަކު މަރުވި ސަބަބު ދެނެގަނެވުމުން، ވަކި ކަމެއް ތަފާތު ވޭތޯ؟
މީހަކު މަރުވި ސަބަބު ދެނެގަނެވުމުން، ވަކި ކަމެއް ތަފާތުވޭތޯ، ޕްރޮސެކިއުޓަރ ޖެނެރަލް ހުސައިން ޝަމީމް ސުވާލު ކުރައްވައިފިއެވެ.
ޕީޖީ ޝަމީމްގެ ބްލޮގްގައި ޝާއިއު ކުރެއްވި ލިޔުމެއް ހިއްސާ ކުރައްވައި، މިއަދު ކުރެއްވި ޓްވީޓެއްގައި ޝަމީމް ވިދާޅުވެފައި ވަނީ މީހަކު ކުއްލި ގޮތަކަށް މަރުވުމުން، އެމީހެއްގެ އާއިލާގެ މީހުން، އެމީހަކު މަރުވި ސަބަބު އެނގެން ބޭނުންވާ ކަމަށެވެ.
އަދި މި ސުވާލަށް ބައެއް ފަހަރު ޖަވާބު ލިބޭއިރު، އަނެއްބައި ފަހަރު ޖަވާބު ނުލިބޭކަމަށް ވެސް ޕީޖީ ވިދާޅުވިއެވެ.
"ހަގީގީ ސުވާލަކީ އެ ސުވާލުގެ ޖަވާބުގެ ލިބުމުން، ވަކި ކަމެއް ތަފާތުވޭތޯއެވެ؟" ޓްވީޓުގައިވެއެވެ.
ޕީޖީ މިހެން ވިދާޅުވިއިރު، ރާއްޖޭގައި ހިނގައިފައިވާ ގޮތް ނޭނގޭ މަރުތަކުގެ މައްސަލަތައް ބެލުމަށް ސަރުކާރުން ވަނީ މަރު ކޮމިޝަނެއް އުފައްދައިފައެވެ.
ގެއްލުނު ނޫސްވެރިޔާ އަހްމަދު ރިޟްވާނަށް ވީގޮތް ހޯދުމުގެ މަސައްކަތަކީ އެ ކޮމިޝަނުން އެންމެ އިސްކަމެއް ދީގެން ކުރަމުން އަންނަ މަސައްކަތަށްވާ އިރު، މިކަން ކޮޅެއްގައި ޖެހިފައި ނުވާކަން ފާހަގަކޮށް ގިނަ ބައެއްގެ ފާޑުކިޔުންތައް ވަނީ ސަރުކާރަށް އަމާޒުވެފައެވެ.
