ބްރޯއަކަށް ބްރޯއެއް މި ސަރުކާރުގައި އެބަހުރި: ރައީސް ޔާމީން
ބްރޯއަކަށް ބްރޯއެއް މި ސަރުކާރުގައި ވެސް އެބަހުރި ކަމަށް ވިދާޅުވެ، ރައީސް އަބްދުﷲ ޔާމީން އަބްދުލްޤައްޔޫމްގެ ފާޑު ކިޔުން މި ސަރުކާރުގެ އިސް ފަރާތްތަކަށް ރައްދު ކުރައްވައިފިއެވެ.
ޅ.ކުރެންދޫ ކައުންސިލުގެ ރައީސް ހޮވުމަށް، ބޭއްވި ބައި-އިލެކްޝަންގައި ޕީޕީއެމަށް ލިބުނު ކާމިޔާބީ ފާހަގަކުރުމަށް އެރަށުގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވަނީ މި ސަރުކާރުގެ ކޮރަޕްޝަނާ ގުޅޭ ގޮތުން ވާހަކަފުޅު ދައްކަވައިފައެވެ.
މިގޮތުން ރައީސް ޔާމީންގެ ސަރުކާރުގައި ހިނގި އެމްއެމްޕީއާރުސީގެ ޚިޔާނާތުގައި އެންމެ ބޮޑަށް ތުހުމަތު ކުރެއްވޭ އޭރުގެ ނައިބު ރައީސް އަޙްމަދު އަދީބަށް އިޝާރާތް ކުރައްވާ ވިދާޅުވީ، "ބްރޯއަކަށް ބްރޯއެއް" މި ސަރުކާރުގައި އެބަހުންނެވި ކަމަށެވެ.
"ބްރޯއަކަށް ބްރޯއެއް މި ސަރުކާރުގައި އެބަހުރި. ނަގަނީ އެކަކު ދެ މީހަކު ނޫން. މި ސަރުކާރުގައި ކަންތައްތަކާ ހަވާލުވެ ތިބި މީހުން ގޮތަށް، އޭގެ ތެރޭގައި ކުންފުނިތައް ހިމެނޭ ގޮތަށް. ފައިސާ ނުނަގާ މީހެއް މަދުވާނެ." ރައީސް ޔާމީން ވިދާޅުވިއެވެ.
މި ސަރުކާރުގެ ބްރޯއަކީ އިކޮނޮމިކް މިނިސްޓަރު ފައްޔާޒް އިސްމާއީލ ކަމަށް އެމްޑީޕީ ބައެއް ބޭފުޅުން ވިދާޅުވެފައެވެ. ރައީސް ނަޝީދު ވެސް ވަނީ ފައްޔާޒްއާ އިޝާރާތްކޮށް ބްރޯއަށް ވެގެން ނޫޅެން ވަނީ ވިދާޅުވެފައެވެ. މި ސަރުުކާރުން ކަންކުރަމުންދާ ގޮތަށް ވަރަށް ބޮޑަށް ފާޑު ވިދާޅުވަމުން ރައީސް ޔާމީން ވިދާޅުވީ، ވެރިކަމަށް އައީ ކޮރަޕްޝަަނަށް ޒީރޯ ޓޮލޮރެންސް ކަމަށް ބުނެ ކަމަށާއި މިއަދު އެންޓި ކޮރަޕްޝަން ކޮމިޝަން ވެސް ނެތް ކަމަށެވެ.
ރައީސް ޔާމީންގެ ވާހަކަފުޅުގައި އެމްއެމްޕީއާރުސީގެ ޚިޔާނާތުގެ މައްސަލައަށް ވެސް އަލިއަޅުއްވައިލެއްވިއެވެ.
"މީހަކަށް ދައުލަތުގެ ތިޖޫރިއަކުން މުށް ޖަހައިފައި ފައިސާ ނެގޭނެ ގޮތެއް ނޯންނާނެ" ރައީސް ޔާމީން ވަނީ މިކަންކަން ބަލަން ތިބި މުއައްސަސާތައް ފެއިލްވި ހިސާބަކީ ކޮބައިތޯ ބެލުމަކީ މުހިންމު ކަމެއް ކަމަށް ވިދާޅުވެފައެވެ. އެއަށް ފަހު އެމްއެމްޕީއާރުސީގެ ޚިޔާނާތުގެ މައްސަލައިގައި އެހެން ރެއެއްގައި ވާހަކަފުޅު ދައްކަވާނެ ކަމަށް ވިދާޅުވެ، އެ ވާހަކަފުޅު ކުރުކޮށްލެވިއެވެ.
ގަޑިއިރަކަށް ދެމިގެން ދިޔަ މި ވާހަކަފުޅުގައި ދެން ރައީސް ޔާމީން ފާޑު ވިދާޅުވީ، ދާދި މިދާކަށް ދުވަހު ކޮމަންޑޫގައި ބޭއްވި އިންތިޚާބުގައި ކަންވެ ދިޔަ ގޮތެވެ. އެ އިންތިޚާބަށް މުއައްސަސާތަކުގެ ވެރިން ފައިސާ ޚަރަދު ކުރެއްވި ކަމަށާއި އެކަން ބަލާނެ އިދާރާއެއް ނެތް ކަމަށް ވިދާޅުވިއެވެ. އަދި ބޮޑެތި ތުހުމަތުތައް ކުރެވޭއިރު ރަނގަޅު ގޮތަކީ އިސްތިއުފާ ދެއްވުމަށް ފަހު އަނބުރާ ގެއަށް ވަޑައިގަތުން ކަމަށް ވިދާޅުވިއެވެ.
"ޑިމޮކްރަސީތަކުގައި ހަމައެކަނި ޖެހެނީ ބާރުތައް ވަކިވާކަށް ނޫން، ބާރުތައް ހިންގަން ތިބޭ އިސް މީހުންގެ ވެސް ފިސާރި ކެރުންތެރިކަން ހުންނަން ޖެހޭ. ބޮޑެތި ތުހުމަތުތަކެއް އެމީހުންނާ ދޭތެރޭ ކުރެވެންޏާ، އެއީ ރިޝްވަތުގެ ތުހުމަތަސް، ނޫނީ މަޤާމުގެ މަސްއޫލިއްޔަތު ނޫފުލޭކަމުގެ ތުހުމަތެއް ކުރެވުނު ކަމުގައި ވިޔަސް، އެއްވަނަ ދުނިޔޭގެ ޤައުމުތަކުގައި ފެނިގެން ދަނީ އެ ބޭފުޅުން އަމިއްލަފުޅަށް އިސްތިއުފާދީފައި ވަޑައިގަތުން." ރައީސް ޔާމީން ވިދާޅުވީ، ރާއްޖޭގައި ފެންނަނީ ތުހުމަތު އައި ވަރަކަށް މަޤާމުގައި ބައްދައި ބަގުޑިލާ މަންޒަރު ކަމަށެވެ.
މަނިކުފާނުގެ ބްރޯ ވަރުގެ ދެވަނަ އެހެން ބްރޯއެއް ދެން މިގައުމަކުން ނުފެންނާނެ. އެހެނެއްނޫން ބްރޯ ހެދެން އުޅޭ ބައެއް މީހުން ފެނުނަސް އެއީކީ މާބޮޑު ކަމެއްނޫން. މަނިކުފާނުގެ ބްރޯއަކީ ލާމަސީލު ހުރިހާކަމަކުން އަރާ ހުންނެވި މަނިކުފާނުގެ އުފެއްދުމެއްވީމާ އެއާގާތްކޮއްލެވޭނެ ފަރުދަކު ދުވަހަކުވެސް ދެން މިރާއްޖެއަކު ނުއުފެއްދޭނެ.