ފިޝަރީޒް މިނިސްޓަރު މާދަމާ މަޖިލީހަށް ހާޒިރު ކުރަނީ
ފިޝަރީޒް މިނިސްޓަރ ޑރ. ހުސައިން ރަޝީދު ހަސަން، މާދަމާ އޮންނަ ރައްޔިތުންގެ މަޖިލީހުގެ ޖަލްސާއަށް ހާޒިރުކުރަން ނިންމައިފިއެެވެ.
މިނިސްޓަރު މާދަމާގެ ޖަލްސާއަށް ހާޒިރު ކުރަނީ ދިއްދޫ ދާއިރާގެ މެންބަރު އަބްދުﷲ ވަހީދު، މިނިސްޓަރާ ކުރައްވަން ހުށައެޅުއްވި ސުވާލަކާ ގުޅިގެންނެވެ.
މެންބަރު ވަހީދު ސުވާލު ކުރަން ހުށަހަޅުއްވައިފައި ވަނީ ދިއްދޫ އައިސްޕްލާންޓްގެ މަސައްކަތް ކުރިއަށް ނުގޮސް އޮތް ސަބަބެވެ. އެ ގޮތުން އޭނާ ހުށައެޅުއްވި ސުވާލުގައި ވިދާޅުވެފައި ވަނީ ދިއްދޫގައި އައިސް ޕްލާންޓެއް ގާއިމުކޮށް ދެއްވާނެކަމަށް ރައީސް އިބްރާހިމް މުޙައްމަދު ޞާލިޙް ވައުދުވެވަޑައިގެންފައިވާ ކަމަށާއި އެ ވައުދާ އެއްގޮތަށް ސެޕްޓެންބަރު 8، 2021ގައި ސައުދީ ފަންޑުގެ އެހީގައި ދިއްދޫގައި 25 ޓަނުގެ އައިސް ޕްލާންޓެއް ހެދުމަށް ފިނޭންސް މިނިސްޓްރީން އިއުލާނުކޮށްފައިވާ ކަމަށެވެ.
ނަމަވެސް އޭގެ ފަހުން އެކަމުގެ އެއްވެސް މައުލޫމާތެއް ނުލިބޭ ކަމަށާއި އެހެންކަމުން އެ މަސައްކަތް މިހާރު ގޮސްފައިވާ ހިސާބެއް ބެލުމަށާއި އައިސްޕްލާންޓް ގާއިމުކުރުމުގެ އަމަލީ މަސައްކަތް ފެށި އެ ތަނުގެ ހިދުމަތް ރައްޔިތުންނަށް ލިބޭނެކަަމަށް ލަފާ ކުރެވޭ ތާރީޚެއް ސާފުކޮށް ދިނުމަށް ވެސް މެންބަރު ވަހީދު ވަނީ އެދިލައްވައިފައެވެ.
