ހިޔާ ފްލެޓުތައް ނިންމަން ހަވާލުކުރި ކުންފުނިތަކުގެ މައްސަލަ ބޭރުކޮށްލައިފި
ހިޔާ ފްލެޓުތަކުގެ ފިނިޝިން މަސައްކަތް ނިންމަން ފައިސާ ނަގައި، މަސައްކަތް ނުނިންމާ ކުންފުނިތަކުގެ މައްސަލަ ރައްޔިތުންގެ މަޖިލީހުން ބޭރުކޮށްލައިފިއެވެ.
މި މައްސަލަ މަޖިލީހަށް ހުށަހެޅުއްވީ އިދިކޮޅު ޕީއެންސީގެ ނައިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފު އުމަރެވެ.
އާދަމް ޝަރީފު ހުށަހެޅުއްވި މި މައްސަލަ ބަލައިގަތުމާ މެދު މެންބަރުންނަށް ފެނިވަޑައިގަންނަވާ ގޮތަކަށް ވޯޓު ދެއްވުމަށް ރިޔާސަތުން ހުޅުވާލުމާ އެކު، އެ މައްސަލަ ބަލައިގަތުމަށް ވޯޓު ދެއްވީ އެންމެ ހަ މެންބަރުންނެވެ. އަދި މައްސަލަ ބަލައިގަތުމާ ދެކޮޅަށް 29 މެންބަރުން ވޯޓު ދެއްވިއެވެ. އެހެންކަމުން މި މައްސަލަ މަޖިލީހުން ވަނީ ބޭރުކޮށްލައިފައެވެ.
ރައްޔިތުންގެ މަޖިލީހަށް އާދަމް ޝަރީފު ހުށަހެޅުއްވި ކުއްލި މައްސަލައިގައި ވިދާޅުވީ ފްލެޓް ލިބުނު މީހުން ދަރަންޏަށާއި އެހެނިހެން ގޮތް ގޮތުން ތަކެއްޗާއި ފައިސާ ހޯދައިގެން ކުންފުނިތަކާ ހަވާލު ކުރުމުން ކުންފުނިތަކުން ފައިސާއަށް ހިޔާނަތްތެރިވުމުން ފްލެޓް ލިބުނު މީހުންނަށް ފޫނުބެއްދޭވަރުގެ ދަތިތަކާއި އުނދަގޫތައް ކުރިމަތިވެފައިވާ ކަމަށެވެ.
Ads by STO
