ނުފޫޒުގެ ޝަކުވާތައް ބެލި ގޮތާ މެދު ހިތްހަމަ ނުޖެހި ފައްޔާޒުގެ ޓީމުން އިސްތިއުނާފަށް

އިންތިހާބަށް ނުފޫޒު ފޯރުވައި ބިރުދެއްކި ކަމަށް ތުހުމަތުކޮށް ވެރިކަން ކުރާ އެމްޑީޕީގެ ޗެއާޕާސަންގެ މަގާމަށް ވާދަ ކުރައްވާ އިމްތިޔާޒު ފަހުމީ (އިންތި)ގެ ކެމްޕެއިން ޓީމުން ހުށަހެޅި ޝަކުވާތައް އެ ޕާޓީން ބެލި ގޮތާ މެދު ހިތްހަމަ ނުޖެހި، އެ މައްސަލަ ޕާޓީގައި އިސްތިއުނާފް ކުރުމަށް އެ މަގާމަށް ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއިލްގެ ޓީމުން މިއަދު ނިންމައިފިއެވެ.

Ads by Hajj Corporation

އެމްޑީޕީގެ އިންތިހާބާ ބެހޭ ކޮމިޓީން ވަނީ އިންތިގެ ޓީމުން ހުށަހެޅި ހަތަރު ޝަކުވާއިން، ތިން ޝަކުވާ ސައްހަކަމަށް ނިންމައިފައެވެ. އަދި އެކަން އެގޮތަށް ނުކުރުމަށް ވެސް ވަނީ ނިންމައިފައެވެ.

އެ މައްސަލަތައް ބެލި ގޮތާމެދު ހިތްހަމަ ނުޖެހިގެން އެކަން ކުށްވެރިކޮށް މިނިސްޓަރ ފައްޔާޒްގެ ކެމްޕެއިނު ޓީމުން ވަނީ ބަޔާނެއް ނެރެފައެވެ.

ފައްޔާޒްގެ ޓީމުން ބުނީ އެ މައްސަލަތައް ބަލައިފައި ވަނީ ޕާޓީގެ ގަވައިދުތަކާއި އަމަލުކުރަމުންދާ އުސޫލުތަކާ ހިލާފަށް ކަމަށެވެ. އެގޮތުން އެ ނިންމުން ނިންމައިފައި ވަނީ ޕާޓީގެ އިންތިހާބާ ބެހޭ ގަވައިދުގެ 46 މާއްދާގެ (ހ) އަދި (ށ)އާ ހިލާފަށް ކަމަށް ވެސް ބަޔާނުގައި ބުނެފައިވެއެވެ.

އެ މާއްދާތަކުގައި ބުނެފައި ވަނީ:

(ހ) އިންތިހާބުތަކާ ގުޅިގެން ހުށަހެޅޭ މައްސަލަތައް ބެލުމަށް އިންތިހާބާ ބެހޭ ކޮމިޓީގެ މެންބަރަކު ހިމެނޭ ގޮތަށް ތިން މެންބަރުންގެ ކޮމިޓީއެއް އިންތިހާބަށް ކުރިމަތިލުމަށް އިއުލާންކުރުމާ އެކު އިންތިހާބާ ބެހޭ ކޮމިޓީން އުފައްދަންވާނެ

(ށ) ކޮމްޕްލެއިންޓްސް ކޮމިޓީއަށް މައްސަލައެއް ހުށަހެޅިއްޖެ ނަމަ، ގިނަވެގެން 48 ގަޑިއިރުތެރޭ އެ މައްސަލަ ބަލައި އެ މައްސަލައަކާ މެދު ގޮތެއް ނިންމައި، މައްސަލަ ހުށަހެޅި ފަރާތައް އަންގަން ވާނެ

ފައްޔާޒްގެ "ހިންގާލަން" ކެމްޕެއިނު ޓީމުގެ ބަޔާނުގައި ބުނެފައި ވަނީ، މި ޤަވާއިދުތަކާއި އުސޫލުތަކާ ހިލާފަށް އެކުލަވައިލައިފައިވާ ކޮމިޓީއަކުން އެ އިންތިޚާބުގެ ކެނޑިޑޭޓުންގެ ހައްގުތައް ގެއްލޭގޮތަށް އަދި ވާދަވެރި ކެންޑިޑޭޓަށް ފަހިވާ ގޮތަށް ނިންމައިފައިވާ ނިންމުންތައް، އެ ކެމްޕެއިނުން ހަރުކަށި އިބާރާތުން ކުށްވެރިކޮށް، އަދި އެ ނިންމުންތައް ބަލައި ނުގަންނަ ކަމަށެވެ.