ބޮޑު ޚިޔާނާތުގެ އަސްލު ލިސްޓު ވަރަށް އަވަހަށް ނެރޭނަން: ފައްޔާޒު
އެމްއެމްޕީއާރްސީގެ ހިޔާނާތުގެ ފައިސާ ލިބުނު ކަމަށް ބެލެވޭ މީހުންގެ އަސްލު ލިސްޓު ވަރަށް އަވަހަށް އާންމު ކުރައްވާނެ ކަމަށް އެމްޑީޕީގެ ޗެއާޕާސަން ކަމަށް ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ.
ފައްޔާޒު މިފަދައިން ވިދާޅުވީ ރޭ ސަންގު ޓީވީން ގެނެސްދިން އެމްޑީޕީގެ ޗެއާޕާސަން ބަހުސްގައި ވާހަަކަ ދައްކަވަމުންނެވެ.
ފައްޔާޒު ވިދާޅުވީ މަޖިލީހުން އެމްއެމްޕީއާރްސީގެ ހިޔާނާތުގެ ފައިސާ ލިބުނު ކަމަށް ބެލެވޭ މީހުންގެ ލިސްޓު އާންމުކޮށްފައި ވަނީ އުނިކޮށްގެން ކަމަށެވެ. “އޭގެ ފުރިހަމަ ލިސްޓު ވަރަށް އަވަހަށް އިރާދަކުރެއްވިއްޔާ ހާމަކުރާނަން”ފައްޔާޒު ވިދާޅުވިއެވެ.
މީގެ އިތުރުން ފައްޔާޒު ވިދާޅުވީ ވަގަށް ގޮވިޔަސް 2023ގެ ރިޔާސީ އިންތިޚާބު އެމްޑީޕީއަށް ކާމިޔާބުކޮށްދިނުމަށް ޓަކައި ކުރެވެން ހުރި ހުރިހައި ކަމެއް ކުރާނެ ކަމަށާއި ޖާނާއިމާލު އެކަމަށް ކުރިމަތިލާން އެންމެން ތިބީ ތައްޔާރަށް ކަމަށެވެ.
“ވަގަށް ގޮވިޔަސް އެހެން އެއްޗަކަށް ގޮވިޔަސް ބްރޯއަކަށް ގޮވިޔަސް 2023 އެމްޑީޕީއަށް ހޯދުމަށް ޓަކައި އަޅުގަނޑުމެންނަށް ކުރެވެން ހުރި ހުރިހައި ކަމެއް ކުރާނަން. އަޅުގަނޑުމެންގެ ޖާނާ މާލު އެކަމަށް ކުރިމަތި ކުރާނަން. ދަރިންގެ މުސްތަގުބަލު އޮތީ ވެސް އެމްޑީޕީއަށް 2023 ލިބިގެން” ފައްޔާޒު ވިދާޅުވިއެވެ.
ފައްޔާޒު ވިދާޅުވީ ކެމްޕޭނުގައި ދައްކައިފައިވާ ހުރި ވާހަކަތަކަށް ބަލާއިރު އިންތިއަށް ސަރުކާރާ އެކު މަސައްކަތް ކުރެވޭނެ ކަމަށް ގަބޫލު ނުކުރައްވާ ކަމަށެވެ.
މާދަމާ ބާއްވާ އެމްޑީޕީގެ އެތެރޭގެ އިންތިޚާބުގެ ވޯޓުލުން ބޭއްވުމަށް ހަމަޖެހިފައި ވަނީ ހެނދުނު 9އިން ހަވީރު 4އަށެވެ. މި އިންތިޚާބުގައި އެމްޑީޕީގެ ޗެއާޕާސަންއަކު ހޮވުމާއި އަންހެނުންގެ ގޮފީގެ ރައީސް ކަމަށް ބޭފުޅަކު ހޮވުމާއި ޒުވާނުންގެ ހިތްވަރަށް ބޭފުޅުން އިންތިޚާބުކުރާ ގޮތަށް ވަނީ ހަމަޖެހިފައެވެ.
